Ավագանու 54 անդամների մասնակցությամբ այսօր Երևանի ավագանին սկսել է արտահերթ նիստը: Նիստի սկզբում Երևանի նորընտիր քաղաքապետ Հայկ Մարությանն ասել է, որ հաստատվել են խմբակցությունների ղեկավարների անունները: Երևանի ավագանու «Իմ քայլը» խմբակցությունը կղեկավարի Սուրեն Էրամջյանը, ԲՀԿ խմբակցությունը՝ Արման Աբովյանը, իսկ «Լույս» խմբակցությունը՝ Դավիթ Խաժակյանը: Նիստի ժամանակ հայտարարվել է, որ ավագանու որոշ անդամներ հրաժարվել են մանդատներից: Ավագանին այսօր նաև չորս փոխքաղաքապետ է նշանակել:

Ազգային ժողովի այսօրվա արտահերթ նիստում Ընտրական օրենսգրքի փոփոխությունների փաթեթը կրկին չստացավ բավարար ձայներ: Այն ընդունելու համար պակասել է ընդամենը մեկ ձայն: Օրենսդրական փաթեթին կողմ է քվեարկել 62, դեմ՝ 2 պատգամավոր, ձեռնպահ չի եղել: Արտահերթը նախաձեռնած «Ծառուկյան» և «Ելք» խմբակցություններն ամբողջական կազմով ներկա են եղել նիստին և քվեարկել են կողմ: Ինչպես նախորդ անգամ , ՀՀԿ խմբակցության մեծամասնությունն այսօր ևս բոյկոտել է Օրենսգրքի քվեարկությունը և չի մասնակցել նիստին: Դաշնակցությունից էլ բացակայել է երկու պատգամավոր: Նշենք, որ նախագծի ընդունման համար անհրաժեշտ էր առնվազն 63 ձայն:

«Դատաիրավական ոլորտում տարիների ընթացքում բազմաթիվ խնդիրներ են կուտակվել»,-ասել է բարձրագույն դատական խորհրդի նախագահ Գագիկ Հարությունյանը: Նա ամփոփել է իր ղեկավարած կառույցի ուսումնասիրությունները, ներկայացրել հայտնաբերված խնդիրները: Ըստ նրա՝ ոլորտում որակական լուրջ փոփոխություններ պետք է կատարվեն: ԲԴԽ նախագահը նաև խոսել է այդ փոփոխությունների իրականացման ուղիների և առաջիկա անելիքների մասին:

Ինչու՞ է առողջապահության նախարարի պաշտոնակատար Արսեն Թորոսյանը բանակում 10-ը ամիս ծառայել և ինչու՞ են բուժhաստատությունների տնօրեններ նշանակվում նրա ընկերները: Առողջապահության նախարարի պաշտոնակատար Արսեն Թորոսյանը պարզաբանել է իր մասին մամուլի վերջին հրապարակումները, որակել դրանք ապատեղեկատվություն, կեղծիք և պատվեր: «Այսօր ստերի բացահայտման օր է»,- Առողջապահության նախարարությունում հրավիրած ասուլիսի ժամանակ ասել է Արսեն Թորոսյանը: Նախարարի պաշտոնակատարն անդրադարձել է նաև վերջին օրերին տարբեր բժշկական կենտրոններում 3 երեխաների մահացության դեպքերին:

«Բարգավաճ Հայաստան» կուսակցության նախագահ Գագիկ Ծառուկյանը խորհրդարանում պատասխանել է լրագրողների հարցերին: ԲՀԿ առաջնորդը հայտարարել է , որ խորհրդարանի արտահերթ ընտրություններում ինքն է գլխավորելու «Բարգավաճ Հայաստան» կուսակցության համամասնական ցուցակը: Գագիկ Ծառուկյանը խոսել է նաև Ընտրական Օրենսգրքի փոփոխությունների, ընտրություններում ԲՀԿ-ի հաղթելու շանսերի մասին, անդրադարձել նաև ներքաղաքական օրակարգի բազմաթիվ հարցերի:

ԲՀԿ նախագահ Գագիկ Ծառուկյանի հրավերով եռօրյա այցով Հայաստանում էին ավելի քան 20 երկրի բարձրաստիճան պաշտոնյաներ, բիզնես ոլորտի ներկայացուցիչներ , առևտրի և արդյունաբերական պալատների նախագահներ և միջազգային խոշոր ընկերությունների ղեկավարներ: Նրանք այստեղ էին մասնակցելու «Ներդրումներ և առևտուր» խորագրով կլոր սեղան- համաժողովին: Մեր երկրի ներդրումային միջավայրը և բիզնես ոլորտի առանձնահատկություններն ուսումնասիրելուց հետո նրանք ծանոթացել են նաև հոգևոր, մշակութային ու մարզական Հայաստանին, եղել տարբեր վայրերում: Արտասահմանցի հյուրերի հետ շրջել է նաև Էպիկենտրոնի նկարահանող խումբը: