Պաշտպանության նախարարը պարզաբանել է Արցախի սահմանը հատած ադրբեջանցի դիվերսանտի մոլորվելու վերաբերյալ երեկ արած հայտարարությունը: Դավիթ Տոնոյանը նշել էր, որ հատուկ ջոկատային դիվերսանտը միգուցե մոլորվել է տեղանքում, որը ճիշտ չի ընկալվել: Նախարարն այսօր Շենգավիթի թիվ 4 զինկոմիսարիատում հետևել է «Զինված ուժերի ծավալումը, հակառակորդի ագրեսիայի դիմագրավումը» թեմայով լայնածավալ ռազմավարական զորավարժության շրջանակում անցկացվող զորահավաքի ընթացքին և բարի ծառայություն մաղթել առաջին կանչով զինկոմիսարիատ ներկայացած քաղաքացիներին:

Նիկոլ Փաշինյանին չեն բավարարում Հայաստանում կոռուպցիայի դեմ պայքարի տեմպերը: Այս մասին Հայաստանի վարչապետը հայտարարել է Նյու Յորքի Սուրբ Վարդան եկեղեցում կայացած հայ համայնքի հետ հանդիպմանը: Նյու Յորքի հայերը Փաշինյանից հետաքրքրվել են, թե ինչու՞ է մեկուկես տարվա ընթացքում քիչ գումար վերադարձվել պետական բյուջե, և ինչու՞ են շատ թալանչիներ մնացել անպատիժ: Նյույորքահայության հետ ավելի քան մեկ ու կես ժամ տևած հանդիպմանը վարչապետը նաև հայտարարել է, թե որն է թավշյա հեղափոխությունից հետո գոյություն ունեցող ամենամեծ մարտահրավերը: