Կենդանաբանական այգու նախկին ու ներկա մի շարք աշխատակիցներ և կենդանասերներ հավաքվել են կառավարության դիմաց՝ պահանջելով այգու տնօրեն Ռուբեն Խաչատրյանի հրաժարականը: Ակտիվիստները նշել են, որ պաշտոնավարման ընթացքում Ռուբեն Խաչատրյանը կենդանաբանական այգին միտումնավոր հասցրել է սնանկացման, կազմակերպել առյուծների ու այլ կենդանիների սպանդ, հովազի մշակված կաշին էլ ապօրինի նվիրել է այլ անձի:
Նիկոլ Փաշինյանը երեկ հանդիպել է նաև Սանկտ Պետերբուրգի հայ համայնքի ներկայացուցիչների հետ: «Հայերը շատ ավելի մեծ հաջողությունների պետք է հասնեն Հայաստանում, որտեղ այժմ ստեղծվել են անսահմանափակ հնարավորություններ»,- հայտարարել է վարչապետը: «Նախորդ տարի Հայաստանը ԵԱՏՄ տարածքում ամենամեծ տնտեսական աճն ապահոված պետությունն է և այս տարվա առաջին եռամսյակի տվյալներով շարունակում է պահպանել այդ դիրքերը»,- ասել է Նիկոլ Փաշինյանը` ավելացնելով, որ Հայաստանի կառավարությանն այլևս հետաքրքիր չեն հեշտ լուծելի խնդիրները, հասարակ տնտեսական սխեմաները: Նրա խոսքով` մենք մեր առաջ ավելի լուրջ խնդիրներ պետք է դնենք և դրանցից ամենակարևորը Հայաստանն ինովացիոն, տեխնոլոգիական երկիր դարձնելն է: