Հայաստանի վարչապետն աշխատանքային այցով եղել է Բրյուսելում: Առաջին պաշտոնական հանդիպումը Նիկոլ Փաշինյանն ունեցել է Եվրոպական խորհրդի նախագահ Շառլ Միշելի հետ: Բելգիայում տարածվող կորոնավիրուսի պատճառով ԵՄ բարձրաստիճան պաշտոնյանի հետ հանդիպումը սկսվել է առանց ձեռքսեղմման: Քննարկվել են Հայաստան-ԵՄ հարաբերությունների զարգացման հետագա քայլերը: Փաշինյանը հանդիպել է նաև Եվրոպական ժողովրդական կուսակցության նախագահ Դոնալդ Տուսկի հետ: Այս անգամ ձեռքսեղմում եղել է, Դոնալդ Տուսկն ասել է, որ Փաշինյանի հետ անվտանգ է զգում և կատակել.« Երբեմն քաղաքական գործիչներն ավելի վտանգավոր են, քան վիրուսը»:

Բռնցքամարտի Հայաստանի հավաքականը վաղը կմեկնի Լոնդոն` մասնակցելու առաջին վարկանիշային մրցաշարին: Ռաֆայել Մեհրաբյանի գլխավորությամբ մրցավայր կմեկնի 10 բռնցքամարտիկ: Ի՞նչ մարզավիճակով ու ի՞նչ ակնկալիքներով են մեր բռնցքամարտիկները մեկնում Լոնդոն, կպատմի Արամ Մանուկյանը:

«Երկրում ավելի շուտ հեղափոխության քարոզարշավ է իրականացվում, քան հանրաքվեի»,- խորհրդարանական ճեպազրույցների ժամանակ հայտարարել է «Բարգավաճ Հայաստան» խմբակցության պատգամավոր Իվետա Տոնոյանը: «Իմ քայլ»-ից Սիսակ Գաբրիելյանը նշել է, որ Հայաստանում քաղաքացիների ճնշող մեծամասնությունն իրազեկված է հանրաքվեի մասին: Նա վստահ է, որ «Այո»-ն հաղթելու է: «Լուսավոր Հայաստան» խմբակցության ղեկավարի համոզմամբ էլ՝ «Այո»-ի հաղթանակից կամ պարտությունից չէ կախված մարդկանց լավ կամ վատ ապրելը: Ճեպազրույցներում չի շրջանցվել նաև Հայաստանի 3-րդ նախագահ Սերժ Սարգսյանի Բրյուսելյան այցը:

ԱԺ-ում տեղի է ունեցել մետաղական հանքարդյունաբերության ոլորտի խնդիրներն ուսումնասիրող քննիչ հանձնաժողովի նիստը, որին մասնակցել է Շրջակա միջավայրի նախարար Էրիկ Գրիգորյանը: Հանձնաժողովականները հանքարդյունաբերության ոլորտի պատասխանատուին հարցեր են ուղղել Հայաստանում գործող հանքերի, բնությանը դրանց հասցրած վնասների և քաղաքացիներից ստացված բողոքների վերաբերյալ: Նիստի օրակարգի զգալի մասը նվիրված է եղել Ամուլսարի խնդրին:

ԵՄ անդամ պետություններից 22-ն արդեն հայտարարել են Հայաստանի և Եվրամիության միջև Համապարփակ և ընդլայնված գործընկերության համաձայնագիրը վավերացնելու մասին: Ընդհանուր առմամբ, գործընթացն ավարտին է մոտենում: Մի քանի օր առաջ Ֆրանսիան ավարտեց համաձայնագրի վավերացումը: Իտալիայում, Իսպանիայում, Պորտուգալիայում, Ավստրիայում և Հունաստանում փաստաթղթի վավերացումից հետո այն ամբողջությամբ ուժ մեջ կմտնի: ԱԳՆ մամուլի խոսնակ Աննա Նաղդալյանը կարևոր է համարել օր առաջ ազատականացման գործընթացի շուրջ երկխոսության մեկնարկը:

Մեկուկես տարվա ընթացքում մեր երկրում ընտանեկան բռնության 3 հազարից ավելի դեպք է գրանցվել: Հիմնականում բռնության են ենթարկվել կանայք: Այս պահին ընտանիքի անդամի հանդեպ բռնություն կիրառելու համար ոստիկանությունում հազարից ավելի մարդ է հաշվառված: Մասնագետների կարծիքով՝ ընտանեկան բռնությունը կանխելու համար նախ պետք է քրեականացնել այն, ապա բարձրացնել մարդկանց իրավագիտակցությունը, որպեսզի նման իրավիճակները հանդուրժելու փոխարեն դիմեն իրավապահներին: Բռնության վերջին աղմկոտ դեպքը արձանագրվեց Գյումրիում: Կինը մահացել էր, աղջիկը հիվանդանոցում է: Թեև երեխայի հարազատները խնամակալությունից հրաժարվել են, բայց կան այլ քաղաքացիներ, որ պատրաստ են դառնալ աղջկա խնամակալը։