Սերժ Սարգսյանն այսօր ներկայացել է խորհրդարան և մասնակցել Ապրիլյան պատերազմի քննիչ հանձնաժողովի փակ նիստին: «Ոչինչ չունեմ թաքցնելու, եկել է ժամանակը, երբ ես պատրաստ եմ պատասխանելու բոլոր հարցերին»,- լրագրողներին ասել է 3-րդ նախագահը: Նա խոստացել է արտակարգ դրության ավարտից հետո ևս հանդիպել լրատվամիջոցների հետ`խոսելու միայն Ապրիլյան պատերազմի մասին: Մոտ 5 ժամ տևած նիստից դուրս գալով՝ երկրի նախկին նախագահը հայտարարել է. «Ես համոզվեցի, որ իմ որոշումը գալ հանձնաժողովի նիստին, ամբողջովին արդարացված էր»:

Առողջապահական և աշխատանքի տեսչական մարմինը մշտադիտարկում է իրականացրել արտակարգ դրության ժամանակահատվածում գործունեություն իրականացնող 487 կազմակերպություններում: Որոշ սուբյեկտներ ժամանակավորապես դադարել են գործել: Վերահսկողություն է իրականացվում նաև շինարարական կազմակերպություններում: Տեսչական մարմնի՝ աշխատողների առողջության պահպանման և անվտանգության ապահովման վարչության պետը մանրամասներ է ներկայացրել նաև ինքնամեկուսացված աշխատակիցների վերաբերյալ:

Կառավարությունը անցկացրել է հերթական նիստը: Զեկուցելով կորոնավիրուսի հետ կապված իրավիճակի մանրամասները՝ առողջապահության նախարարը կարանտինային միջոցառումները համարել է էֆեկտիվ: Վարչապետն ասել է, որ ընդհանուր առմամբ համաճարակի կորը գտնվում է կառավարելիության տիրույթում, բայց նաև զգուշացրել է.«Եթե շարունակենք այն վերաբերմունքը, որ շատ հաճախ տեսնում ենք մեր իրականության մեջ, կարող է ունենանք համաճարակի նոր բռնկում».Փաշինյանն անդրադարձել է նաև Նորաշեն համայնքին, որը մեկ մարդու գործողությունների պատճառով փակվել է:

Խորհրդարանն այսօրվա աշխատանքային օրը գրեթե ամբողջությամբ նվիրել է ԿԲ նախագահի թեկնածուի հարցին: Ֆինանսավարկային և բյուջետային հանձնաժողովն այդ պաշտոնում ներկայացրել  է «Իմ  քայլը» խմբակցության առաջադրած թեկնածուին՝ Մարտին Գալստյանին: Նա ունի տնտեսագիտության թեկնածուի գիտական աստիճան, ավարտել է Հարվարդի համալսարանը, գլխավոր դրամատանը զբաղեցրել է տարբեր պաշտոններ: ԿԲ նախագահի ընտրությունը տեղի կունենա վաղը՝ փակ-գաղտնի քվեարկությամբ:

«Գագիկ Ծառուկյան» բարեգործական հիմնադրամը ամբողջ հանրապետությունում իրականացրած սոցիալական խոշորամասշտաբ նախաձեռնության շրջանակում առաջին անհրաժեշտության սնունդ է հատկացրել Շենգավիթ վարչական շրջանի ԵԿՄ անդամներին: Բարձր գնահատելով հայրենիքի պաշտպանության գործում մեծ ավանդ ունեցող ազատամարտիկներին ու նկատի ունենալով արտակարգ դրությամբ պայմանավորված ստեղծված սոցիալական ծանր վիճակը՝ Գագիկ Ծառուկյանը հանձնարարել է օգնության ձեռք մեկնել հայրենիքի պաշտպաններին: Ազատամարտիկներից բացի, Շենգավիթում հիմնադրամը սնունդ է հատկացրել նաև կարիքավոր ընտանիքներին, թոշակառուներին ու հաշմանդամություն ունեցող անձանց:

«Գագիկ Ծառուկյան» բարեգործական հիմնադրամը շարունակում է նաև կորոնավիրուսի կանխարգելման աշխատանքները Երևանի վարչական շրջաններում: Տեխնիկական նորագույն միջոցներով զինված աշխատակիցներն ամեն օր ախտահանում են փողոցները, մայթերը, բակերն ու շքամուտքերը: Կանխարգելիչ միջոցառումներ են իրականացվում նաև կանգառներում, ստորգետնյա անցումներում: Վարակազերծման աշխատանքները հերթական անգամ իրականացվել են Կենտրոն վարչական շրջանում: