«Իմ քայլը» խմբակցությունը, ինչպես և հայտարարել էր, առաջին ընթերցմամբ չընդունեց ՍԴ նախագահի և դատավորների պաշտոնավարումը դադարեցնելու մասին իր ներկայացրած նախագիծը: Այն չընդունվեց 36 դեմ և 87 ձեռնպահ ձայներով: Դեմ են քվեարկել ընդդիմադիր «Բարգավաճ Հայաստան» և «Լուսավոր Հայաստան» խմբակցությունները: Այնուհետև խորհրդարանն անցել է Սահմանադրական փոփոխությունների նախագիծը հանրաքվեի դնելու հարցին, որն ընդունվել է 88 կողմ, 15 դեմ ձայներով: «Լուսավոր Հայաստան»-ը քվեարկել է դեմ, իսկ «Բարգավաճ Հայաստան»-ը քվեարկությանը չի մասնակցել: Իսկ մինչև այդ բուռն քննարկումներից հետո օրվա ավարտին խորհրդարանում է եղել վարչապետը: Նիկոլ Փաշինյանը հանդես է եկել արտահերթ ելույթով:
«Իմ քայլը» առաջին ընթերցմամբ չի ընդունի ՍԴ նախագահի և դատավորների պաշտոնավարումը դադարեցնելու մասին իր նախագիծը: Խմբակցությունն առաջարկելու է հարցը դնել համաժողովրդական հանրաքվեի: «Սա, ուղղակի, ուղիղ ժողովրդավարության կիրառում է, մեր քաղաքական ուժի համոզմունքը»,- հայտարարել է նախագծի հիմնական զեկուցող Վահագն Հովակիմյանը: Մինչև այդ ԱԺ-ի խորհրդում 4 անգամ հետաձգվելուց հետո հրավիրված արտահերթ նիստը դեռ չսկսված ավարտվել է: Արարատ Միրզոյանը հայտնել է, որ հեղինակն առավոտյան հետ է կանչել նախագծերը: Պատճառն, ըստ ԱԺ նախագահի, եղել է տեխնիկական: Մոտ մեկ ժամ անց նիստը սկսվել է և կրկին ընդհատվել, քանի որ «Բարգավաճ Հայաստան»-ը վերցրել է 20 րոպե ընդմիջում:
«Սա անձնական վիրավորանք է իմ, Հայաստանի ժողովրդի, 2018-ին տեղի ունեցած թավշյա հեղափոխության արժեքների հասցեին»,- կառավարության նիստի սկզբում հայտարարել է վարչապետը՝ անդրադառնալով Քաղաքաշինության կոմիտեի նախագահ Վահագն Վերմիշյանի ձերբակալությանը: Ըստ Նիկոլ Փաշինյանի՝ նման վիրավորանք հասցրած անձինք պետք է ենթարկվեն խստագույն պատասխանատվության: Իսկ կառավարության նիստի օրակարգում էր համայնքների խոշորացման հարցը: «Իշխանությունը տևական ժամանակ դադարեցրել էր գործընթացը, սակայն հիմա որոշել է շարունակել»,- ասել է վարչապետը:
«Ես այն մարդն եմ, որը պայքարելու է նրա դեմ, որ հանկարծ վերադարձ անցյալին չլինի»,- տպագիր լրատվամիջոցների խմբագիրների հետ հանդիպմանը հայտարարել է ԱԱԾ նախկին տնօրեն Վանեցյանը, որը նոր քաղաքական ուժ է ստեղծում: Վանեցյանը մի շարք ուշագրավ հայտարարություններ է արել ներքաղաքական հարցերի վերաբերյալ: Մասնավորապես ասել է, որ «Մարտի 1»-ի գործի այսօրվա քննությունը չի նպաստում 10 զոհերի սպանությունների բացահայտմանը և ավելացրել՝ ճիշտ կլիներ,որ Ռոբերտ Քոչարյանի խափանման միջոցը վերանայվեր: Լրագրողները նաև հետաքրքրվել են՝ ԱԱԾ տնօրեն աշխատած շրջանում Նիկոլ Փաշինյանից հանձնարարականներ եղե՞լ են կոնկրետ քաղաքական ընդդիմախոսների վերաբերյալ:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv