Տոկիոյի օլիմպիական խաղերում Հայաստանն այսօր ուներ երկու ներկայացուցիչ՝ մեկ ծանրորդ և մեկ լողորդ: Ծանրամարտի աղջիկների պայքարում Իզաբելա Յալյանը գրավել է 7-րդ տեղը, իսկ Արթուր Բարսեղյանը իր մրցահերթում երկրորդն է եղել,սակայն կիսաեզրափակիչ դուրս չի եկել: Մեր մարզիկների մրցելույթները Տոկիոյից ավելի մանրամասն կներկայացնի Արամ Մանուկյանը: Նա զրուցել է նաև ծանրամարտում մեր «ծանր հրետանու»՝ Սիմոն Մարտիրոսյանի հետ:

Պատերազմի օրերին Շուշիի Սուրբ Ղազանչեցոց տաճարում նրա նվագած «Կռունկը» ալեկոծել էր հայության սրտերը: Բելգիայում ապրող և ստեղծագործող հայ թավջութակահար Սևակ Ավանեսյանը կրկին հայրենիքում է: Սևակը, նրա եղաբայրը՝ ջութակահար Հրաչյան, դաշնակահարուհի Մարիաննա Շիրինյանը և դիրիժոր Վահագն Պապյանը հանդիպել են Երևանում՝ Հայաստանի պետական սիմֆոնիկ նվագախմբի նվագակցությամբ համերգ ունենալու նպատակով:Վերջին փորձին ներկա է գտնվել նաև իմ գործընկեր Մարիամ Ավանեսյանը:

Նուբարաշեն վարչական շրջանի մշակույթի տանը կազմակերպվել է հուշ-երեկո՝ նվիրված 44-օրյա պատերազմի մասնակից Սլավիկ Իշխանյանի ծննդյան 21 ամյակին: Սլավիկն ընկերների հետ ընկել էր շրջափակման մեջ, հաջողել էր դուրս գալ, բայց հետ էր դարձել ծառայակիցներին օգնության և ընկել հերոսի մահով: Հարազատները նրա մահվան բոթը ստացել են 3 ամիս անց:

Ի՞նչ օգնություն են ստացել Հայաստանում ժամանակավորապես ապաստանած արցախցիները և ի՞նչ խնդիրների են բախվել: Աշխատանքի և սոցիալական հարցերի նախարության ներկայացուցչի խոսքով՝ գլխավոր նպատակը մարդկանց բնակարաններով ապահովելն է:Այդ ուղղությամբ աշխատում են Հայաստանի ու Արցախի կառավարությունները:

Տասնամյակների երազանք, որն իրականացավ այսօր: Հայաստանում առաջին անգամ իրականացվել է ոսկրածուծի ալոգեն փոխպատվաստում: Երեխաներից մեկը Նիգերիայից է, մյուսը՝ Կամերունից, նրանք իրենց լավ են զգում: «Յոլյանի անվան արյունաբանական կենտրոնի» մասնագետները ներկայացրել են վիրահատությունների մանրամասներն ու սպասվող նորությունները:

«Հայաստան» և «Պատիվ ունեմ» դաշինքները դեռ չեն քննարկել՝ կմասնակցե՞ն 8-րդ գումարման խորհրդարանում 44-օրյա պատերազմի հանգամանքներն ուսումնասիրող քննիչ հանձնաժողովի աշխատանքներին,թե՞ ոչ: Այդ մտադրության մասին երեկ հայտարարել էր ՔՊ վարչության անդամ Ալեն Սիմոնյանը Նիկոլ Փաշինյանի հետ հանդիպումից հետո: Ընդդիմադիրները համոզված են՝ իշխանությունը կանի ամեն ինչ,որպեսզի օբյեկտիվ քննություն չընթանա:

Պաշտոնական Երևանը հակադարձում է Ադրբեջանի ԱԳ նախարարին՝ շեշտելով, որ նոյեմբերի 9-ի և հունվարի 11-ի հայտարարությունների ամբողջական կատարմանը խոչընդոտում է ոչ թե Հայաստանը,այլ Ադրբեջանը: «Արմենպրես»-ի հարցմանն ի պատասխան՝ ԱԳՆ լրատվության և հանրային դիվանագիտության վարչությունն ընդգծել է,որ Բաքուն խախտել է նոյեմբերի 9-ի հայտարարության 1-ին և 7-րդ կետերը ու մինչ օրս չի կատարել հայտարարության 8-րդ կետը: ԱԳՆ-ն ընդգծել է նաև, որ Ադրբեջանի կողմից ռազմագերիների, պատանդների և պահվող այլ անձանց հայրենադարձման գործընթացի ամբողջական ավարտը կարող է կառուցողական միջավայր ստեղծել: