Սուր շնչառական խնդիրների սրացմամբ պայմանավորված հանրապետությունում այս տարի կանչերի աճ է գրանցվել: Շտապօգնության ծառայության տնօրեն Թագուհի Ստեփանյանի խոսքով՝ եթե նախորդ տարվա առաջին երկու ամիսներին կանչերի միջին օրական ցուցանիշը եղել է մոտ 850, ապա այս տարեսկզբին թիվը հասել է 950-ի: Մարտի սկզբից մինչև մայիսի 6-ը կորոնավիրուսի կասկածով հիվանդանոց է տեղափոխվել 2333 պացիենտ: Շտապօգնության ծառայության անձնակազմում ևս վարակվածության դեպքեր են գրանցվել:
ԱԺ-ում Նիկոլ Փաշինյանը հանդիպում է ունեցել Էդմոն Մարուքյանի հետ: «Լուսավոր Հայաստան» խմբակցության աշխատասենյակից դուրս գալուց հետո վարչապետը չի պատասխանել հանդիպման նպատակին ու բովանդակությանը վերաբերող հարցերին: Միայն նշել է, որ Մարուքյանի հետ սուրճ է խմել: Փոխարենը 40 րոպեանոց հանդիպումից որոշ փակագծեր է բացել «Լուսավոր Հայաստան» խմբակցության ղեկավարը: Էդմոն Մարուքյանն ասել է, որ Փաշինյանի հետ զրուցել են արցախյան հիմնախնդրի կարգավորման գործընթացի մասին:
Խորհրդարանում այսօր զեկույցներով են հանդես եկել տարածքային կառավարման, արդարադատության և սոցիալական ոլորտների պատասխանատուները: Նախարարները նաև պատասխանել են պատգամավորների հարցերին: Ռուստամ Բադասյանն առանձնացրել է հատկապես նախորդ տարի կառավարության նախաձեռնած բարեփոխումները կոռուպցիայի դեմ պայքարում, Սուրեն Պապիկյանն անդրադարձել է ճանապարհաշինությանը, իսկ Զարուհի Բաթոյանը 2019 թ.-ը բնութագրել է որպես նախապատրաստական տարի:
Կառավարությունն այսօր հաստատել է կորոնավիրուսի տնտեսական հետևանքների չեզոքացման հերթական միջոցառումը: Այն կօժանդակի բարձր տեխնոլոգիաների ոլորտի տնտեսվարողներին: Գործադիրը նաև 3 միլիարդ դրամ է հատկացրել աղետի գոտում՝ Լոռու, Շիրակի և Արագածոտնի մարզերում, 229 բնակարանի կառուցման համար: «Կառավարությունն աղետի գոտու բնակիչների առաջ բնակարանային խնդիրների գծով "դե յուրե" ունեցած պարտավարությունները ավարտին է հասցնում: Սա, սակայն, չի նշանակում, թե հետագայում որևէ ծրագիր չի իրականացվելու»,-ասել է փոխվարչապետ Տիգրան Ավինյանը:
«Գագիկ Ծառուկյան» բարեգործական հիմնադրամը համաճարակային իրավիճակում շարունակում է սոցիալական աջակցությունը Երևանի ու մարզերի բնակիչներին: Ուշադրության կենտրոնում կրկին Գեղարքունիքի մարզն է: Հաշվի առնելով քաղաքացիներից ստացված մեծաթիվ զանգերը՝ հիմնադրամը հերթական անգամ սննդամթերք և անվճար պարարտանյութ է հատկացրել մարզի բնակիչներին: Զուգահեռ Երևանում շարունակվել են ախտահանման աշխատանքները:
Ավանդույթի համաձայն՝ յուրաքանչյուր տարի մայիսի 6-ին, «Բարգավաճ Հայաստան» կուսակցության Կանանց խորհրդի պատվավոր նախագահ Ռոզա Ծառուկյանն այցելում է Նոյեմբերյան, ծաղիկներ խոնարհում 1991 թվականի այդ օրը Ոսկեպարում զոհված ոստիկանների հիշատակին նվիրված հուշակոթողին: Ռոզա Ծառուկյանը «Գագիկ Ծառուկյան» բարեգործական հիմնադրամի կողմից դրամական աջակցություն է տրամադրել զոհված ոստիկանների ընտանիքներին: Տավուշի մարզ կատարած այցի ընթացքում Ռոզա Ծառուկյանը հանդիպել է Իջևանում բնակվող Սահակյանների բազմազավակ ընտանիքին, հերթական աջակցությունը ցուցաբերել:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv