Հատված ծառերի տեղում նախատեսվում է ընդլայնել նախկինում գործող սրճարանի տարածքը: Ըստ քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ի փոխտնօրենի՝ կառուցվող սրճարանի տարածքում հատված ծառերը չորացած են եղել և ոչ կենսունակ: Դրանց փոխարեն սրճարանի սեփականատերը պարտավորվել է 9 նոր սոսի տնկել: Այդուհանդերձ, բնապահպանները թերահավատորեն են մոտենում քաղաքապետարանի եզրակացությանը: Նրանց խոսքով՝ կանաչ տարածքի տեղում առանց մասնագիտական հրապարակված եզրակացության կառուցապատումը չի կարող արդարացված լինել:

«Կանաչ ապագա» ՀԿ-ի երիտասարդ բնապահպաններն ահազանգում են, որ Սևանի մաքրման համար նախատեսված տեխնիկան չի աշխատում, իսկ լճի ափամերձ հատվածներն ամբողջությամբ ծածկված են փտած ճյուղեով և կենցաղային թափոններով: Ըստ բնապահպանների՝ Սևանի մաքրումը հրատապ խնդիր է, քանի որ եկող տարի ծաղկումն ավելի առատ կարող է լինել: Նրանք նմուշառում են արել ջրից, որպեսզի լաբորատորիայում ստուգեն ու համեմատեն առողջապահության նախարարության հետազոտության հետ: Ի դեպ, այդ ընթացքում «Էպիկենտրոն»-ի տեսախցիկը ֆիքսել է, որ սկանդալի կենտրոնում հայտնված «White Shorja»-ն կրկին մարդաշատ էր:

Թուրք-ադրբեջանական զորավարժությունները սպառնալիք են ներկայացնում ոչ միայն Հայաստանի, այլև ամբողջ տարածաշրջանի համար, «Էպիկենտրոն»-ի հետ զրույցում ասել է ԱԺ «Իմ քայլը» խմբակցության պատգամավոր, ադրբեջանագետ Տաթևիկ Հայրապետյանը: Սրան զուգահեռ Ռուսաստանի ՊՆ-ն նախօրեին հայտնել է Հարավային Կովկասում ռուսական զորավարժությունների մեկնարկի մասին, որն ընդգրկում է 5 տարածաշրջան, այդ թվում՝ նաև Հայաստանը: Տաթևիկ Հայրապետյանն անդրադարձել է նաև  Ադրբեջանի նախագահի այն հայտարարությանը, թե պատրաստ է աղբամանը նետել Նիկոլ Փաշինյանի ներկայացրած 7 կետից բաղկացած պաշտոնական Երևանի դիրքորոշումը: