Ավագանու որոշմամբ` սգո սրահները պետք է տեղեկայված լինեն բնակելի տարածքներից առվազն 70 մետր հեռավորության վրա: Դրանց տեղակայման համար անհրաժեշտ է նաև քաղաքացիների համաձայնությունը:Սակայն որոշ կառուցապատողներ չեն հետևում սահմանված նորմերին: Քաղաքացիների ահազանգով Հասրաթյան 27  հասցեում գտնվող սգո սրահի և դագաղի խանութի տարածք  են այցելել ԱԺ «Ծառուկյան» խմբակցության պատգամավոր, Երևանի ավագանու «Բարգավաճ Հայաստան» կուսակցության ցուցակը գլխավորող Նաիրա Զոհրաբյանն  ու նույն ցուցակի երրորդ համար Արման Աբովյանը: Խնդիրը նրանում է, որ այս հասցեում  կառուցվող սգո սրահը գտնվում է բնակելի տներից  անթույլատրելի  հեռավորության վրա: Իսկ հարևանությամբ գտնվում  է 8 տուն, որոնց երեխաները, ինչպես պատմել են Նաիրա Զոհրաբյանին, արդեն ուրվականների են տեսնում: Բնակիչներն ավելի վաղ դիմել էին Երևանի քաղաքապետարան, որտեղից էլ իրենց հորդորել էին դատարան դիմել:Սակայն, պայմանավորված դատական համակարգի հանդեպ ունեցած անվստահությամբ, քաղաքացիները ոչինչ չէին ձեռնարկել: Այժմ բնակիչները  իրենց ստորագրությունները փոխանցելու են Նաիրա Զոհրաբյանին: Պատգամավորը պատրաստվում է դիմել դատարան: Համապատասխան տեսանյութերը Նաիրա Զոհրաբյանը ներկայացրել է ֆեյսբուքյան էջում:

«Մեր երկրում չպետք է լինեն ծայրահեղ աղքատ քաղաքացիներ ու թոշակառուներ»,- ամփոփելով պաշտոնավարման 100 օրն՝  ասել է աշխատանքի և սոցիալական հարցերի նախարար Մանե Թանդիլյանը: Այսօր շատ թոշակառուներ ստանում են պարենային զամբյուղից՝ այսինքն 25 հազար դրամից մի քանի անգամ ցածր թոշակ: Մանե թանդիլյանը վստահեցրել է՝  մեր երկրում չի լինելու քաղաքացի, որը ստանալու է պարենային զամբյուղից նվազ կենսաթոշակ: Նախարարը ներկայացրել է մայիսի 12-ից օգոստոսի 22-ն ընկած ժամանակահատվածում իր ղեկավարած գերատեսչության  գործունեության հիմնական ուղղությունները:

Վարչապետ Նիկոլ Փաշինյանն անպայման կհանդիպի Ազգային ժողովի նախագահ Արա Բաբլոյանի հետ: «Մեզ համար շատ կարևոր է, որ մեր բոլոր քաղաքացիները, այդ թվում՝ ԱԺ պատգամավորները, այդ թվում՝ մնացած բոլորը, մեր քաղաքական գործունեության բովանդակությունը ճիշտ ընկալեն»,- լրագրողների հետ զրույցում հայտարարել է կառավարության ղեկավարը: Նա կրկին հիշեցրել է՝ ՀՀԿ-ն իր ղեկավարությամբ, շարունակում է ճիշտ չգնահատել իրավիճակը, իսկ ՀՀ երկրորդ նախագահ Ռոբերտ Քոչարյանի՝ քաղաքականություն վերադառնալու վերաբերյալ էլ առաջարկել է հարցնել ժողովրդի կարծիքը:

Պաշտոնավարման 100 օրն է ամփոփել արտակարգ իրավիճակների  նախարար Հրաչյա Ռոստոմյանը, հակիրճ ներկայացրել այս ընթացքում նախարարության կատարած աշխատանքը, ամփոփել իրակացացված ծրագրերի արդյունքները:Կառուցվածքային փոփոխություններ փրկարար ծառայությունում, աղետների, ռիսկերի նվազեցմանն ուղղված աշխատանք,գազալցակայանների ստուգում և խախտումների բացահայտում,  միջազգային գործակցության մակարդակի բարձրացում, հակակրկտային երեք հրթիռային արձակիչ կայանների տեղադրում և ոչ միայն:

Հայաստանի Հանրապետության ոստիկանության պետ Վալերիյ Օսիպյանը ոստիկանության պարեկապահակային ծառայության գնդի գրավման գործով դատավարությանը մասնակցելու հրավեր չի ստացել, սակայն հրավերի դեպքում կաշկանդված չէ և պատրաստ է ներկայանել ու պնդել իր ցուցմունքները: Այս մասին Վալերիյ Օսիպյանն ասել է պաշտոնավարման 100 օրն ամփոփող մամուլի ասուլիսի ընթացքում: Նա մանրամասներ է ներկայացրել «օրենքով գողերի» բնակարաններում կատարված խուզարկություններից՝ տեղեկացնելով, որ 4-ի նկատմամբ քրեական գործ է հարուցված, և դրանք գտնվում են վարույթում: «Օրենքի առաջ բոլորն են հավասար», - հայտարարել է ոստիկանության պետը՝  հավելելով, որ համակարգում չկան կոռուպցիոն դրսևորումներ: