«Ադրբեջանի զինված ուժերը դիմում են պատերազմի վարման արգելված միջոցների»: Այս մասին Ստեփանակերտում հայտարարել է «Մեկ ազատ աշխարհ» միջազգային իրավապաշտպան կազմակերպության ղեկավար Մաջեդ Էլ Շաֆին: Արցախի դեմ Ադրբեջանի սանձազերծած ագրեսիային անդրաձարձել է նաև Իսլանդիայի խորհրդարանի պատգամավոր Բիրգիր Թորարինսոնը: Նրանք միջազգային կառույցներին ու հանրությանը կոչ են արել չռել և գործել, քանի դեռ ուշ չէ:

Այսօր Երևանում ժամանակավորապես բնակվող արցախցի փոքրիկների օրը բավական հագեցած և ուրախ է անցել: Նրանք Մետրոպոլիտենի վարչական շենքում տիկնիկային ներկայացում են դիտել, հետո ճանաչողական շրջայց կատարել մետրոյի կայարաններում, լսել մետրոպոլիտենի պատմությունը:Միջոցառման կազմակերպիչները կարևոր են համարում,որ պատերազմի ժամանակ երեխաները չկորցնեն իրենց մանկությունն ու ժպիտը:

Պարգևավճարներ պետք է լինեն,հայտարարել է ՊԵԿ նախագահ Էդուարդ Հովհաննիսյանը ԱԺ-ում տեղի ունեցած բյուջետային քննարկումների ժամանակ: Երկրի գլխավոր հարկահավաքի խոսքով՝ չնայած պատերազմական ու համաճարակային իրավիճակին՝ անցնող տարին դրական է եղել հարկերի հավաքագրման առումով: Էկոնոմիկայի նախարարն էլ նշել է, որ տնտեսական անկումը լինելու է ընդամնեը 6 տոկոս,իսկ գալիք տարի նախատեսվում է 5 տոկոսանոց աճ:Նա նշել է, որ Թուրքական ապրանքների ներմուծման արգելքը գնաճի չի հանգեցնի:

Հայ ցուցարարներին չի բավարարել անգամ Արցախի նկատմամբ Ադրբեջանի ռազմական հանցագործությունների հավանականության մասին ՄԱԿ-ի Մարդու իրավունքների գերագույն հանձնակատարի երեկվա հայտարարությունը: Ակցիայի մասնակիցները մեկ րոպե լռությամբ հարգել են ՄԱԿ-ի հիշատակը:

«Քեզ հետ ենք, Վիեննա»,- այսպես է Հայաստանի վարչապետն արձագանքել երեկ գիշերն Ավստրիայի մայրաքաղաքում տեղի ունեցած ահաբեկությանը,որը խլել է 4 մարդու կյանք,կա 15 վիրավոր:Ավստրիայի կանցլերը երկրում հայտարարել է անվտանգության ամենաբարձր մակարդակը:Իսլամական պետության կողմնակիցները ստանձնել են ահաբեկության պատասխանատվությունը: Սոցցանցերում շրջանառվում է ոչ միայն Թուրքիայի նախագահի հանրահայտ սպառնալիքը եվրոպացիներին, այլև Հայաստանի վարչապետի զգուշացումը Արևմուտքին.«Եթե իրավիճակը ճշգրիտ չգնահատվի,Եվրոպան պետք է Թուրքիային սպասի Վիեննայի մերձակայքում»:

«Իսրայելը միավորել է ուժերը սատանայի հետ». Նիկոլ Փաշինյանը Jerusalem Post-ին տված հարցազրույցում բավականին կտրուկ է արձագանքել Թել Ավիվի կողմից մարդասիրական օգնության առաջարկին: Հայաստանի վարչապետն Իսրայելին մեղադրել է Արցախի հակամարտությունում Ադրբեջանին աջակցելու համար: Փաշինյանի խոսքով՝ հրեական պետությունը վաղ թե ուշ ինքն է տուժելու Թուրքիայի կայսերական հավակնություններից: