Արտակարգ իրավիճակների նախարարությունում էլ կայացել է տոնական օրվան նվիրված խորհրդակցություն: Նախարար Ֆելիքս Ցոլակյանը շնորհավորել է աշխատակիցներին մասնագիտական օրվա առթիվ, պարգևներ ու կոչումներ շնորհել:

Ազգային ժողովը արտակարգ դրության ռեժիմի ավարտից հետո կարանտին հայտարարելու հնարավորություն տվող օրենք է ընդունել: Առաջին ընթերցմամբ, օրենսդրական փաթեթին կողմ է քվեարկել 80 պատգամավոր: Ավելի ուշ նախագիծն ընդունվել է նաև 2-րդ ընթերցմամբ և ամբողջությամբ: Ընդդիմադիր խմբակցությունների պատգամավորները կոշտ քննադատության են արժանացրել առաջարկվող փոփոխությունները և դեմ քվեարկել նախագծին: Իսկ նիստի մեկնարկին ԱԺ նախագահ Արարատ Միրզոյանը տեղեկացրել է, որ Մանե Թանդիլյանին փոխարինելու է Ստեփան Ստեփանյանը:

ԱԻՆ աշխատակիցներն այսօր նշում են իրենց մասնագիտական օրը: Ամենաբարդ, ծանր ու նույնիսկ զավեշտալի իրավիճակներում աշխատող տղաները արտակարգ պայմաններում էլ նշել են իրենց օրը: «Էպիկենտրոն»-ի նկարահանող խումբը եղել է հրշեջ-փրկարարական ջոկատներից մեկում, որտեղ էլ մեր նկարահանման պահին հրդեհի ահազանգ է ստացվել: Արտակարգ իրավիճակում հայտնված մեր խումբը փրկարարների հետ մասնակցել է հրդեհաշիջման աշխատանքներին:

Ռուսաստան մեկնել ցանկացող քաղաքացիներն այսօր հերթական բողոքի ակցիան են անցկացրել: Այս անգամ նրանք հավաքվել են խորհրդարանի շենքի մոտ: Բողոքավորների հետ է հանդիպել խորհրդարանի ԲՀԿ խմբակցության պատգամավոր Վահե Էնֆիաջյանը, ով խնդրին անդրադարձել է ԱԺ արտահերթ նիստում: ԱԺ փոխնախագահը կառավարության ներկայացուցչին ևս մեկ անգամ հորդորել է անպայման հանդիպել բնակիչների հետ և ներկայացնել տրամաբանված լուծումներ:

Տարածքային կառավարման և ենթակառուցվածքների նախարարությունը հանդես էր եկել որոշ ավտոճանապարհներ մեծ բեռնատարների համար վճարովի դարձնելու նախաձեռնությամբ: Կսահմանվի «ճանապարհային վճար» հասկացություն, իսկ գանձվող գումարները կօգտագործվեն ճանապարհների շինարարության և նորոգման համար: Ի՞նչ հանգամանքներ են հաշվի առնվելու ճանապարհային վճար սահմանելիս. պարզաբանել է տարածքային կառավարման և ենթակառուցվածքների փոխնախարար Արմեն Սիմոնյանը: