Դեռևս սեպտեմբեր ամսին՝ Գյումրու քաղաքապետ Սամվել Բալասանյանի նախընտրական հանդիպման ընթացքում, Գագիկ Ծառուկյանը խոստացել էր Գյումրի քաղաքին 10 աղբատար մեքենա և 10 միավոր գյուղտեխնիկա նվիրել:

Տրված խոստումն արդեն իրականություն է. ԲՀԿ նախագահն անձամբ էր այցելել Գյումրի՝ քաղաքացիների համընդհանուր ուրախությունը կիսելու և նրանց հետ կրկին հանդիպելու նպատակով:

Քաղաքապետ Ս. Բալասանյանի ուղեկցությամբ ԲՀԿ նախագահը ծանոթացավ քաղաքապետարանի աշխատանքային պայմաններին, այնուհետև ուսումնասիրեց նվիրաբերված տեխնիկան, մաղթեց, որ այն ամբողջությամբ ծառայի իր նպատակին՝ թեթևացնելով գյումրեցու առանց այն էլ ծանր ու դժվարին հոգսը:

Այցելության շրջանակներում Գագիկ Ծառուկյանը ջերմ ու անմիջական մթնոլորտում հանդիպեց նաև գյումրեցիների հետ:

«Ձեր հավատն ու վստահությունն ամենաթանկ արժեքներն են, որ ուժ են հաղորդում ինձ, ստիպում առավել պարտավորված զգալ: Երկրաշարժի արհավիրքը վերապրած գյումրեցին այլևս չպետք է լքի հարազատ ծննդավայրը, պետք է պայման ու հնարավորություն ունենա՝ աշխատելու և սեփական ուժերով վերականգնելու հարուստ ավանդույթներ ունեցող քաղաքի դիմագիծը: Թե՛ խորհրդարանի և թե՛ քաղաքապետի ընտրություններն ապացուցեցին, որ Շիրակի մարզում «Բարգավաճ Հայաստան» կուսակցությունը տասնյակ հազարավոր համակիրներ ունի: Սա պարտավորեցնում է առավել մեծ ջանքեր ներդնել՝ ի օգուտ քաղաքի զարգացման ու ժողովրդի բարեկեցության»,-իր խոսքում նշեց ԲՀԿ առաջնորդը:

Հանդիպմանը հաջորդեց այցելություն քաղաքի 7 վերք եկեղեցի. խորհրդանշական մոմավառություն և աղոթք առ Աստված՝ գյումրեցիներին փորձություններից պաշտպանելու և զորավիգ լինելու համար:

Ամիսներ առաջ, ծանոթանալով Գյումրու մարզադպրոցի վատ պայմաններին, Գագիկ Ծառուկյանը հանձնարարել էր անմիջապես սկսել նոր մարզադպրոցի շինարարություն: Աշխատանքները սկսվել էին այս տարվա ապրիլին:

Աշխատանքն առավել արագ ու արդյունավետ ավարտին հասցնելու նպատակով ՀԱՕԿ նախագահը կրկին այցելեց հանրապետության 2-րդ քաղաք՝ կառուցվող նոր մարզադպրոցի ընթացիկ շինարարական աշխատանքներին ծանոթանալու համար:

2013-ի սեպտեմբերին՝ շահագործումից հետո, 6000 քմ տարածք զբաղեցնող մարզական քոլեջն ունենալու է բռնցքամարտի և ծանրամարտի մեկական, ինչպես նաև ըմբշամարտի երկու բարձրակարգ մարզադահլիճ՝ կահավորված բոլոր հարմարություններով: 350 աշակերտ ունեցող մարզադպրոցը կունենա նաև հյուրանոցային համալիր:

Ողջունելով գյումրեցի անվանի մարզիկներին՝ ՀԱՕԿ նախագահ Գագիկ Ծառուկյանը մեկ անգամ ևս նշեց, որ Գյումրին լավագույն ավանդույթներ ունեցող մարզական քաղաք է, և որ մեր հաղթանակների առյուծի բաժինը հենց այս քաղաքի մարզիկներն են ապահովում:

Գյումրեցիներն էլ, իրենց հերթին, Գագիկ Ծառուկյանին խոստացան, որ տարիներ հետո մարզական այս դարբնոցից դուրս կգան աշխարհի ու Եվրոպայի առաջնությունների նոր հաղթողներ, օլիմպիական խաղերի նոր չեմպիոններ:

Կարեն Դեմիրճյանի անվան մարզահամերգային համալիրում մեծ շուքով և հանդիսավորությամբ տոնվեց ուսանողների միջազգային օրը:

«Բարգավաճ Հայաստան» կուսակցությունն ու «Գագիկ Ծառուկյան» բարեգործական հիմնադրամը յուրօրինակ անակնկալների մի ամբողջ շարք մատուցեցին ավելի քան 10-ը հազար երիտասարդների: Ավանդույթի համաձայն՝ տոնին ներկա էր նաև ԲՀԿ նախագահ Գագիկ Ծառուկյանը:

Այս տարի ևս հանրապետության տարբեր բուհերի ավելի քան 250 ուսանող տոնի առթիվ արժանանացավ «Գագիկ Ծառուկյան» բարեգործական հիմնադրամի անվանական կրթաթոշակին՝ 100.000 դրամի չափով:

Շնորհավորելով ուսանողներին՝ ԲՀԿ առաջնորդը կարևորեց նրանց դերը մեր երկրի զարգացման ու պետականության ամրապնդման գործում: 
Սովորել շատ լավ, դառնալ պիտանի մարդ ու արժանի քաղաքացի, ապրել ու արարել հայրենիքում և հայրենիքի համար. Գագիկ Ծառուկյանի հորդորն էր ուսանողներին:

«Ապագան երիտասարդներին է, և ես վստահ եմ, որ այն փայլուն է լինելու: Որակյալ կրթություն, արժանավայել աշխատանք, բարեկեցիկ կյանք. Ձեր իղձերի իրականացման ճանապարհին միշտ լինելու եմ ձեր կողքին, ավելի շատ եմ աջակցելու ձեզ»,-խոստացավ ԲՀԿ նախագահը:

Ինքնատիպ անակնկալ ունեին նաև երիտասարդները. ավելի քան 5000 ուսանողի անունից Գագիկ Ծառուկյանին տրվեց 56 մետր երկարություն ունեցող շնորհակալագիր:

Անակնկալների շքերթը շարունակվեց արդեն մարզահամերգային համալիրի լեփ-լեցուն դահլիճում՝ համերգային աննախադեպ ծրագրով:

Նոյեմբերի 28-ից դեկտեմբերի 7-ը Կարեն Դեմիրճյանի անվան մարզահամերգային համալիրում 71 երկրի 500-ից ավելի մարզիկներ կվիճարկեն բռնցքամարտի երիտասարդների աշխարհի առաջնության չեմպիոնական կոչումները:

Հայաստանի հավաքականի գլխավոր մարզիչ Դերենիկ Ոսկանյանը 10 քաշային կարգերից 7-ում ընտրել էր լավագույններին, իսկ 56կգ, 69կգ և 91կգ-ից բարձր քաշային կարգերում հավաքականի հիմնական կազմի անդամներին որոշելու համար նշանակվեցին սպարինգ մենամարտեր:

Դրանց ընթացքին անձամբ հետևեց ՀԱՕԿ նախագահ Գագիկ Ծառուկյանը:

ՀԱՕԿ նախագահը խոստացավ, որ ազգային հավաքականի մարզաշապիկ կկրեն միայն արժանիները, ովքեր պատրաստ են բարձր պահել մեր երկրի մարզական պատիվը: Հավաքականի գլխավոր մարզիչն էլ հավաստիացրեց, որ մեր երկիրն այս տարի ոսկե մեդալ կնվաճի:

Նոյեմբերի 28-ին տեղի ունեցավ Բռնցքամարտի աշխարհի երիտասարդական առաջնության բացման հանդիսավոր արարողությունը:

Առաջնությանը մասնակցում է 68 երկրի ավելի քան 350 բռնցքամարտիկ: Հայաստանից առաջնությանը 10 բռնցքամարտիկ է մասնակցում: Ի դեպ, համաշխարհային այս ստուգատեսին մասնակցում է նաև Ադրբեջանի հավաքականը:

Բացման հանդիսավոր արարողության ընթացքում ներկաներին ողջունեց Հայաստանի ազգային օլիմպիական կոմիտեի նախագահ Գագիկ Ծառուկյանը. ՀԱՕԿ նախագահն արդար մրցակցություն մաղթեց կաշվե ձեռնոցի երիտասարդ վարպետներին:

Կարեն Դեմիրճյանի անվան մարզահամերգային համալիրում անցկացվող բռնցքամարտի աշխարհի երիտասարդական առաջնությունը կազմակերպվում է Հայաստանի բռնցքամարտի ֆեդերացիայի, Հայաստանի ազգային օլիմպիական կոմիտեի, ինչպես նաև Սպորտի և երիտասարդության հարցերի նախարարության համատեղ ջանքերով:

Դեկտեմբերի 4-ից 6-ը տեղի ունեցավ ԲՀԿ նախագահ Գագիկ Ծառուկյանի գլխավորած խորհրդարանական պատվիրակության այցը Բրյուսել։

Պատվիրակության անդամները մի շարք հանդիպումներ ունեցան Եվրոպական խորհրդարանի, Եվրոպական հանձնաժողովի, Եվրոպական խորհրդարանի խմբակցությունների ղեկավարների, ինչպես նաև հայ համայնքի հետ:

Հանդիպումների շարքը մեկնարկեց Եվրոպական խորհրդարանի փոխնախագահ, Եվրոպական ժողովրդական կուսակցության ներկայացուցիչ Ալեխո Վիդալ Քվադրաս Ռոկայի հետ հանդիպումով:

Ողջունելով եվրոպացի բարձրաստիճան պաշտոնյային՝ ԲՀԿ նախագահ Գագիկ Ծառուկյանը նշեց, որ ԲՀԿ-ն այստեղ է Եվրոպական կուսակցությունների հետ հարաբերությունները խորացնելու նպատակով, քանի որ եվրոպական ինտեգրումը ԲՀԿ օրակարգի գերակայություններից է:

Երևանում ավարտվեց բռնցքամարտի աշխարհի երիտասարդական առաջնությունը: Կարեն Դեմիրճյանի անվան մարզահամերգային համալիրում համաշխարհային ստուգատեսի մեդալներն էին վիճարկում 68 երկրների շուրջ 400 բռնցքամարտիկներ:

Վճռորոշ մենամարտերին տեղում հետևեց նաև Հայաստանի ազգային օլիմպիական կոմիտեի նախագահ Գագիկ Ծառուկյանը:

Բռնցքամարտի աշխարհի երիտասարդական առաջնությունում, 4 հաղթանակ տոնելուց հետո, եզրափակիչ էր դուրս եկել 81կգ քաշային Նիկոլ Հարությունովը: Մեր բռնցքամարտիկը ոսկե մեդալի համար մենամարտում ուժերը չափեց շոտլանդացի Սքոթ Ֆորեստի հետ: Բոլոր երեք ռաունդներում էլ մրցավարները նախապատվությունը տվեցին Նիկոլ Հարությունովին: Ի վերջո, մեր բռնցքամարտիկը 13:9 հաշվով պարտության մատնեց շոտլանդացուն և աշխարհի երիտասարդական առաջնության չեմպիոն հռչակվեց:

Ոսկե մեդալից բացի մեր հավաքականը նաև մեկ բրոնզե մեդալ նվաճեց:Պատվո պատվանդանի երրորդ աստիճանին կանգնեց գերծանր քաշային Նարեկ Մելքոնյանը: Նա այս առաջնությունում զիջեց միայն ապագա չեմպիոն անգլիացի բռնցքամարտիկին: Աշխարհի առաջնության մասնակիցների անունից ԱԻԲԱ-ի նախագահ Չին Կու Վուն շնորհակալություն հայտնեց Հայաստանի բռնցքամարտի ֆեդերացիային և ՀԱՕԿ նախագահին՝ համաշխարհային այս ստուգատեսը բարձր մակարդակով կազմակերպելու համար:

Ուշագրավն այն է, որ հայկական կողմի ընդունելությունից գոհ էին նաև Ադրբեջանի պատվիրակները: Գագիկ Ծառուկյանը համոզված է՝ նմանօրինակ միջոցառումներն աշխարհին ներկայանալու լավագույն միջոցն են: Բռնցքամարտի միջազգային ֆեդերացիայի նախագահը փաստեց՝ Հայաստանը պատրաստ է անցկացնել Եվրոպայի և աշխարհի մեծահասակների առաջնությունները:

Դեռ մայիս ամսին` նախընտրական քարոզարշավի ընթացքում, «Բարգավաճ Հայաստան» կուսակցության նախագահ Գագիկ Ծառուկյանի հետ հանդիպման ժամանակ նուբարաշենցիները համայնքում եկեղեցի կառուցելու հարցում աջակցություն խնդրեցին: Այսօր արդեն կուսակցության առաջնորդը բարձրաստիճան հոգևոր այրերի և տեղի բնակչության հետ մասնակցում է Նուբարաշեն համայնքում եկեղեցու հիմնարկեքի հանդիսավոր արարողությանը: Եկեղեցու 16 հիմնաքարերի օծումը կատարեց Արարատյան հայրապետական թեմի առաջնորդ Տեր Նավասարդ արքեպիսկոպոս Կճոյանը, առաջին հիմնաքարի տեղադրման պատիվն էլ վերապահվեց Գագիկ Ծառուկյանին: Տասնամյակներ շարունակ Նուբարաշեն համայնքը եկեղեցի չի ունեցել: Տեղի բնակիչները ոգևորությամբ ընդունեցին այս պարգևը՝ անկեղծ երախտագիտության խոսքեր հղելով «Բարգավաճ Հայաստան» կուսակցության նախագահին: Հիմնարկեքի հանդիսավոր արարողությունից հետո համայնքի մեծ ու փոքր բնակիչներն, արդեն տոնական սեղանների շուրջ, շնորհավորեցին միմյանց: