Սասնա ծռեր խմբի ևս երկու անդամ դատարանի դահլիճից այսօր ազատ է արձակվել: Դատարանը բավարարել է Արթուր Մելքոնյանի և Արթուր Սողոմոնյանի խափանման միջոց կալանավորումը փոխելու վերաբերյալ պաշտպանների միջնորդությունը և կալանքը փոխարինել է քաղաքից չբացակայելու ստորագրությամբ:
Տեղի է ունեցել Արևելյան գործընկերության ապագան ալեկոծ ժամանակներում թեմայով միջազգային գիտաժողովը, որի ընթացքում մասնակիցների քննարկման հիմնական թեման եղել է Հայաստանում տեղի ունեցած թավշյա հեղափոխությունը: Մասնակիցները քննարկել են Հայաստան- Եվրամիություն հարաբերությունների խորացման հարցը և փոխել գիտաժողովի ձևաչափի բանաձևը՝ 3+3-ից դարձնելով 4+2: Գիտաժողովի ընթացքում ԱԺ Ծառուկյան խմբակցության պատգամավոր Նաիրա Զոհրաբյանն անդրադարձել է Հայաստանի առջև ծառացած մարտահրավերներին: Պատգամավորը շեշտել է, որ դրանցից մեկը կոռուպցիան է, որը սկսվում է մանկապարտեզից՝ հասնելով բարձրագույն իշխանության օղակներ:
Երկրորդ օրն է, ինչ աշխատանքային այցով Մոսկվայում է ՀՀ վարչապետը : Մինչև ֆուտբոլի աշխարհի գավաթի խաղարկության բացմանը մասնակցելը, Հայաստանի ղեկավարը ՌԴ նախագահ Վլադիմիր Պուտինի հետ երեկվա բանակցությունից հետո, այսօր հանդիպել է նաև ՌԴ կառավարության ղեկավար դմիտրի Մեդվեդևի հետ: Վարչապետի օրակարգը հագեցած է: Օրվա առաջին հատվածում նա այցելել է Ռուսաստանի և Նոր Նախիջևանի թեմի Առաջնորդանիստ Սուրբ Պայծառակերպություն եկեղեցի, այնուհետև մասնակցել մարշալ Համազասպ Բաբաջանյանի կիսանդրու բացման հանդիսավոր արարողությանը:
Հունիսի 14-ը ամբողջ աշխարհը նշում է որպես արյան դոնորի միջազգային օր՝ ի պատիվ 1868 թվականի այդ օրը ծնված ավստրիացի բժիշկ Կարլ Լայնշտեյների: Նա հայտնագործել է մարդու արյան խմբերը: Յոլյանի անվան արյունաբանական կենտրոնում դոնորի օրը նշել են արյունատվությամբ:
Հայաստանի ազգային օլիմպիական կոմիտեի նախագահ Գագիկ Ծառուկյանն ընդունել է բազկամարտի Հայստանի հավաքականին, որը փայլուն ելույթ էր ունեցել Բուլղարիայի մայրաքաղաք Սոֆիայում կայացած Եվրոպայի առաջնությունում: Հին աշխարհի առաջնությունից հայ բազկամարտիկները հայրենիք են բերել 14 մեդալ, որոնցից 7 ոսկի: Եվրոպայի առաջնությունում հաջողության էր հասել նաև Գագիկ Ծառուկյանի որդին, ով արժանացել է բրոնզե պարգևի: