Ոստիկանության 16 աշխատակից մեկուսացված է, ևս 6-ի մոտ էլ հաստատվել է կորոնավիրուս, հայտնել է Ոստիկանության պետի տեղակալ Հայկ Մհրյանը: Նա հիշեցրել է, որ ոստիկանական հոսպիտալն այն հաստատությունների թվում է, որն անցել է կորոնավիրուսով հիվանդների բուժման: Հոսպիտալում այժմ 83 պացիենտ կա: Փոխոստիկանապետն անդրադարձել է նաև օրերս տեղաշարժի սահմանափակման թերթիկ չունեցող երիտասարդի ու ոստիկանի միջև տեղի ունեցած միջադեպին: Մհրյանի խոսքով՝ քննություն է ընթանում, սական, առանց դրա էլ ակնհայտ է երիտասարդի անհարգալից վերաբերմունքը ոստիկանության հանդեպ:
Կորոնավիրուսից երեկ մահացած 68-ամյա տղամարդը Մարալիկի բնակիչ է: Նա ուներ ուղեկցվող մի շարք հիվանդություններ: Վերջինի վարակման աղբյուրն անհայտ է: Ըստ խոշորացված Անի համայնքի ղեկավարի՝ նրա շփման շրջանակը սահմանափակ էր: Տղամարդուն Մարալիկի հիվանդանոցից երկկողմանի թոքաբորբ ախտորոշմամբ նախ տեղափոխել են Գյումրու ինֆեկցիոն հիվանդանոց, ապա «Գյումրի» բժշկական կենտրոն: Բուժանձնակազմը բուժօգնություն է ցուցաբերել՝ չկասկածելով որ տղամարդը վարակակիր է: Ամեն ինչ պարզվել է նրան Երևան տեղափոխելուց հետո: Պացիենտին բուժօգնություն ցուցաբերած բուժաշխատողները մեկուսացվել են:
Կորոնավիրուսով հիվանդների համար նախատեսված մահճակալային ֆոնդի կեսն արդեն զբաղված է, Ֆեյսբուքի ուղիղ եթերում հայտնել է Առողջապահության նախարարը: Արսեն Թորոսյանի խոսքով՝ այն պացիենտները, որոնք գանգատներ չունեն, հիվանդանոցներում չեն գտնվում: Նրանք տեղափոխվել են հյուրանոցներ և շարունակում են մնալ բժիշկների հսկողության տակ: Արսեն Թորոսյանը նաև մանրամասներ է հայտնել թոքաբորբ ունեցող հիվանդների վերաբերյալ:
Այս օրերին մեծ տարածում գտած «մնա տանը» կարգախոսը լայն արձագանք է գտել ինչպես Հայաստանում, այնպես էլ Արցախում: «Կենտրոն» հեռուստաընկերության լրագրող Սիլվի Տիգրանյանը հանդես է եկել յուրօրինակ նախաձեռնությամբ: Հանրապետության մարզերի, Արցախի և Ջավախքի բնակիչներն իրենց բարբառով հորդորում են մնալ տանը, հետևել ցուցումներին և օգնել համաճարակի հաղթահարմանը:
Այսօր սպորտի միջազգային օրն է : Դեռևս 2013 թվականի օգոստոսին Միավորված ազգերի կազմակերպության որոշմամբ ապրիլի 6-ը հռչակվել է սպորտի՝ որպես խաղաղության խորհրդանիշի միջազգային օր: Ու թեև կորոնավիրուսը խառնել է ոչ միայն համաշխարհային սպորտի, այլև բոլորիս խաղաքարտերը, այդուհանդերձ, մենք փորձել ենք ելք գտնել նաև նման իրավիճակում: «Էպիկենտրոն»-ն այս օրերին նոր շարք է սկսում՝ «Սպորտն ընդդեմ կորոնավիրուսի», որտեղ ներկայացնելու ենք, թե ինչպես են մեր մարզիկները հաղթահարում կարանտինն ու պահում մարզավիճակը։ Մեր առաջին հերոսը 2019 թվականի Եվրոպայի չեմպիոն, 2020-ի բրոնզե մեդալակիր ըմբիշ Արսեն Հարությունյանն է:
Արտակարգ դրության ժամանակ հնարավոր է, որ առաջին անհրաժեշտության ապրանքների գները բարձրանան, հայտնել է Էկոնոմիկայի նախարարի տեղակալ Վարոս Սիմոնյանը: Միևնույն ժամանակ նա նշել է, որ շուկան վերահսկվում է, և գնաճը զսպելու միջոցներ են ձեռնարկում: Փոխնախարարը ներկայացրել է նաև ԵԱՏՄ անդամ երկրներին վերաբերող վերջին որոշումները: Կորոնավիրուսի դեմ պայքարի շրջանակում, մասնավորապես, զրոյացվել են որոշ բժշկական նշանակության ապրանքների ներմուծման մաքսատուրքերը:
Հայաստանում երեկ իրականացված 263 թեստավորումից ընդամենը 11-ն է եղել դրական պատասխանով, ինչն, ըստ վարչապետի, աննախադեպ ցուցանիշ է վերջին շաբաթների համար: «Սա նշանակում է, որ միջոցառումները, որոնք բազմաթիվ անհարմարություններ են պատճառում, սկսել են դրական արդյունք տալ: Առաջիկա մեկ շաբաթվա ընթացքում ավելի խստորեն պետք է պահել պարետի սահմանափակումները: Այդ դեպքում, մեր շանսերը կմեծանան, որ երկուշաբթի օրվանից սկսենք մտածել ռեժիմների թուլացման մասին»,- ընդգծել է վարչապետը: Նիկոլ Փաշինյանը հայտնել է նաև մահվան նոր դեպքի մասին:
«Գագիկ Ծառուկյան» բարեգործական հիմնադրամը հանրապետության ամբողջ տարածքում շարունակում է սոցիալական աջակցության ծրագրերը: Հերթական անգամ առաջնային անհրաժեշտության սննդամթերք են ստացել Արագածոտնի մարզի 500-ից ավելի անապահով ընտանիքներ: Նկատի ունենալով ստեղծված վիճակն ու տեղաշարժման սահմանափակումները՝ հիմնադրամի աշխատակիցները սննդամթերքը հասցրել են բնակարաններ:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv