Ռազմական ինստիտուտն ավարտելուց հետո Գագիկ Պողոսյանը որոշեց ծառայության անցնել մանկության ընկերոջ՝ ապրիլյան քառօրյա պատերազմում նահատակված Ադամ Սահակյանի զոհված վայրում՝ Ջրականում: Տարիներ անց հենց նույն վայրում էլ ընկավ ինքը: Ավագ լեյտենանտ Գագիկ Պողոսյանի հուղարկավորությունից որոշ ժամանակ անց մայրը զանգ է ստացել, թե որդու մասունքները գտնվել են, մինչդեռ ծնողները տղայի ամբողջական մարմինն ամիսներ առաջ էին հուղարկավորել:
Այսօր Մարաղայի կոտորածների 29-րդ տարելիցն է: Ադրբեջանի կողմից հայության դեմ իրականացրած հերթական ոճրագործություններից մեկը, որն առ այսօր միջազգային հանրության գնահատականին չի արժանացել: Ոճրագործներն այդպես էլ մնացել են անպատիժ: «Մարդկության դեմ ուղղված հանցագործությունները վաղեմության ժամկետ չունեն և պետք է դատապարտվեն»,- նշված է Հայաստանի ԱԳՆ-ի տարածած հայտարարության մեջ: Օրվա կապակցությամբ Ստեփանակերտի հուշահամալիրում կազմակերպվել է հիշատակի ու պահանջատիրական ակցիա:
Կայացել է «Զարթոնք» ազգային-քրիստոնեական նախաձեռնության ասուլիս-քննարկումը: Նորաստեղծ նախաձեռնության հիման վրա առաջիկայում ձևավորվելու է կուսակցություն, որը հնարավոր է՝ մասնակցի խորհրդարանի առաջիկա ընտրությանը: Փաստաբանների պալատի նախագահ, «Զարթոնք»-ի համահիմնադիր Արա Զոհրաբյանը ներքաղաքական հարցերից զատ անդրադարձել է նաև հայ ռազմագերիների խնդրին, խոսել Թուրքիայի հետ հարաբերությունների կարգավորման վտանգների մասին:
Մեկ դոլարի դիմաց՝ միջինում 523 դրամ: Մի քանի օր առաջ ամերիկյան արժույթի գինը կտրուկ բարձրացավ՝ հասնելով անգամ 550-560 դրամի՝ մեկ դոլարի համար: Տնտեսագետները կուրսի այս բարձրացումն արհեստական չեն համարում: Արտարժույթի թանկացումը կապվում է առաջին հերթին արտահանման ծավալի նվազման հետ: Իրավիճակը կարգավորելու համար ԿԲ-ն բաց է թողել դոլարի որոշակի խմբաքանակ, սակայն դա, մասնագետների համոզմամբ, երկարաժամկետ լուծում չէ:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv