Մեծ Բրիտանիան սատարում է Արցախի հակամարտության խաղաղ կարգավորման գործընթացին,- այսօր Հայաստանի խորհրդարանում հայտարարել է Միացյալ Թագավորության արտաքին գործերի եւ համագործակցության նախարարության Եվրոպայի եւ Ամերիկաների նախարար Սըր Ալան Դանքընը: Նա խուսափողական ձևակերպումներով անդրադարձել է նաև Հայոց Ցեղասպանությունը չճանաչելու Բրիտանիայի դիրքորոշմանը և պատասխանել պատգամավոր Նաիրա Զոհրաբյանի հարցին, թե արդյո՞ք Մեծ Բրիտանիայի կառավարությունն ու Խորհրդարանը հետամուտ են լինելու պատասխանատվության ենթարկելու անգլիացի այն պաշտոնյաներին, որոնք ներգրվված են եղել Ադրբեջանի նախաձեռնած կոռուպցիոն սկանդալում:

Թեև Դավիթաշեն վարչական շրջանում գտնվող օլիմպիական ավանն արդեն մի քանի ամիս շարունակ գտնվում է հայ մարզիկների տրամադրության տակ ու տարբեր մարզաձևերի ներկայացուցիչներ իրենց ուսումնամարզական հավաքներն անցկացնում են աշխարհում նմանը չունեցող այդ կառույցում, բայց օլիմպիական ավանի նոր մասնաշենքի պաշտոնական բացումը կայացել է երեկ, որին ՀԱՕԿ նախագահ Գագիկ Ծառուկյանի հրավերով մասնակցել է նաև Ազգային օլիմպիական կոմիտեների ասոցիացիայի նախագահ, Ասիայի օլիմպիական կոմիտեի նախագահ շեյխ Ահմեդ Ալ Ֆահադ Ալ Սաբահը: