ԱԺ պետաիրավական հարցերի մշտական հանձնաժողովն այսօր հավանություն է տվել նախագծին: Արդարադատության նախարարը մանրամասնել է, թե ինչ է այն իրենից ներկայացնում, և ովքեր կարող են մասնագիտական դատարանների դատավորներ դառնալ: Փոխարենը հետաձգվել է Բարձրագույն կրթության և գիտության մասին օրենքում փոփոխությունների աղմկահարույց նախագիծը: Իսկ «Լուսավոր Հայաստանը» խորհրդարանի քննարկմանն է ներկայացրել նոյեմբերի 9-ին հայտարարության իրավազորության մասին հարցը:

«Պնդումը, թե Ռուսաստանը առաջարկել է Հայաստանին յոթ շրջան վերադարձնել Ադրբեջանին «հենց այնպես» և մոռանալ Ղարաբաղի կարգավիճակի մասին, չեն համապատասխանում իրականությանը»: ՌԴ ԱԳՆ-ի փոխանցմամբ այս մասին հայտարարել է ԵԱՀԿ Մինսկի խմբի ռուս համանախագահ Իգոր Պոպովը՝ պատասխանելով Նիկոլ Փաշինյանի՝ «44-օրյա պատերազմի ծագումը» վերնագրով հոդվածին: Հոդվածում ասվում է, որ կարգավորման ռուսական առաջարկները չեն շոշափել ԼՂ կարգավիճակի հարցը և սահմանափակվել են միայն յոթ շրջանների վերադարձով: Պոպովը նշում է, որ ռուսական առաջարկներ ասելով, հավանաբար, ենթադրվում է փուլային կարգավորման ծրագիրը, որի վերջին տարբերակը կողմերին է ներկայացվել 2019-ի հունիսին: Ներկայացնելով կարգավորման ռուսական փաթեթը՝ Պոպովն ասել է, որ կողմերը չեն մերժել այդ առաջարկները՝ չնայած լիարժեք համաձայնության հասնել չէր լինում:«Բանակցությունները վարվել են կանոնավոր կերպով, ընդհուպ մինչև 2018 թվականը, երբ Երևանը նոր մոտեցումներ առաջ քաշեց», - հավելել է Պոպովը:

Նիկոլ Փաշինյանը խորհրդակցություն է անցկացրել, քննարկվել են Սյունիքի մարզի սահմանային միջավայրի փոփոխությանը և անվտանգության ապահովմանն ուղղված հարցեր: «Սյունիքը համարում եմ մեր պետականության ողնաշարը, և մենք պետք է բոլոր միջոցները ձեռնարկենք Սյունիքում Հայաստանի անվտանգությունն ապահովելու համար»,- հայտարարել է Փաշինյանը: Անդրադարձ է կատարվել նաև սահմանամերձ դարձած համայնքներում սոցիալական և տնտեսական ծրագրեր իրականացնելու միջոցառումներին:

Լարված իրավիճակ ԱԺ Տնտեսական հարցերի մշտական հանձնաժողովի նիստում: «Բարգավաճ Հայաստան» խմբակցության պատգամավոր Միքայել Մելքումյանը հետ է վերցրել իր երկու նախագծերը, որոնք միտված էին ներդրումային միջավայրի ու հարկային օրենսգրքի բարելավմանը: Թեժ լեզվակռվի ընթացքում Մելքումյանը կոչ է արել «Իմ քայլը»-ական պատգամավորին չափը չանցնել՝ իշխանությանը մեղադրելով անտրամաբանական քաղաքականության պատճառով երկիրը կործանման հասցնելու համար:

ԱԺ «Իմ քայլը» խմբակցությունը որոշել է ԲԴԽ անդամի թափուր պաշտոնի համար առաջադրել նախկին զինդատախազ Գագիկ Ջհանգիրյանի թեկնածությունը: Դռնփակ նիստից հետո թեկնածուն հայտարարել է, որ օրենքի՝ տարիքային սահմանափակման դրույթն իր վրա չի տարածվում: Լրագրողները Ջհանգիրյանին հիշեցրել են Մատաղիսի աղմկահարույց գործի վերաբերյալ իրեն ուղղված մեղադրանքները, նաև Նիկոլ Փաշինյանի հետ ժամանակին ունեցած հակասությունները: Լիլիթ Մակունցն էլ խոսել է ոչ միայն Ջհանգիրյանին առաջադրելու, այլև մոսկովյան եռակողմ հանդիպման և վարչապետի նոր թեկնածու առաջադրելու հարցի վերաբերյալ:

Կորոնավիրուսի համավարակի ու պատերազմի հետևանքներն անմիջական ազդեցություն են ունեցել նաև Հայաստանի զբոսաշրջության ոլորտի վրա: Տուրիզմի հայկական ֆեդերացիայի նախագահի խոսքով՝ եթե ներքին տուրիզմը որոշ դեպքերում կարողացել է պահպանել գործունեությունը, ապա նույնը չի կարելի ասել արտագնա ուղղությունների մասին: Մեխակ Ապրեսյանը ոլորտը բնորոշում է մեկ բառով՝ քնած: