Բացվել է Երևանից Բաթումի գնացքով ճանապարհորդելու սեզոնը: Մինչև սեպտեմբերի 30-ը գնացքն ամեն օր Երևանից Բաթումի կհասցնի ծովափնյա հանգստի սիրահարներին: «Հարավկովկասյան» երկաթուղուց տեղեկացնում են, որ այս տարի պայմանների փոփոխություն է եղել, վագոններում կա անվճար wi-fi , պարտադիր օդորակիչներ, գներն էլ նախորդ տարվա համեմատ նվազել են: Բաթումի հանգստի մեկնողներին բարի ճանապարհ է մաղթել Աիդա Կարապետյանը:
Սահմանամերձ Մատաղիս հասնելու համար դժվարությունները շուտով անցյալում կհայտնվեն: Իրականացվում է ճանապարհաշինական ևս մեկ խոշոր ծրագիր, որն իր նշանակությամբ ռազմավարական է: 11 կիլոմետրանոց ճանապարհը շինարարները շահագործման կհանձնեն երկու փուլով: Հոկտեմբերին պատրաստ կլինի առաջին՝ 5,5 կիլոմետրանոց հատվածը: Երկրորդ հատվածն ավարտելուց հետո շինարարական տեխնիկան կտեղափոխվի Թալիշ տանող ճանապարհը: Աշխատանքների ընթացքին ծանոթացել է նախագահ Բակո Սահակյանը:
Գյումրիի ինֆեկցիոն հակատուբերկուլյոզային հիվանդանոցի մանկական բաժանմունքում, ինչպես նաև «Մոր եվ մանկան ավստիրական» հիվանդանոցում աղիքային վիրուսով հիվանդները շատացել են: Նախորդ տարվա համեմատ, այս տարի աղիքային ինֆեկցիան ավելի շուտ է սկսվել: Բժիշկների խոսքով՝ աղիքային վիրուսով ավելի հաճախ հիվանդանում են երեխաները: Ձեր ուշադրությանն ենք ներկայացնում Գյումրիի մեր գործընկերների պատրաստած տեսանյութը:
Հայաստանցի բժիշկներն արտասահմանցի գործընկերների հետ քննարկել են կոլոռեկտալ քաղցկեղի բուժման նորագույն տեխնոլոգիաներն ու մոտեցումները: Ռուսաստանից, Վրաստանից ու Հնդկաստանից հրավիրված մասնագետները համաժողովի ընթացքում ներկայացրել են տեխնոլոգիական նորամուծությունների վրա հիմնված հիվանդության բուժման իրենց մեթոդները: Մասնագետները նշել են, որ հայ բժիշկներն ունեն բարձր որակավորում, և համապատասխան դեղորայքի առկայության պայմաններում նրանք կարող են բուժել քաղցկեղի տարածված տեսակներից մեկը:
«Էրեբունի» պատմահնագիտական արգելոց-թանգարանը, մեղմ ասած, ոչ բարվոք վիճակում է: Նորանշանակ տնօրենն «Էպիկենտրոն»-ի հետ զրույցում բարձրաձայնել է ամենահրատապ խնդիրների մասին: Միքայել Բադալյանի խոսքով՝ այս տարիներին պատշաճ ուշադրություն չի դարձվել Շենգավիթին և Կարմիր բլուրին: Իրենց գլխավոր խնդիրներից մեկը պետք է լինի ենթակա կառույցների համաչափ զարգացումն ու հանրահռչակումը: Ինչպիսի՞ ժառանգություն է ստացել Միքայել Բադալյանը, և որո՞նք են, ըստ նրա, արգելոցի այսօրվա վիճակի գլխավոր պատճառները:
Կա՞ արդյոք սահմանային լարվածություն, և ի՞նչ ազդեցություն կարող են թողնել ադրբեջանա-թուրքական վերջին զորավարժությունները։ Հայաստանում և Արցախում փորձագետների կարծիքները տարբեր են։ Զորավարժություններ անցկացնում են բոլորը, սահմանային լարվածությունն էլ փոխաբերական է, թեև վերջերս ադրբեջանական կողմն ակտիվորեն դիտարկումներ է անցկացնում արցախա-ադրբեջանական սահմանին։
Արցախը հայտնի է նաև իր յուրահատուկ խոհանոցով և ուտեստներով: Արցախ այցելող յուրաքանչյուր մարդ՝ այդ թվում զբոսաշրջիկները, առաջին գործողություններից մեկը, որ անում են, կանաչիների բազմազանությամբ ու յուրահատուկ եղանակով պատրաստված ժենգյալով հաց համտեսելն է: Ստեփանակերտի կենտրոնական շուկայում մեր գործընկեր Արթուր Հակոբյանը նույնպես համտեսել է Արցախի բրենդ դարձած ժենգյալով հացն ու պարզել է այն պատրաստելու առանձնահատկություններն ու գաղտնիքները։
Հայ բռնցքամարտիկներն Օլիմպիական ավանում վերջին մարզումներն են անցկացնում Եվրոպական խաղերից առաջ: Տարվա գլխավոր մարզական փառատոնին Հայաստանը ներկայացված է 11 բռնցքամարտիկով: Բռնցքամարտիկների հերթական մարզմանը հետևել է նաև բռնցքամարտի հայկական ազգային ֆեդերացիայի նախագահ Հովհաննես Հովսեփյանը: