Հայաստանի ազգային օլիմպիական կոմիտեի հովանու ներքո եւ անձամբ Գագիկ Ծառուկյանի աջակցության շնորհիվ Ճապոնիայից Երեւան ժամանած կարատեի, ձյուդոյի մասնագետները հանդես են եկել ցուցադրական ելույթներով։ Փառատոնի ժամանակ հրավիրված մասնագետները վարպետության դասեր են անցկացրել հայ մարզիչների հետ։

Շատ շուտով Հայաստանում կաշխատի առաջին արեւային կայանը: Այն կես մեգավատանոց կայան է: Էներգետիկայի եւ բնական պաշարների փոխնախարար Հայկ Հարությունյանն Էպիկենտրոնին պատմել է Էներգետիկայի եւ բնական պաշարների նախարարության ապագա անելիքներն արեւային էներգետիկայի ոլորտում: Նախարարությունը 11 լիցենզիա է տրամադրել մինչեւ 1 մեգավատ հզորությամբ արեւային ֆոտովոլտային էլեկտրակայանի կառուցման համար:

Ազգային ժողովի Եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը ասել է, որ Եվրոպայի Խորհրդի Խորհրդարանական Վեհաժողովի առաջիկա նիստին պատրաստվում են հանդես գալ կոշտ հայտարարությամբ: Նաիրա Զոհրաբյանը վստահեցրել է, որ Ադրբեջանական լվացքատան բացահայտման շնորհիվ դեռ շատ հեղինակավոր մարդկանց անուններ են հնչելու:

Երևանում այսօր մեկնարկել է Հայաստան-Սփյուռք վեցերորդ համահայկական համաժողովը: Այն կրում է «Փոխադարձ վստահություն, միասնականություն և պատասխանատվություն» խորագիրը: Սփյուռքի նախարար Հրանուշ Հակոբյանը համաժողովը միասնության առհավատչյա է որակել: Միջոցառմանը մասնակցում են ավելի քան 1800 մարդ 71 երկրից: Մասնակիցների 35 տոկոսից ավելին կանայք են, մոտ 20 տոկոսը կազմում են երիտասարդները: Մեծ թիվ են կազմում գործարարները, մտավորականները, 90-ից ավելին՝ խմբագիրներ, լրագրողներ են: Համաժողովին մասնակցում են հարյուրավոր համահայկական կառույցների ղեկավարներ, համայնքային կազմակերպությունների նախագահներ, ատենապետներ: Մեծ պատվիրակություններ են ժամանել ՌԴ-ից, ԱՄՆ-ից, Արգենտինայից, Կանադայից, Ֆրանսիայից, Լիբանանից, Սիրիայից, Իրանից, Թուրքիայից, Վրաստանից: