Արմավիր քրեակատարողական հիմնարկի 20 դատապարտյալ  այսօր անժամկետ հացադուլ են հայտարարել: Նրանք օրեր առաջ մի քանի լրատվամիջոցով հայտարարություն էին տարածել՝ ցանկանալով կառավարության ուշադրությունը հրավիրել իրենց բարձրաձայնած խնդրի  վրա:  Դատապարտյալները հայտարարության մեջ խնդրել էին հանդիպում   վարչապետի ներկայացուցչի հետ  և որ ամենակարևորն է՝  կազմակերպել քննարկում համաներման հարցի վերաբերյալ, այլապես հացադուլ կհայտարարեն:   Դատապարտյալներն այսօր զանգահարել են Էպիկենտրոն՝  խնդրելով բարձրաձայնել իրենց  մտահոգող խնդիրը: Նրանք հայտնել են , որ ցանկանում են հանդիպել ԱԺ Ծառուկյան խմբակցության պատգամավոր Նաիրա Զոհրաբյանի հետ, ով պարբերաբար ԱԺ-ում բարձացնում է համաներման հարցը: VIDEO ARTUR

Աղմկահարույց զարգացում՝ Սասնա Ծռերի գործով: Այսօր շարունակված դատական նիստում Պավել Մանուկյանը հայտարարել է, որ ՊՊԾ գնդում ձեռքից վիրավորված, ապա հիվանդանոցում մահացած ոստիկանի դեմ պատահական կրակոցի հեղինակը ոչ թե Արմեն Բիլյանն է, այլ Էդվարդ Գրիգորյանը: Իսկ ահա ՊՊԾ-ում տեղադրված բանկոմատի բացելու հեղինակը, ըստ Մանուկյանի՝ կրկին ոչ թե Արմեն Բիլյանն է, այլ Մխիթար Ավետիսյանը: Էդվարդ Գրիգորյանը և Մխիթար Ավետիսյանը դատարանի որոշմամբ ազատության մեջ են, իսկ Արմեն Բիլյանը գտնվում է կալանքի տակ: Լրագրողների հետ զրույցում Էդվարդ Գրիգորյանն ու Մխիթար Ավետիսյանն ասել են, որ Պավել Մանուկյանը սխալ ինֆորմացիայի է տիրապետում, իսկ Վարուժան Ավետիսյանը դատարանի դահլիճում հայտարարել է, որ Պավել Մանուկյանի հայտարարությունը ընդհանուր խմբի հետ համաձայնեցված չէ և ընդհանուր տեսակետ չի արտահայտում:

Պատերազմից փրկված մոտ 9000 սիրիահայերի համար կբարելավվի առողջապահական և սոցիալական ծառայությունների հասանելիությունը: Ազդարարվել է Սիրիահայերի և տեղացիների դիմակայունության բարձրացում ծրագրի սկիզբը: Այս տարվանից մինչև 2021 թվականը, IRIS ծրագիրն իր ներդրումը կունենա ինտեգրացիայի քաղաքականության մեջ: Այն ուղղված է Հայաստանում սիրիահայերի արժանապատիվ կյանքի ապահովմանը: Ծրագրի իրականացման համար Եվրամիությունը հատկացրել է 3 միլիոն եվրո:

Տնտեսության  ճիշտ կառավարման մոդելի  և վստահության  դեպքում Սինգապուրյան  հրաշքը կարող է իրատեսական լինել նաև Հայաստանում:  Մշտապես կարևոր համարելով երիտասարդների ներգրավածությունը  քաղաքական, տնտեսական և մյուս ոլորտներում՝           ԲՀԿ առաջնորդ Գագիկ Ծառուկյանի հրավերով   Հայաստան  ժամանած Սինգապուրի հեղինակավոր պատվիրակության անդամները երիտասարդների համար մաստեր կլաս են անցկացրել:  Արդյունավետ կառավարում և առաջնորդություն, Սինգապուրի փորձը խորագրով մաստեր կլասի ժամանակ Սինգապուրից ժամանած փորձագետները, քաղաքական գործիչները,  հայտնի տնտեսագետներն  ու ֆինանսիստները   ներկայացրել են Սինգապուրի արագ զարգացման ճանապարհը և պատասխանել են երիտասարդներին հետաքրքրող հարցերին: Մաստեր կլասին ներկա են եղել նաև ԱԺ Ծառուկյան խմբակցության պատգամավորները: