Երևանում վերջին հրաժեշտն են տվել դերասան, բեմադրիչ, արվեստի վաստակավոր գործիչ Վիգեն Ստեփանյանին: Նա խաղացել է ավելի քան 100 դեր տարբեր թատրոններում, բեմադրել 43 ներկայացում տարբեր երկրներում ու տարբեր լեզուներով, նկարահանվել է 5 տասնյակի հասնող ֆիլմերում ու 60 հեռուստաբեմադրություններում: Տաղանդավոր դերասանի մահով ևս մեկ երանգ պակասեց հայ մշակութային արվեստի գունադարանից:
Մի խումբ քաղաքացիներ, այդ թվում Ադրբեջանում պահվող հայ ռազամգերիների ծնողները, հավաքվել են մեր երկրում Միացյալ նահանգների և Ֆրանսիայի դեսպանատների մոտ՝ իրենց որդիներին ազատ արձակելուն աջակցելու պահանջով: Ցուցարարները իրենց պահանջների գրավոր ձևակերպումը ներկայացրել են դեսպանատան աշխատակցիներին: Անհետ կորած զինծառայողների հարազատներն էլ բողոքի ակցիա են իրականացրել Կարմիր Խաչի միջազգային կոմիտեի գրասենյակի մոտ: Այստեղ նրանց հայտնել են,որ որոնողական աշխատանքները շարունակվում են:
Եվրախորհրդարանը 2 զեկույց-բանաձև է ընդունել՝ կոշտ քննադատության ենթարկելով Թուրքիայի ապակայունացնող դերը ԼՂ-ում: Եվրոպացի պատգամավորները Անկարային կոչ են արել ձեռնպահ մնալ հակամարտությունում որևէ միջամտությունից,այդ թվում՝Ադրբեջանին զինելուց: Ընդգծվում է նաև, որ Ղարաբաղի կարգավիճակի որոշման գործընթացը պետք է իրականացվի Մինսկի խմբի շրջանակներում: Պաշտոնական Երևանը դրական է գնահատել ընդունված փաստաթղթերը՝ հատկապես կարևոր համարելով, որ Եվրապառլամենտը դատապարտել է Թուրքիայի կողմից հակամարտության գոտի օտարերկրյա զինյալների տեղափոխումը:
«Հայրենիքի փրկության շարժման» մասնակիցները հերթական բողոքի ակցիան են իրականացրել ԱԺ ծառայողական մուտքի դիմաց: Այս անգամ ոչ թե խոչընդոտել են պատգամավորների մուտքը,այլ, ինչպես իրենք են նշել, ամոթի միջանցք են կազմել «Իմ քայլը» խմբակցության պատգամավորների և ԲԴԽ անդամի թեկնածու Գագիկ Ջհանգիրյանի համար: Ակցիայի մասնակիցների գնահատմամբ՝ Գագիկ Ջհանգիրյանին ԲԴԽ գործուղելով՝ Նիկոլ Փաշինյանը փորձում է զավթել դատական համակարգը:
Արման Թաթոյանը տեղյակ է,թե Ադրբեջանում քանի հայ ռազմագերի կա և ինչ պայմաններում են նրանք պահվում:Այս մասին մարդու իրավունքների պաշտպանը հայտնել է «Էպիկենտրոն»-ի հետ զրույցում: Օմբուդսմենն ահազանգել է՝ սահմանների որոշման ընթացքում գրանցվել են մարդու իրավունքների կոպիտ խախտումներ և անհրաժեշտ է դադարեցնել գործընթացը: Թաթոյանն անդրադարձել է նաև Ալիևի աղմկահարույց հայտարարություններին:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv