Կառավարության դիմաց այսօր բողոքի ակցիա են անցկացրել հանգստյան օրերին Կասյան–Կոմիտաս խաչմերուկի շուկայում գյուղմթերք վաճառողները: Տարիներ շարունակ գործող շուկայում արգելվել է գյուղմթերք վաճառել: Որպես այլընտրանք առաջարկվել է Հրազդան մարզադաշտի հարակից տարածքը, սակայն գյուղացիները կտրակաապես մերժել են: Մեկ շաբաթ առաջ կառավարությունից խոստացել են երկու օրվա ընթացքում պատասխան տալ, սակայն մինչև այսօր ոչ մի լուր: Ակցիայի մասնակիցները շնորհակալություն են հայտնել Փաշինյանին իրենց արհամարհելու համար և հեռացել: Բողոքի ակցիա են անցկացրել նաև «Լիդիան»-ի նախկին աշխատակիցները, Ամուլսարի հարակից համայքների բնակիչները և Եկմալյան փողոցի նախկին բնակիչները:

Սահմանամերձ Տավուշը հզորանում է: Բերդ քաղաքը շուտով Թումո կենտրոն կունենա: Այդ նպատակով կառավարությունն անհատույց օգտագործման համար Սիմոնյան կրթական հիմնադրամին տարածք է տրամադրել: Գործադիրի հուլիսյան վերջին նիստի օրակարգում սա միակ լավ նորությունը չէ: Վարչապետ Փաշինյանը հայտարարել է, որ կորոնավիրուսի տարածման պիկը հաղթահարել ենք ու շանս ունենք ջարդելու համավարակի ողնաշարը:Վարչապետն այսօր նաև նախարար է նշանակել ու մարզպետ ազատել:

«Կառավարությունը պետք է խոստովանի, որ հիմա ունենք պատերազմի համար ավելի վտանգավոր իրավիճակ, քան երկու տարի առաջ»,-հայկական երեք հեռուստաընկերությունների հետ հարցազրույցում ասել է Հայաստանի երկրորդ նախագահը: Ռոբերտ Քոչարյանի խոսքով՝ այսօր Ադբեջանում կա ոչ միայն ռևանշի ձգտող կառավարություն, այլ նաև ռևանշի ձգտող ժողովուրդ: Հարցազրույցի ընթացքում Հայաստանի 2-րդ նախագահն անդրադարձել է ներքին և արտաքին քաղաքական խնդիրներին, երկրի տնտեսական վիճակին, համավարակի դեմ պայքարին և կառավարության ձախողումներին: Քոչարյանը չի բացառել զանգվածային ճնշումների միջոցով նոր իշխանափոխությունը՝ մինչև հերթական ընտրությունները: