Երիտասարդ սերունդը արցախյան վերջին պատերազմի ընթացքում կենդանի օրինակ դարձավ հայրենիքի հանդեպ սիրո և անձնազոհության: Հավերժի ճամփորդ դարձած նահատակներից մեկի՝ Ազատ Զաքարյանի ծննդյան օրն այսօր նշել են հարազատ Բժշկական համալսարանում: Հիշել ու ոգեկոչել են նաև մեր մյուս հերոսներին:
Բռնցքամարտի Հայաստանի հավաքականը Բուլղարիայի մայրաքաղաք Սոֆիայից վերադարձել է Երևան: Մեր մարզիկները Բուլղարիայից հայրենիք են բերել 4 մեդալ։ 91 կգ քաշային Նարեկ Մանասյանը նվաճել է արծաթե մեդալ։ Եվս երեք մարզիկ՝ 63 կգ քաշային Բենիկ Նիկողոսյանը, 81 կգ քաշային Գոռ Ներսիսյանը և գերծանր քաշային Գուրգեն Հովհաննիսյանը արժանացել են բրոնզե պարգևի։ Մարզչական կազմն արդյունքներից գոհ է: Նրանք այս մրցաշարը դիտարկում են օլիմպիական վարկանիշային մրցաշարերի նախապատրաստական փուլ:
Նախկին փոխվարչապետ Արմեն Գևորգյանի ԿՈՎԻԴ-ի թեստ հանձնելու և դատարան չգալու պատճառով Քոչարյանի և մյուսների գործով նիստը հետաձգվել է: Մեղադրող դատախազը կասկած է հայտնել Գևորգյանի պաշտպանի հիմնավորման վրա և հայտնել իր դժգոհությունը: Նիստին զուգահեռ 2-րդ նախագահի աջակիցներն ակցիա են իրականացրել դատարանի բակում: Նրանք նաև կարճ ժամանակով փակել են Արշակունյաց պողոտան:
Խորհրդարանում մեկնարկել են հերթական նիստերը: Հենց սկզբից թեժ բանավեճ է ծավալվել օրակարգի վերաբերյալ: Ընդդիմադիրները հայտարարել են, որ ներկայացված հարցերը չեն համապատասխանում Հայաստանի առաջ ծառացած մարտահրավերներին: Ռազմագերիների հարցում Ադրբեջանի վարած քաղաքականությունը դատապարտող նախագիծը քննարկվել է դռնփակ: ԱԺ միջանցքների հիմնական թեմաներն էին վարչական ռեսուրսի կիրառմամբ մարդկանց Փաշինյանի հանրահավաքին բերելը, վարչապետի հակասական հայտարարությունները և արտահերթ ընտրությունները:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv