«Պետք է սովորենք ապրել կորոնավիրուսի հետ զուգահեռ»,- խորհրդարանում հայտարարել է վարչապետը՝ կարևոր համարելով նոր պայմաններում ապրելու հմտությունների մշակումը: Պատգամավորների հետ հարց-պատասխանի ժամին կորոնավիրուսից բացի վարչապետի կաբինետին հարցեր են ուղղվել վերջին օրերի ամենաաղմկոտ թեմաների մասին: Անդրադառնալով քաղավիացիայի սկանդալին՝ Նիկոլ Փաշինյանը նշել է, որ լուծումը ավիացիայի կոմիտեի կարգավիճակի փոփոխությունն է, որի արդյունքում այն կարող է դառնալ ինքնածախսածածկող ընկերություն, որն իրավունք կունենա նաև շահույթ ստանալու: Փոխվարչապետ Մհեր Գրիգորյանն էլ, պատասխանելով գազի գնի մասին Միքայել Մելքումյանի հարցին, ասել է, որ ստացել է իր նամակի պատասխանը, որում ռուսական «Գազպրոմը» նշել է, որ հարցը պահում է իր ուշադրության ներքո:

Մայր Աթոռ-Հայաստանի իշխանություն երեկ մեկնարկած հեռակա բանավեճը շարունակվել է նաև այսօր: Արձագանքելով Ռոբերտ Քոչարյանի խափանման միջոցի փոփոխության անհրաժեշտության վերաբերյալ Գարեգին Բ-ի հայտարարությանը՝ վարչապետի մամուլի խոսնակն ասել էր.«Կառավարությունը որևէ մեկնաբանություն չունի Վեհափառի ցանկությունների ու հույսերի վերաբերյալ»: Մայր Աթոռի տեղեկատվական համակարգն այսօր հանդես է եկել նոր հայտարարությամբ՝ կոչ անելով չքաղաքականացնել Վեհափառ Հայրապետի դիրքորոշումը:

Կենտրոնական բանկը նվազեցրել է վերաֆինանսավորման տոկոսադրույքը, որպեսզի առևտրային բանկերը կարողանան աջակցել տնտեսության խթանմանը: Գլխավոր դրամատունը պատրաստ է այս ճգնաժամին, ասել է բանկի ֆինանսական կայունության դեպարտամենտի տնօրենը: Անդրանիկ Գրիգորյանի խոսքով՝ դրա վառ օրինակներից են արժույթի շուկայում մեծ տատանումները կանխելու քայլերը, բանկերի կողմից հասարակությանն առաջարկված վարկային արձակուրդը, ինչպես նաև հիփոթեքային վարկերի մարումների՝ կես տարով հետաձգումը:

Արցախի նախագահի ընտրության երկրորդ փուլի նախնական արդյունքներով` 88% ձայնով նախագահ է ընտրվել Արայիկ Հարությունյանը։ Նրա մրցակից Մասիս Մայիլյանի օգտին քվեարկել է 5728 ընտրող կամ 12%-ը: Արցախի Հանրապետության 4-րդ նախագահ Արայիկ Հարությունյանն այսօր հանդես է եկել մամուլի ասուլիսով, խոսել առաջիկա անելիքների մասին: Նա չի բացառել գործակցությունը տարբեր քաղաքական ուժերի հետ, եթե նրանք համաձայն լինեն բանակցել առաջարկվող օրակարգի շուրջ: Այն է՝ սոցիալ-տնտեսական ընդհանուր ծրագիր, ղարաբաղյան հակամարտություն, անվտանգություն, Հայաստանի իշխանության հետ ներդաշնակ աշխատանք:

Քաղաքական մեծամասնությունը երկրորդ ընթերցմամբ դեմ է քվեարկել պատգամավորների համար կալանավորված անձանց անարգել տեսակցելու թույլտվություն սահմանող «Լուսավոր Հայաստան» խմբակցության նախագծին, ինչից հետո դահլիճում թեժ բանավեճ է սկսվել: Էդմոն Մարուքյանին հայտարարվել է նախազգուշացում: Անցնելով օրակարգին՝ պատգամավորները քննարկել են կենսաթոշակների վճարման անկանխիկ եղանակի, արժեթղթերի շուկայի մասին օրենքի փոփոխության մասին նախագծերը: Ընդդիմադիրներն արձանագրել են, որ Հայաստանում բանկային գաղտնիք չկա, իսկ ներդրումային միջավայրը ռիսկային է:

Սոցիալական նշանակության որոշ ապրանքների վրա մաքսատուրքերի կիրառումը ժամանակավորապես կարող է զրոյացվել, երեկ հայտնել էր Ռուսաստանի նախագահ Վլադիմիր Պուտինը: Այս տեսանկյունից մեր կառավարությունն արդեն մշակել է այն ցանկը, որոնց վրա պետք է կիրառվի այդ արտոնությունը: Էկոնոմիկայի փոխնախարար Վարոս Սիմոնյանն ասել է, որ 92 մլն եվրոյի աջակցություն էլ տրամադրելու է Եվրամիությունը՝ կորոնավիրուսի հետևանքով առավել տուժած քաղաքացիներին ու փոքր տնտեսվարողներին աջակցելու նպատակով:

«Գագիկ Ծառուկյան» բարեգործական հիմնադրամը մայրաքաղաք Երևանում ամենօրյա ռեժիմով շարունակում է կորոնավիրուսի դեմ կանխարգելիչ միջոցառումները: Ախտահանման հերթական աշխատանքներն են կատարվել մայրաքաղաքի Ավան, Քանաքեռ-Զեյթուն և Նոր Նորք վարչական շրջաններում:

«Գագիկ Ծառուկյան» բարեգործական հիմնադրամը մայրաքաղաք Երևանում ամենօրյա ռեժիմով շարունակում է կորոնավիրուսի դեմ կանխարգելիչ միջոցառումները: Ախտահանման հերթական աշխատանքներն են կատարվել մայրաքաղաքի Ավան, Քանաքեռ-Զեյթուն և Նոր Նորք վարչական շրջաններում:

«Գագիկ Ծառուկյան» բարեգործական հիմնադրամն առաջին անհրաժեշտության սննդամթերք է հատկացրել Էջմիածին քաղաքի ու հարակից գյուղերի կարիքավոր, բազմազավակ ընտանիքներին, տարեցներին ու հաշմանդամություն ունեցող անձանց: Օգնության խնդրանքով օրեր առաջ ԲՀԿ տարածքային գրասենյակներ էին դիմել տարբեր համայնքների հարյուրավոր քաղաքացիներ: Հիմնադրամի աշխատակիցներն ու ԲՀԿ ուսանողական խորհրդի ներկայացուցիչները մի քանի օր շրջել են համայնքներում և յուրաքանչյուրին իր տան դիմաց փոխանցել սննդամթերքով լի փաթեթները: