Ավարտվել է ԱՊՀ մասնակից պետությունների իրավասու մարմինների «Արարատ անտիտեռոր-2019» համատեղ հակաահաբեկչական վարժանքը: Զորավարժությանը մասնակցել են ՀՀ ԱԱԾ սահմանապահ զորքերը, Ոստիկանության, Զինված ուժերի և ԱԻՆ փրկարար ծառայության մոտ 2000 ծառայողներ: Համաձայն վարժանքների սցենարի՝ հանրապետության տարածք ներթափանցած ահաբեկչական խմբավորումները փորձել են հատել երկրի պետական սահմանը: ԱԱԾ-ն ուժային մյուս գերատեսչությունների ստորաբաժանումների հետ վնասազերծել է ահաբեկիչներին: Օպերացիայի լավագույն մասնակիցները պարգևատրվել են:
Այսօր լրանում է Կոմիտաս վարդապետի 150 ամյակը: Վարդապետի թանգարան են այցելել փոխվարչապետ Տիգրան Ավինյանը, Ամենայն հայոց կաթողիկոսը, մշակույթի գործիչներ, քաղաքացիներ: Վեհափառը հոգեհանգստի կարգ է մատուցել: Կենտրոնական բանկն էլ շրջանառության մեջ է դրել Կոմիտասի 150-ամյակին նվիրված արծաթե հուշադրամ:
Կառավարության որոշմամբ՝ Ծաղկաձորի «Գոլդեն Փելես» հյուրանոցը նվիրաբերվել է պետությանը՝ շենք -շինությունների ներսում առկա ամբողջ գույքով: Հյուրանոցը պատկանում է մաքսային պետական կոմիտեի նախկին նախագահ Արմեն Ավետիսյանին: Գործադիրի մեկ այլ որոշմամբ՝ հոկտեմբերի 1-ից կբարձրանա փրկարարների և անտառապահների աշխատավարձը: Նիստից հետո լրագրողների հարցերին են պատասխանել Առողջապահության նախարարն ու Անվտանգության խորհրդի քարտուղարը: Արմեն Գրիգորյանն անդրադարձել է Արթուր Վանեցյանի և Վալերիյ Օսիպյանի հրաժարականներին:
Ամենայն հայոց կաթողիկոսն անդրադարձել է Միացյալ Նահանգներում վարչապետ Նիկոլ Փաշինյանի այն հայտարարությանը, թե իրենց ոտքի տակ քանդող եկեղեցականներին ծնկի են բերելու: Գարեգին 2-րդը պատասխանել է «Էպիկենտրոն»-ի հարցին, թե արդյո՞ք պատրաստվում է այդ հայտարարության վերաբերյալ պարզաբանում պահանջել վարչապետից: Կաթողիկոսը մտահոգիչ է համարել վերջին շրջանի ներքաղաքական զարգացումները:
Այսօր տրվել է «Տեղական ինքնակառավարման համակարգի բարելավում Հայաստանում» ծրագրի երկրորդ փուլի մեկնարկը: Ծրագրի միջոցով Կառավարությունը կարողանալու է ապակենտրոնացնել հանրային ծառայությունները կենտրոնից մարզեր՝ ապահովելով անհրաժեշտ ենթակառուցվածները: Միջոցառմանը ներկա Տարածքային կառավարման և ենթակառուցվածքների նախարարը հայտնել է, որ Կառավարությունը մտադիր է շարունակել համայնքների խոշորացման ծրագիրը: Սուրեն Պապիկյանի խոսքով՝ կառավարությունն այժմ սահմանում է մեխանիզմներ, որ համայնքների միավորումը ստիպողաբար չլինի: Պապիկյանն անդրադարձել է նաև Վայոց Ձորի մարզպետի հրաժարականի հայտարարությանն ու դրան նախորդած աղմկոտ միջադեպին:
«Ադրբեջանի իշխանությունները մտադրություն չունեն լուծել Լեռնային Ղարաբաղի հակամարտությունը: Նրանք ցանկանում են հաղթել Լեռնային Ղարաբաղի ժողովրդին: Նրանց նպատակը վրեժխնդրությունն է»,- Նյու Յորքում ՄԱԿ-ի Գլխավոր ասամբլեայի 74-րդ նստաշրջանի իր ելույթում հայտարարել է Հայաստանի Վարչապետ Նիկոլ Փաշինյանը: «Մեր հակառակորդները ցանկանում են հետ բերել Լեռնային Ղարաբաղի խորհրդային ժամանակների կարգավիճակը: Բայց դա ապարդյուն ջանք է»,- նշել է Փաշինյանը՝ կոչ անելով իր գործընկերոջը՝ Ադրբեջանի նախագահ Իլհամ Ալիևին պայմաններ ստեղծել խաղաղ գործընթացում առաջընթացի համար: «Լեռնային Ղարաբաղի հակամարտության ցանկացած լուծում պետք է ընդունելի լինի Հայաստանի ժողովրդի, Լեռնային Ղարաբաղի ժողովրդի և Ադրբեջանի ժողովրդի համար»,- աշխարհի ամենահեղինակավոր ամբիոնից հայտարարել է Հայաստանի վարչապետը: Նիկոլ Փաշինյանի՝ 27 րոպե տևած ելույթի կարևորագույն ուղերձներն առանձնացրել է Վարդան Հովսեփյանը:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv