Սերգեյ Սմբատյանն այսօր արձագանքել է կամերային երաժշտական պետական թատրոնի և Հակոբ Պարոնյանի անվան պետական երաժշտական կոմեդիայի թատրոնի միավորման վերաբերյալ խոսակցություններին: Հայաստանի պետական սիմֆոնիկ նվագախմբի խմբավարը նոր է վերադարձել Հայաստան: Նրա խոսքով՝ Սիմֆոնիկը գործունեության 15 տարվա ընթացքում տեղափոխվել է շենքից շենք: Խնդրի լուծման հանրային քննարկումը Սմբատյանը համարում է կարևոր ձեռքբերում:

ՍԴ-ում շարունակվում է ընտրությունների արդյունքների վիճարկման գործի դատաքննությունը: Այս փուլում կողմերը հարցեր են ուղղել ՔՊ-ի ներկայացուցիչ Ռուստամ Բադասյանին,այնուհետև կողմերին հարցեր են ուղղել Բարձր դատարանի դատավորները:«Սահմանադրությունն իրավունքի նկատմամբ նման ծաղր չի ենթադրում»,-հայտարարել է «Պատիվ ունեմ» դաշինքի ներկայացուցիչը՝ ի պատասխան դատավոր Վահե Գրիգորյանի այն հարցի,թե ինչու պետք է Նիկոլ Փաշինյանի փոխարեն վարչապետի պաշտոնակատ նշանակվեր ժողովրդի կողմից չընտրված մեկ այլ անձ:

Երևանի ավագանին այսօր արտահերթ նիստ է գումարել: Քննարկվել է ինքնակամ շինությունների հարցը: Քաղաքապետարանի աշխատակազմի իրավաբանական վարչության պետի պաշտոնակատար Տարոն Մարգարյանը ներկայացրել է նախագիծ, ըստ որի՝ այսուհետև Երևանի քաղաքապետարանն իր հայեցողությամբ է տնօրինելու համայնքային հողի վրա առանց թույլտվության կառուցված ինքնակամ շինությունները:

Մարդու իրավունքների պաշտպանի գնահատմամբ՝ Հայաստանի սահմանների հետ կապված հարցերը սխալ են կազմակերպվում: Արման Թաթոյանի խոսքով՝ կան պաշտոնյաներ,որոնք ադրբեջանամետ հայտարարություններ են անում՝ վնասելով մեր երկրի շահերը միջազգային ատյաններում: Օմբուդսմենը նշել է, որ այդպիսի պաշտոնյաներին պետք է օրենքով պատժել:

Զբոսաշրջային թեժ սեզոնին բազմաթիվ իրանցիներ գալիս են Հայաստան կորոնավիրուսի դեմ պատվաստվելու համար: Այս օրերին համացանում լայնորեն տարածվում են Հյուսիսային պողոտայում արված լուսանկարները: Տեղադրված շրջիկ կայանում երկար հերթեր են գոյանում: Բացի իրանցիներից, ո՞ր երկրների քաղաքացիներն են ցանկանում պատվաստվել Հայաստանում և ինչո՞ւ է նրանց պատվաստումը կատարվում անվճար: Մանրամասները՝ տեսանյութում: