«Սիրո և համերաշխության արդյունքում ձևավորված կառավարությունը չի կարող հաշվեհարդար տեսնել որևէ մեկի նկատմամբ: Այդպիսի մեկնաբանություններն անտրամաբանական են»,-լրագրողների հետ հերթական հանդիպմանը, պատասխանելով հարցին, թե արդյոք Հայաստանի երկրորդ նախագահ Ռոբերտ Քոչարյանի նկատմամբ հաշվեհարդար է իրականացվում, ընդգծել է Նիկոլ Փաշինյանը: Ավելի քան 4 ու կես ժամ տևած ասուլիսի ընթացքում կառավարության ղեկավարը պատասխանել է ներքին և արտաքին քաղաքականությանը վերաբերող հարցերի, դատական համակարգի և ռազմարդյունաբերության ոլորտի բարեփոխումներին, ՀԱՊԿ գլխավոր քարտուղարի նշանակմանը, իր ընտանիքի հասցեին հնչող քննադատություններին, Արցախի հիմնախնդրի կարգավորմանն ու Ալիևի հետ սպասվող հանդիպմանը: «Հայաստանն առաջարկում է Արցախի բանակցային ֆորմատի ոչ թե փոփոխություն, այլ վերականգնում»,-շեշտել է Փաշինյանը՝ ասուլիսի ընթացքում ներկայացնելով արխիվային փաստաթղթեր բանակցային գործընթացից: Կառավարության ղեկավարը խոսել է նաև հանրության ակնկալիքների մասին՝ ընդգծելով, որ Հայաստանում հասունացող դժգոհության ալիք չկա:

Ինչո՞ւ Երևանի քաղաքապետարանը չի վերսկսկում ընդհատված մրցույթը, այն դեպքում, երբ քաղաքին շատ անհրաժեշտ են աղբատար մեքենաները: Ավագանու «Լույս» խմբակցության անդամ Դավիթ Խաժակյանը տնտեսական մրցակցության անհավասար պայմաններից է խոսել: Երևանի ավագանու ԲՀԿ խմբակցության ղեկավար Միքայել Մանրիկյանն էլ առարկել է Խուլ ու համրերի միավորման հարկային պարտավորությունը ներելու օրակարգին: Նա փաստեր է ներկայացրել, որ միավորումն իրեն պատկանող շենքը վարձակալությամբ է տվել ու եկամուտ ունի: «Բարգավաճ Հայաստանի» մյուս ներկայացուցիչներն էլ խոսել են գույքահարկի գանձման չափորոշիների ու արվեստի կառույցներին ընդառաջելու մասին:

Ի՞նչ խնդիրներ կան Հանրապետության հեռավոր գյուղական համայնքների բժշկական սպասարկման ոլորտում: Ուսումնասիրությունները ցույց են տվել, որ խնդիրները շատ են՝ պայմանավորված տարածքների ոչ համաչափ զարգացմամբ: Հեռավոր համայնքներում գործող բժշկական սպասարկման սակավաթիվ կառույցներում էլ անմխիթար վիճակ է: Բացակայում են տարրական պայմանները: Առողջապահության նախարարությունը խնդիրների գույքագրում է անում, վստահեցնում, որ ոլորտը պահում է ուշադրության կենտրոնում:

Զարթոնքում կրկին բողոքի ակցիաներ են: Ցուցարարները պահանջում են 23 տարվա համայնքապետ Պարույր Սարգսյանի հրաժարականը: Զարթոնքցիները համայնքապետին մեղադրում են ապօրինությունների, պաշտոնեական լիազորություններն անցնելու, բռնությունների ու չարաշահումների մեջ: Գյուղացիների խոսքով` Սարգսյանը յուրացրել է գյուղի բյուջեն, գնել է թանկարժեք մեքենա, տնեցիներին ու մերձավորներին ապահովել է բարեկեցիկ աշխատանքով: Պարույր Սարգսյանն էլ նշել է, որ պաշտոնից կհեռանա այն դեպքում, երբ իր մեղավորությունն ապացուցվի: Զարթոնքում է եղել նաև «Էպիկենտրոնի» նկարահանող խումբը:

Սփյուռքի հատուկ հանձնակատարը հաշվետու է լինելու վարչապետին, ունենալու է գրասենյակ: Այն իրականացնելու է գործառույթներ, որոնք անհրաժեշտ են Սփյուռքի հետ կապերն ապահովելու նպատակով: ԱԺ պետաիրավական հարցերի մշտական հանձնաժողովի նիստում, պատասխանելով ԲՀԿ խմբակցության պատգամավոր Գևորգ Պետրոսյանի հարցին, նշել է Արդարադատության նախարարը: Արտակ Զեյնալյանը խորհրդարան էր գնացել  կառավարության 2018 թվականի ծրագիրը ներկայացնելու նպատակով: Նիստում ավելի բուռն  քննարկել են կառավարության ծրագրում ամրագրված  «երջանիկ քաղաքացի» հասկացությունը: Պատգամավորներն  ու կառավարության անդամները փորձել են գտնել երջանկության  բանաձևը: