Գրոսմայստեր Լևոն Արոնյանը հաստատել է ամիսներ շարունակ շրջանառվող լուրերը: Աշխարհահռչակ շախմատիստը որոշել է հեռանալ հայրենիքից: Անդրադառնալով որոշման պատճառներին՝ Արոնյանը գրել է, որ 2018-ի հեղափոխությունից հետո շախմատի ասպարեզ են ներխուժել սպորտաձևից բացարձակ անտեղյակ նորաթուխ պետական գործիչներ, որոնք սկսել են ինքնահաստատվել՝ նույնիսկ շանտաժի միջոցով:«Նրանց հաջողվեց պառակտել տարիներով ձևավորված շախմատային համերաշխ ընտանիքը և ոլորտը վերածել քաոսի»,- նշել է Արոնյանը: Համաշխարհային օլիմպիադայի եռակի չեմպիոնին արձագանքել է Մխիթար Հայրապետյանը:
Հայրենիքի փրկության շարժումը շարունակում է փակ պահել Բաղրամյան փողոցը: Այսօր 13:30-ին ընդդիմությունը ԱԺ-ի դիմաց հանրահավաք է անցկացրել՝ հայտարարելով, որ մինչև վերջ կանգնելու է բանակի կողքին: Հանրահավաքին հաջորդել է երթը դեպի նախագահի նստավայր: Քաղաքացիներն Արմեն Սարգսյանից պահանջել են չստորագրել Օնիկ Գասպարյանի ազատման մասին Փաշինյանի որոշումը: Այնուհետև երթի մասնակիցները շարժվել են դեպի կառավարական ամառանոց, ԱԳՆ, գլխավոր դատախազություն և վերջում վերադարձել Բաղրամյան պողոտա, որն այս օրերին վերածվել է ընդդիմության շտաբի:
Առավոտյան ժամը 11-ին նախատեսված Ազգային ժողովի խորհրդի նիստը կրկին տապալվել է: Իշխանականներն այսօր ևս չեն ներկայացել նիստին: Ընդդիմադիրները դա համարել են անհարգալից վերաբերմունք: Նիստում պետք է քննարկվեր «Բարգավաճ Հայաստան» և «Լուսավոր Հայաստան» խմբակցւթյունների՝ ռազմական դրությունը վերացնելու նախաձեռնությունն ու ներքաղաքական հարցեր: Էպիկենտրոնին հաջողվել է պարզել, թե ինչու իշխանականները չեն ներկայացել խորհրդի նիստին: