«Առաջիկա ամիսներին զինվորականների և մանկավարժների աշխատավարձը կբարձրանա 10 %-ով»,-կառավարության ծրագրի կատարման ընթացքն ու արդյունքները ներկայացնելիս խորհրդարանում հայտարարել է վարչապետ Նիկոլ Փաշինյանը: Կառավարության ղեկավարը նշել է, որ պետական բյուջեի եկամտային մասը կգերակատարվի առնվազն 40 միլիարդ դրամով: Փաշինյանն ընդգծել է, որ Հայաստանում չպիտի լինի աղքատություն և 80 հազար դրամ աշխատավարձ ստացող, կառավարությունն էլ պետք է շարունակի պայքարը ստվերի եւ մենաշնորհների դեմ: Պատգամավորների հետ հարց ու պատասխանի ընթացքում Նիկոլ Փաշինյանը հաստատել է Ալիևի հետ հանդիպում ունենալու փաստը և, Նաիրա Զոհրաբյանի հարցին ի պատասխան, ասել, թե ինչ օրակարգով է ներկայանալու Ադրբեջանի նախագահի հետ Վիեննայում կայանալիք հանդիպմանը:

Հայաստանում է Եվրոպայի խորհրդի խորհրդարանական վեհաժողովի նախագահ Լիլիան Մորի Պասքիեն: Նա այսօր պաշտոնական հանդիպումներ է ունեցել մեր երկրի ղեկավարության հետ: Մորի Պասքիեն վարչապետ Նիկոլ Փաշինյանին ասել է, որ ԵԽԽՎ-ում ուշադիր հետևել և հետևում են Հայաստանում տեղի ունեցող զարգացումներին և ողջունում են քաղաքական փոփոխությունների խաղաղ, ոչ բռնի իրականացումը: ԵԽԽՎ նախագահը նաև եղել է Հայաստանի Խորհրդարանում, ելույթ ունեցել լիագումար նիստում, ապա այցելել Ծիծեռնակաբերդի հուշահամալիր և հարգել Հայոց ցեղասպանության զոհերի հիշատակը:

«Բոլորիդ ճակատներին արյունով գրված է սպանված ոստիկանների անունները»,- «Սասնա ծռեր» զինված խմբի գործով դատական նիստին՝ հարցաքննության ժամանակ, հայտարարել է տուժող ոստիկան Գեղամ Խաչատրյանը: ՊՊԾ գնդի գրավման ժամանակ ոստիկանը զբաղեցրել է գումարտակի հրամանատարի պաշտոնը: Ցուցմունք է տվել նաև ՊՊԾ գնդի դիմաց՝ Խորենացի 25 հասցեում բնակվող, գործով տուժող Սարգիս Գրիգորյանը: Տուժողների ցուցմունքներից հետո դատարանը հրապարակել է հանրապետությունից բացակայող և դատարան չներկայացած, գործով տուժող ճանաչված քաղաքացիների՝ նախաքննության ժամանակ տված ցուցմունքները: Իսկ ահա դատարանի դիմաց բողոքի ցույց անցկացնող «Սասնա ծռեր» խմբի անդամները փակել են ճանապարը՝ սահմանափակելով նաև «Էպիկենտրոնի» նկարահանող խմբի ազատ տեղաշարժվելու իրավունքը, ժամեր շարունակ թույլ չտալով դուրս գալ դատարանի բակից:

Գյումրու դրամատիկականի համար թատրոնի միջազգային օրը յուրօրինակ հաշվետվություն է՝ ամփոփելու կատարած աշխատանքն ու նախանշելու առաջիկա անելիքները: Մեկուկես դարյա պատմություն ունեցող թատրոնում հին ավանդույթները պահպանում են, միաժամանակ նաև նոր շունչ ու ասելիք հաղորդում: Վարդան Աճեմյանի անվան Գյումրու դրամատիկական թատրոնն առայժմ տնօրեն չունի, մրցույթը կանցկացվի ապրիլի վերջին, իսկ մինչև այդ նոր ներկայացման են պատրաստվում: