«Որեւէ ուսմասվար, որ Արարատի մարզպետի բարեկամն է, Ավշարի դպրոցում աշխատանքի չի ընդունվել»,- Խորհրդարանում հայտարարել է Կրթության և գիտության նախարար Արայիկ Հարությունյանը՝ անդադառնալով Ավշարի դպրոցում տիրող իրավիճակին: Ազգային ժողովի կրթության, գիտության,մշակույթի, երիտասարդության ու սպորտի հարցերի հանձնաժողովում այսօր միանգամից մի քանի ոլորտների պատասխանատուներ էին հրավիրվել: Նախարարի պարտականությունները կատարողները ներկայացրել են ոլորտի 2018 թվականի արած-չարածն ու խոսել անելիքների մասին: Քննարկվել են նաև առաջիկա նստաշրջանի օրակարգում ընդգրկվող նախագծերը:

«Բարգավաճ Հայասատան» խմբակցությունը նախաձեռնել է Աշխատանքային օրենսգրքի փոփոխություններ: Գործատուի և աշխատողի շահերը պաշտպանող նախագծերն այսօր ներկայացվել են ԱԺ առողջապահության և սոցիալական հարցերի մշտական հանձնաժողովում: Դրանցից մեկով առաջարկվում է նույնանման վերաբերմունք դրսևորել աշխատանքի վայր չներկայանալու և աշխատանքի վայրում պարտականությունների կատարումից իսպառ հրաժարվելու դեպքերի համար: Մյուս նախագծով առաջարկվում է ընտրովի քաղաքական պաշտոններ զբաղեցնող անձանց աշխատանքային պայմանագրերը գիտամանկավարժական գործունեություն ծավալելու դեպքում ժամկետայինի չվերածել:

«Հայաստանը Ղազախստանի հետ ունի լայնածավալ և կարևոր օրակարգ, բազմաշերտ գործակցություն, որը մեծ կարևորություն և նշանակություն ունի մեր երկրի համար»,- լրագրողների հետ ճեպազրույցում հայտարարել է Արտաքին գործերի նախարարության մամուլի խոսնակ Աննա Նաղդալյանը՝ անդրադառնալով Ղազախստանի նախագահի հրաժարականին: «Մենք բոլոր ուղղություններով գործակցում ենք ինչպես երկկողմ, այնպես էլ բազմակողմ հարթակներում»: Առաջնային են նաև ՀԱՊԿ-ը և ԵԱՏՄ-ն: Նաղդալյանը խոսել է նաև Արցախի հակամարտության կարգավորման գործընթացից, Փաշինյան- Ալիև սպասվող հանդիպումից:

Գրավատների և փոխանակման կետերի խնդիրներն այսօր քննարկվել են Խորհրդարանում: Աշխատանքային քննարկումը նախաձեռնել է Տնտեսական հարցերի մշտական հանձնաժողովը: Ոլորտի ներկայացուցիչները հայտարարել են, որ պետական տուրքի բարձրացման դեպքում բազմաթիվ ընտանիքներ կմնան առանց աշխատանքի, քանի որ չեն կարողանա դիմակայել բանկերի հետ մրցակցությանը: Խնդիրները գույքագրելուց հետո ոլորտի ներկայացուցիչները հանդիպելու են Կենտրոնական բանկի պաշտոնյաներին:

«Սասնա ծռեր» զինված խմբի 10 անդամների գործով դատական նիստի ժամանակ այսօր ցուցմունք են տվել տուժող երեք ոստիկանները: Նրանցից մեկն այդ օրերին հրազենային վնասվածք է ստեցել, երկուսը գույքային պահանջ ունեն խմբի անդամներից: Մեկի ավտոմեքենան է այրվել, մյուս ոստիկանի սենյակից էլ 336 հազար դրամ է կորել, որը պետք է տրվեր «02» շաբաթաթերթին: Նիստին մանրամասները Արթուր Հակոբյանն է ներկայացնում:

Հայկական ատոմակայանն ապահովում է արտադրվող էներգիայի մեկ երրորդը: Տնտեսության զարգացման համար անհրաժեշտ է նոր էներգաբլոկի կառուցումը: 110 օրով ատոմակայանը մասնակի կդադարի գործել նորոգումների պատճառով, իսկ ավելի հեռահար ծրագրերում նախատեսվում է մինչև 600 մեգավատ հզորությամբ միջուկային էնէրգաբլոկի կառուցումը: «Ռոսատոմը» ատոմակայանի 2-րդ էներգաբլոկի շահագործման ժամկետը փորձում է երկարաձգել մինչև 2026 թվականը:

Հայաստանի համայնքների զարգացումը կապված է խոշորացման հետ: Այս համոզմանն է Տարածքային կառավարման և զարգացման նախարարը: Գործընթացում հաշվի է առնվելու քաղաքացիների կարծիքը: Սուրեն Պապիկյանն այսօր խոսել է իր ղեկավարած կառույցի ծրագրերից, ներկայացրել մարտի 23-ի համապետական շաբաթօրյակի մանրամասները: Անդրադառնալով Հայաստանի մի շարք համայնքներում անցկացվող բողոքի ակցիաներին, որոնցով բնակիչները պահանջում են համայնքի ղեկավարների հրաժարականը՝ նախարարը վստահեցրել է՝ քաղաքական հաշվեհարդար չի լինելու։  Նախարարը խոսել է նաև կեղծ աճուրդների մասին, հայտնել՝ Մանվել Գրիգորյանի տարածքներում հայտնաբերվել են 100-ավոր հեկտարների հողատարածքների վկայականներ: