Ազատ են արձակվել Արամ Հակոբյանն ու Արամ Մանուկյանը
Այսօր կալանքից ազատվել են Սասնա ծռեր խմբի ևս 2 անդամներ՝ Արամ Հակոբյանն ու Արամ Մանուկյանը՝ Պավել Մանուկյանի որդին: Արամ Հակոբյանին դատարանի դահլիճից ազատելու հիմք է հանդիսացել առողջության պատճառով պաշտպանի ներկայացրած միջնորդությունն ու գրավը: Դատարանը բավարարել է նաև Արամ Մանուկյանի պաշտպան Ինեսա Պետրոսյանի՝ իր պաշտպանյալին կալանքից ազատ արձակելու մասին միջնորդությունը՝ հաշվի առնելով Ազգային Ժողովի Ելք և Ծառուկյան խմբակցությունների 9 պատգամավորների անձնական երաշխավորագրերը, Մանուկյանի առողջական վիճակը և մեկ միլիոն դրամ գրավը:
Էլեկտրաէներգիայի սակագինը առայժմ կարող է նվազել միայն սոցիալապես անապահով ընտանիքների համար
Էլեկտրաէներգիայի սակագինը առայժմ կարող է նվազել միայն սոցիալապես անապահով ընտանիքների համար: Էներգետիկ ենթակառուցվածքների և բնական պաշարների նախարարությունը շահագրգիռ կողմերի հետ քննարկել է սակագնի վերանայման հարցը:«Կան մի շարք ռիսկեր, որոնք չենք կարող հաշվի չառնել»,- կառավարության նիստում ասել է նախարար Արթուր Գրիգորյանը: Վարչապետ Նիկոլ Փաշինյանը հանձնարարել է շարունակել քննարկումները, որպեսզի հնարավոր լինի էլեկտրաէներգիայի սակագինը նվազեցնել բոլորի համար:
Պատգամավորները պատրաստվում են հունիսի 12-ին գումարվելիք նիստին:
Պատգամավորները պատրաստվում են հունիսի 12-ին գումարվելիք նիստին: Ազգային ժողովի հանձնաժողովներում խորհրդարանականները քննարկում են բոլոր այն հարցերը, որոնք պետք է ընդգրկվեն առաջիկա քառօրյայի օրակարգ: Տնտեսական հարցերի մշտական հանձնաժողովի օրակարգում այս անգամ եղել է 2 հարց, Եվրոպական ինտեգրման հարցերի մշտական հանձնաժողովում էլ՝ մեկ:
Նկարիչներն ընդդեմ միության նախագահի
Բողոքի հերթական ալիքը Երևանում. դժգոհողներն այս անգամ նկարիչների միության անդամներն են : Որպես պատճառ նրանք մատնանշում են միության նախագահ Կարեն Աղամյանի չարաշահումներն ու խտրական վերաբերմունքը: Բողոքողների մի մասը պահանջում է կանոնադրության փոփոխություն և նոր վարչության ձևավորում:Ղեկավարներից ոչ ոք նրանց հետ չի հանդիպել: Լրատվամիջոցներին ասել են, որ հանդիպումն անիմաստ են համարում:
ԶՈՒ–ից ՄԻՊ–ին ուղղված բողոքները
Զինվորական բժշկական փորձաքննությունները զորակոչի և պարտադիր ծառայության ընթացքում պատշաճ չեն կատարվում: Բժշկական փաստաթղերի հիմնավորվածությունը նույնպես պատշաճ չէ : Մարդու իրավունքների պաշտպանի գրասենյակը 2017թ-ին առավել շատ բողոքներ ստացել է հենց այս հարցերի վերաբերյալ: Նախորդ տարի ՀՀ Զինված ուժերում արձանագրված բողոքներն ու առաջարկներն ընդգրկվել ՄԻՊ 2017թ-ի տարեկան զեկույցում: Այդ հարցերը քննարկելու համար ՄԻՊ գրասենյակի և Եվրոպայի խորհրդի Հայաստանի գրասենյակի նախաձեռնությամբ այսօր անցկացվել է նաև փորձագիտական խորհրդի ընդլայված նիստ, որին մասնակցել են ԶՈւ խնդիրներով զբաղվող հասարակական կազմակերպությունների ներկայացուցիչներ: