Կա՞ արդյոք փաստաթուղթ, որը հունվարի 11-ին Մոսկվայում պատրաստվում է ստորագրել Նիկոլ Փաշինյանը Ալիևի և Պուտինի հետ հանդիպման ժամանակ: «Արդարադատության նախարարությունում նման պայմանագիր գոյություն չունի»,- այսօր նախարարության դիմաց ցույց անող քաղաքացիներին վստահեցրել է Ռուստամ Բադասյանը: Ակցիայի մասնակիցները, սակայն, նախարարի պատասխանը համոզիչ չեն համարել: «Երկրորդ «նոյեմբերի 9-ը» չենք հանդուրժելու»,- հայտարարել են ցուցարարները՝ խոստանալով, որ մեր երկրի համար նվաստացուցիչ պայմաններով նոր պայմանագիր ստորագրելու դեպքում բողոքի ակցիաները վերսկսվելու են նոր թափով:
Արցախում ծառայող ժամկետային զինվորների ծնողներն այսօր հավաքվել են Վազգեն Սարգսյանի անվան ռազմական ինստիտուտի մոտ: Նրանք դեմ են, որ իրենց որդիները ծառայությունը շարունակեն Արցախում: Ըստ ծնողների՝ տղաներին ստիպում են մեկնել Արցախ: Ժամկետայիններից մեկի հարազատը ցույց է տվել մի տեսանյութ, որտեղ երևում է, թե ինչպես է ռազմական ոստիկանության աշխատողը քաշքշում զինվորին: Այնուամենայնիվ, զինվորներին տեղափոխող ավտոբուսը տարածքից դուրս է եկել, ծնողներն էլ հայտարարել են՝ կգնան ավելի կոշտ քայլերի:
Անհետ կորած զինծառայողների ծնողներն այսօր փակել են Էջմիածնի զորամասի մուտքը: Նրանք հայտարարել են, որ հրամանատարությանը տարածք մտնելու հնարավորություն կտան միայն իրենց որդիներին վերադարձնելուց հետո: Ծնողները անմիջապես զորամասի դիմաց նստացույց են սկսել՝ խոստանալով դիմել ավելի կտրուկ քայլերի, եթե բողոքի այս ձևն արդյունք չտա:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv