Գագիկ Ծառուկյանի հիմնադրած «Մուլտի Գրուպ» կոնցեռնը և իտալական հայտնի «Իթելիան սթոունվեյր» հոլդինգը՝ «Ceramisia» բրենդով, Հայաստանում հիմնում են սպասքի արտադրություն: «Արտադրված է Հայաստանում՝ իտալական դիզայնով» մակնշմամբ տեսականին կսկսի թողարկվել արդեն ապրիլին: Սկզբում կբացվի 150 աշխատատեղ, կարտադրվեն կերամիկական հումքից պատրաստված, սեղանի ամենօրյա օգտագործման համար անհրաժեշտ բոլոր պարագաները: Առաջին տարում արտադրանքն ամբողջությամբ կարտահանվի Միացյալ Նահանգներ: «Հիմնվելով Գագիկ Ծառուկյանի նկատմամբ ունեցած անձնական վստահության վրա՝ մտադիր ենք Հայաստանում ստեղծել նմանը չունեցող արտադրություն»,- նշել է «Իթելիան սթոունվեյր» հոլդինգի փոխնախագահ Ֆեդերիկո Պոլիդորին: Նա և Գագիկ Ծառուկյանը շրջել են գործարանի տարածքում, քննարկել արտադրության շուտափույթ մեկնարկի հետ կապված հարցեր: