«Հայրենիքի փրկության շարժում»-ն այսօր արժանապատվության հերթական բազմահազարանոց երթն է իրականացրել: Ի թիվս հրաժարական տալու կոչերի՝ ցուցարարները Նիկոլ Փաշինյանին հիշեցրել են, որ նա դեռևս ունի հումանիտար միջանցքով խաղաղ հեռանալու հնարավորություն: Շարժվելով Արաբկիր վարչական շրջանից՝ երթի մասնակիցներն անցել են Երևանի կենտրոնական փողոցներով, մի պահ կանգ առել Հանրապետության հրապարակում և Փաշինյանին կոչ արել պատուհանից նայել ու տեսնել, թե ինչ մեծ թվով մարդիկ են պահանջում իր հեռացումը: Ընդդիմությունը վաղը ևս արժանապատվության երթ է իրականացնելու:

«Հայրենիքի փրկության շարժման» վարչապետի թեկնածու Վազգեն Մանուկյանը հանդիպել է մտավորականների, հասարակական ու քաղաքական գործիչների հետ: Հանդիպման մասնակիցները հետաքրքվել են գործող իշխանությանը հեռացնելու քայլերի, երկիրն այս ծանր վիճակից դուրս բերելու տարբերակների մասին: Վազգեն Մանուկյանը հայտարարել է, որ արտաքին ճակատում ճիշտ քաղաքականություն վարելու դեպքում պատերազմ չէր լինի:

Թեև «Բարգավաճ Հայաստան» և «Լուսավոր Հայաստան» խմբակցությունների պատգամավորները փակագծերն ամբողջությամբ չեն բացել, սակայն կոնկրետ հարցերի շուրջ հնչեցրել են դիտարկումներ: «Իշխանությունը չի կարողանում, ունակ չէ արձագանքել առկա վտանգներին», - ասել է ԲՀԿ խմբակցության քարտուղար Արման աբովյանը: Ընդդիմադիր խմբակցությունները շարունակում են պահանջել Նիկոլ Փաշինյանի հրաժարականը: Վերջինները նաև անդրադարձել են Թուրքիայի և Ադրբեջանի հետ Հայաստանի հարաբերություները սերտացնելու մասին իշխող խմբակցության ներկայացուցիչների թեզերին:

Հանրապետության երկրորդ քաղաքում չեն դադարում Նիկոլ Փաշինյանի հրաժարականի պահանջով ակցիաները: Գյումրեցիներն այսօր փակել են քաղաքի մի քանի փողոցներ՝այդպիսով իրենց բողոքն արտահայտելով նոյեմբերի 9-ին ստորագրված կապիտուլյացիայի մասին եռակողմ հայտարարության դեմ: Ակցիայի մասնակիցները հայտարարել են, որ պայքարելու են այնքան ժամանակ, մինչև Նիկոլ Փաշինյանը հեռանա:

Դեկտեմբերի 19-ին Հայաստանում եռօրյա սուգ կհայտարարվի,այս մասին տեղեկացրել է Նիկոլ Փաշինյանը: Վարչապետն ուղիղ եթերում անդրադարձել է Հադրութի շրջանում Ադրբեջանի սանձազերծած ռազմական ոտնձգություններին, դրանք որակել սադրանք Ռուսաստանի խաղաղապահ առաքելության նկատմամբ: Փաշինյանը նաև ասել է, որ գերիների ու անհայտ կորածների խնդիրն այս տարի չի կարգավորվի, ինքն էլ շարունակելու է կատարել վարչապետի գործառույթները: Անդրադառնալով Սյունիքի և Սևանի նկատմամբ թուրք-ադրբեջանական հավակնություններին՝ վարչապետն ասել է, որ Հայաստանի միջազգայնորեն ճանաչված սահմանները մնացել են և կմնան անձեռնմխելի:

«Մենք պետք է կայացնենք որոշումներ, և դրանք կարող են լինել հարցեր առաջացնող»,- այս մասին երեկ կայացած Անվտանգության խորհրդի արտահերթ նիստում հայտարարել է Նիկոլ Փաշինյանը: Նիստին, ԱԽ անդամներից բացի, մասնակցել են նաև ԱԺ ԲՀԿ խմբակցության քարտուղար Արման Աբովյանը և «Լուսավոր Հայաստան» խմբակցության ղեկավար Էդմոն Մարուքյանը: Վարչապետը խոսել է Արցախի Խծաբերդ և Հին Թաղեր հատվածների վրա Ադրբեջանի հարձակման մասին և ասել, որ հաջորդ իրավիճակը, որի շուրջ կարող է առաջանալ որոշակի լարվածություն, վերաբերում է Կուբաթլու և Զանգելան շրջանների իրավիճակին: