Ռոբերտ Քոչարյանի գրասենյակից հայտնում են, որ 2-րդ նախագահը մտադիր է եղել մոտակա օրերին մեկնել Մոսկվա, սակայն վարակվել է կորոնավիրուսով: Քոչարյանն այժմ գտնվում է ինքնամեկուսացման մեջ: Նշվում է, որ Մոսկվա մեկնելու առաջարկը Քոչարյանին արել են Արկադի Ղուկասյանը և Բակո Սահակյանը: 2-րդ նախագահն ընդունել է այդ առաջարկի նպատակահարմարությունը, սակայն երկրից ելքը հայտնի պատճառով փակ էր նրա համար: Վարչապետի հետ Ղուկասյանի և Սահակյանի խոսակցությունից հետո դատարանը թույլատրել է Քոչարյանին մեկնել երկրից՝ մինչև նոյեմբերի 7-ը ելքի ժամկետի սահմանափակմամբ և նրան վերադարձրել անձնագիրը:
«Այս պատերազմի գլխավոր հրձիգը եղել է Թուրքիան, որը Սիրիայից վարձկանների և ահաբեկիչների, նաև իր զինված ուժերի մի հատված տեղափոխել է Ադրբեջան»,- միջազգային մի քանի առաջատար լրատվամիջոցների հետ հարցազրույցում ասել է Նիկոլ Փաշինյանը: Ի պատասխան հարցի, թե ղարաբաղյան հակամարտության կարգավորման տեսակետից ի՞նչ կարող է հայկական կողմը ակնկալել եվրոպական երկրներից՝ վարչապետը նշել է. Հայաստանն աշխատում է հույսը դնել առաջին հերթին իր, ապա այն երկրների վրա, որոնց հետ ունի փոխադարձ դաշնակցային պարտավորություններ:
Թուրքիայի արևմուտքում՝ Էգեյան ծովի շրջանում, հզոր երկրաշարժ է գրանցվել, որին հաջորդել է նաև ցունամին: Գրեթե 7 մագնիտուդ ուժգնությամբ ցնցումը գրանցվել է Իզմիրի նահանգում, որի հետցնցումները զգացել են Ստամբուլում, նաև Աթենքում: Կան բազմաթիվ ավերածություններ: Նախնական տվյալով՝ վիրավոր է 100-ից ավելի մարդ, կան առնվազն մեկ տասնյակ զոհեր, փլուզվել են 20-ից ավելի շենքեր:
Բելգիայի խորհրդարանի ներկայացուցիչների պալատի պատգամավոր Ժորժ Դալիմանը ավարտել է այցն Արցախ: Տեղում իրավիճակին ծանոթանալու համար, իր հայրենիքում Արցախի շահերն առաջ մղելու և խաղաղության այլընտրանքի բացակայությունն ապացուցելու համար փաստեր որոնող պատգամավորը մի քանի օրով դարձել է Արցախում տեղի ունեցող դրամայի գործող անձերից մեկը. նա ապաստարան է իջել ոչ թե հարցախույզերի համար, այլ ռումբերից պատսպարվելու: Արցախի մեր գործընկերների ուղարկած տեսանյութը:
Հակամարտության գոտու դիրքերից մեկում օրեր առաջ մեր ժամկետային զինծառայողներն ու իրենց սպաները հետ են շպրտել թշնամու՝ 100 հոգանոց հարձակվող խմբին: Շուրջ երեք ժամ է տևել դիմադրությունը: Դիրքի պահպանությունը տղաներն այսօր էլ շարունակում են փառահեղ իրականացնել: Առաջնագծի հերոսապատումը հյուսիսային ուղղությունից՝ տեսանյութում:
MMA-ի հայազգի մարտիկ Գեղարդ Մուսասին նվաճել է հերթական չեմպիոնական տիտղոսը ու իր հաղթանակը նվիրել է հայ ազգին: Հաղթանակից հետո հայ մարզիկը ութանկյունում եղել է հայոց եռագույնով և խոսել պատերազմական իրավիճակի մասին: Մեր շատ չեմպիոններ այս օրերին Արցախում են ու հենց տեղում են իրենց աջակցությունը ցուցաբերում հայրենիքին ու հայ զինվորին: Ոմանք զենքը ձեռքին հերոսական պայքար են մղում թուրք-ադրբեջանա-ահաբեկչական հրոսակախմբերի դեմ:
Արցախցի կանայք շարունակում են բողոքի ակցիաներ անցկացնել այն երկրների դեսպանատների դիմաց, որոնք շարունակում են լուռ մնալ կամ հանդես գալ պրոադրբեջանական հայտարություններով՝ Արցախում իրականացվող ադրբեջանա-թուրքական ագրեսիայի վերաբերյալ: Այսօր ցուցարարները խաթարել են մեր երկրում Մեծ Բրիտանիայի դեսպանատան խաղաղ առօրյան: Արցախցի կանայք իրենց հետ նավթով լցված շշեր և նամակ են տարել՝ դեսպանին փոխանցելու նպատակով:
Քարինտակ գյուղից արևելք ընկած մեկ -երկու գյուղից ադրբեջանական դիվերսանտները մաքրվել են, հայտնում է Արծրուն Հովհաննիսյանը: Նա ավելի վաղ նշել էր, որ նախորդ օրերի համեմատ՝ այսօր հարավային ուղղությամբ՝ Արաքս գետից հյուսիս ընկնող ճակատում մարտերի ինտենսիվությունը բարձրացել է: Գիշերը ՊԲ-ն ոչնչացրել է մեծ քանակությամբ թշնամական զինամթերք և մարդկային ուժ: Հայ զինծառայողների առաջացրած գիշերային հրավառության կադրերը ողողել են համացանցը:Հրապարակվել է նաև տեսանյութ, թե ինչպես է ոչնչացվում ադրբեջանական դիվերսիոն խումբը:
Բունդեսթագում արցախյան թեմայով լսումների ժամանակ իշխող կոալիցիայից Յոհան Վադեփհուլը հստակ ուղերձ է հղել՝ Ադրբեջանն է սկսել Արցախի դեմ ագրեսիան, իսկ Թուրքիան յուղ է լցնում կրակի վրա: Օրենսդիրը Բաքվից պահանջել է անհապաղ հրադադարի պատրաստակամություն հայտնել և վերադառնալ բանակցային դաշտ: Կարմիր խաչի միջազգային կոմիտեն 2 մլն եվրո է ստանալու Գերմանիայից՝ Արցախում հումանիտար օգնությունը կազմակերպելու նպատակով: Մինսկի խմբի համանախագահներին աջակցություն է հայտնել Միացյալ Թագավորությունը: Կատալոնիայի Ամպոստա քաղաքն էլ ճանաչել է Արցախի անկախությունը:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv