Արցախի խորհրդարանը պատրաստվում է փոփոխություններ կատարել «Լեզվի մասին» օրենքում: Ըստ այդմ, հայերենի հետ պաշտոնական լեզու կդառնա նաև ռուսերենը: Օրինագիծն արդեն հրապարակվել է Արցախի ԱԺ-ի պաշտոնական կայքում։ «Էպիկենտրոն»-ը զրուցել է նախագծի համահեղինակ Արամ Հարությունյանի հետ, նաև լսել Հայաստանի խորհրդարանականների տեսակետները: «Արցախում կա՛մ պետք է լիներ միայն ադրբեջաներենը, կա՛մ ռուսերենը` հայերենի հետ»,- հայտարարել է Էդմոն Մարուքյանը:

Կառուցապատողների հայկական ասոցիացիայի տարեկան ժողովում մի շարք խնդրահարույց հարցեր են շոշափվել: Երկրակեղևի հաճախակի դարձած ցնցումները սպառնում են հատկապես բազմաբնակարան շենքերի սեյսմակայունությանը: Ոլորտի ներկայացուցիչները շենքերի ամրակայման տարբերակը չեն դիտարկում՝ թանկ լինելու պատճառով: Խնդիրը լուծելու համար նրանք ակնկալում են պետության աջակցությունը:

«Մենք պետք է վերականգնենք Արցախի տարածքային ամբողջականությունը»,- հայտարարել են «Հայահավաք» շարժման հանձնախմբի ներկայացուցիչները: Նրանց նպատակը համայն հայության համախմբումն է մեկ միասնական ազգային գաղափարախոսության շուրջ: Նախաձեռնության անդամները Հայաստանում ճգնաժամը հաղթահարելու գլխավոր նախապայման են հռչակել իշխանափոխությունը և նշել, որ մասնակցելու են փետրվարի 20-ին նախատեսված ընդդիմության հանրահավաքին:

Նիկոլ Փաշինյանն աշխատանքային այցով եղել է Գյումրիում: Շիրակի մարզպետարանում վարչապետը դռնփակ հանդիպում է ունեցել գերեվարված անձանց հարազատների հետ: Վերջինները հանդիպումից հետո չեն պատասխանել լրագրողների հարցերին: Փոխարենը փակ քննարկումից որոշ մանրամասներ է հայտնել «Իմ քայլը» խմբակցության պատգամավոր Նազելի Բաղդասարյանը: Փաշինյանը Գյումրիում նաև խորհրդակցություն է անցկացրել, քննարկվել են մարզի ընթացիկ և առաջիկա ծրագրերը:

Առավոտյան հանրապետության շրջանների մեծ մասում ուժեղ քամիներ էին: Դրանց արագությունն առանձին հատվածներում հասել է 25 մ/վրկ արագության։ Ուժգին քամիներից զերծ չի մնացելնաև Երևանը, ավելին՝ մայրաքաղաքում զգալի վնասներ ու ավերածություններ կան: Մասնավորապես, Չարբախում տանիքներ են պոկվել ու ընկել կայանած մեքենաների վրա, տապալվել են ծառեր: «Էպիկենտրոն»-ի տեսախցիկը շրջել է մայրաքաղաքով, ֆիքսել ուժեղ քամու հասցրած վնասները: