Տոները մոտենում են, քաղաքացիներն էլ՝ նախապատրաստվում Ամանորյա գնումներին: Կա՞ արդյոք այս պահին շուկայում գնաճ, թե ոչ: Մեր նկարահանող խումբը շրջել է քաղաքում, հարցուփորձ արել թե՛ սպառողներին, թե՛ վաճառասեղանի հետևում կանգնածներին: Եթե մրգի շուկայում գների նվազում կա, ապա մսի ու ձվի դեպքում՝ գնաճ:
Խորհրդարանի արտահերթ ընտրությունից հետո գործադիրն այսօր առաջին նիստն է անցկացրել: Նիկոլ Փաշինյանը ներկայացրել է կառավարության առաջիկա 5 տարիների առաջնահերթությունները: Ներդրումների խրախուսումից մինչև ռազմարդյունաբերական համալիրի զարգացում, զինված ուժերի մարտունակության բարձրացում, կրթության և առողջապահության ոլորտների բարեփոխում: Վարչապետի պաշտոնակատարը նշել է, որ առաջիկա 5 տարիներին զինված ուժերի զարգացման նպատակով պետք է ներդնել մոտ 2.5 մլրդ դոլար: «Այդ միջոցները գտնելու ուղղությամբ մենք պետք է լրջագույն աշխատանք տանենք: Խոսքը հավելյալ միջոցների մասին է, որոնց մի մասը պետք է ուղղված լինի նաև զինծառայողների սոցիալական վիճակի բարելավմանը»,-շեշտել է Փաշինյանը: Նա անդրադարձել է նաև պետական կառավարման համակարգի օպտիմալացմանը՝ կոռուպցիայի ամենամեծ օջախները համարելով ԾԻԳ-երն ու ՊՈԱԿ-ները:
Կոտայքի մարզի նոր Գեղի համայնքում կրքերը չեն հանդարտվում: Բնակիչները պահանջում են համայնքի ղեկավարի պաշտոնակատարի հրաժարականը: Նրանց խոսքով՝ Վարդան Պապյանը չի կարողանում ղեկավարել գյուղը և պարբերաբար բնակիչների միջև վեճ է հրահրում: Մինչև գյուղացիները դժգոհում են, գյուղապետն արդեն քանի օր է, աշխատանքի չի գնում : Իմ գործընկեր Իզաբելլա Հովհաննիսյանն է եղել համայնքում, լսել բնակիչների դժգոհություններն ու գյուղապետի մեկնաբանությունը:
Վերաքննիչ դատարանը վերացրել է մարտի 1-ի գործով քննչական խմբի նախկին ղեկավար Վահագն Հարությունյանի կալանքի որոշումը: Նրան մեղադրանք էր առաջադրվել առանձնապես ծանր հանցագործության վերաբերյալ քրեական գործով ապացույցներ կեղծելը կազմակերպելու համար: Սերժ Սարգսյանի թիկնազորի նախկին պետ Վաչագան Ղազարյանի կալանքն էլ այսօր երկու ամսով երկարաձգվել է: Դատարանը մերժել է գրավի դիմաց ազատ արձակելու՝ նրա պաշտպանների առաջարկը: Հիշեցնենք, Ղազարյանը մեղադրվում է բարձրաստիճան պաշտոնատար անձանց էթիկայի հանձնաժողով ներկայացրած հայտարարագրերում իր դրամական միջոցների իրական չափի մասին հայտարարագրման ենթակա տվյալները թաքցնելու եւ ապօրինի հարստանալու մեջ։
Երևանի Ավան և Նոր Նորք վարչական շրջանների ընդհանուր իրավասության դատարանն այսօր քննել է նախկին փոխվարչապետ Արմեն Գևորգյանին կալանավորելու հարցը: Նրան առաջին անգամ մեղադրանք առաջադրվել էր այս տարվա օգոստոսի 3-ին՝ արդարադատությանը խոչընդոտելու համար, որը միացվել էր Մարտի 1-ի գործին: Գևորգյանի նկատմամբ խափանման միջոց էր ընտրվել ստորագրությունը՝ չհեռանալու մասին: Երեկ հայտնի դարձավ, որ նրան վերագրվող մեղադրանքները լրացվել են 3 նոր հոդվածով, որոնք վերաբերում են սահմանադրական կարգի տապալմանն օժանդակելուն, առանձնապես խոշոր չափերով կաշառք վերցնելուն և հանցավոր ճանապարհով ստացված գույքն օրինականացնելուն: Արմեն Գևորգյանը չի ընդունում իրեն վերագրվող ծանր մեղադրանքները: Դատարանը նրան կալանավորելու միջնորդության վերաբերյալ որոշումը կհրապարակի վաղը:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv