Երևանի ավագանու հերթական նիստի ժամանակ մայրաքաղաքի 2020 թ.-ի բյուջեի և զարգացման ծրագրի կատարողականների հաշվետվությունները սուր քննադատության են արժանացել: Ըստ զեկուցողի՝ դրանք թերակատարվել են համավարակի ու պատերազմի պատճառով: Ավագանու ԲՀԿ և «Լույս» խմբակցությունների անդամների գնահատմամբ՝ թերացումը քաղաքային կառավարման տապալման հետևանք է, որը պետք է հանգեցներ քաղաքապետի հրաժարականին: Բուռն մթնոլորտում անցած նիստի ժամանակ միջադեպ է տեղի ունեցել «Իմ քայլ»-ի և ԲՀԿ-ի ավագանու անդամների միջև, հնչել են փոխադարձ վիրավորանքներ:
Համավարակի պատճառով լրացուցիչ սահմանափակումներ չեն մտցվի, սակայն վերահսկում կսահմանվի գործող խստացումները կիրառելու ուղղությամբ: Այս մասին հայտնել է առողջապահության նախարարը: Կորոնավարակի դեմ Հայաստանում արդեն մոտ 300 մարդ պատվաստվել է, այժմ սպասում են պատվաստանյութերի նոր խմբաքանակին: Անահիտ Ավանեսյանը անդրադարձել է նաև զոհված զինծառայողների մարմինների նույնականացման գործընթացին և ԴՆԹ հետազոտությունների պատասխանների խնդրին:
Այսօր լրանում է Մոսկվայի պայմանագրի ստորագրման 100-ամյակը: Պատմական փաստաթուղթ, որով Քեմալական Թուրքիան և Բոլշևիկյան Ռուսաստանը առանց Հայաստանի գծեցին մեր երկրի սահմանները: Թուրքիային անցան Կարսը, Սուրմալուն, Արարատ լեռը, Նախիջևանն էլ հանձնվեց Ադրբեջանին: «Տեղի ունեցածը հայերի հանդեպ անարդար էր»,- «Էպիկենտրոն»-ին ասել է ռուս պատմաբան Ալեքսանդր Պալկինը: Հայ մասնագետները մեկ դար հնության պատմական այս իրադարձությունը պատկերավոր համարում են «պայմանագրային թուղթ ու գիր»:
Նիկոլ Փաշինյանի հրաժարականի պահանջով ակցիաները շարունակվում են: Քաղաքացիներն այսօր անհնազանդության գործողություններ են իրականացրել մայրաքաղաքի մի քանի փողոցներում: Աղբամաններով փակվել է Սայաթ-Նովա փողոցը, Կոմիտասի պողոտայում նստարաններ են տեղադրվել, դաշնակցական երիտասարդներն էլ ցույց են իրականացրել Կառավարությանն առընթեր «Հանրային կապերի և տեղեկատվության կենտրոն» ՊՈԱԿ-ի դիմաց:
Երևանում կայացել են ԵԱՀԿ գործող նախագահի բանակցությունները Հայաստանի ԱԳ նախարարի հետ: Արա Այվազյանն Անն Լինդեին ասել է, որ նոյեմբերի 9-ի եռակողմ հայտարարությունը թեև պարունակում է խաղաղ կարգավորմանն առնչվող որոշ դրույթներ, սակայն չի հասցեագրում դրա առանցքային տարրերը՝ Արցախի կարգավիճակ՝ հիմնված ինքնորոշման իրավունքի վրա: Քննարկվել է նաև գերիների վերադարձի հարցը: Շվեդիայի ԱԳ նախարարը հայտարարել է, որ հրադադարի հայտարարության լրիվ իրականացումը հիմք կստեղծի կոնֆլիկտի կարգավորման համար:
«Բոինգ»-ի անհետացման դեպքի առթիվ քրեական գործ է հարուցվել օդանավի զավթման հատկանիշներով, խորհրդարանում լրագրողներին ասել է ԱԱԾ-ի տնօրենի տեղակալը: Տիգրան Հարությունյանը, որն ԱԺ էր եկել մասնակցելու պաշտպանության և անվտանգության հանձնաժողովի նիստին, վստահեցրել է՝ հայկական կողմը Սյունիքում չլուծվող խնդիրներ չունի: Քննարկվել է նաև կեղծ լուրերի և օգտատերերի թեման: Պարզվում է՝ ԱԱԾ-ն, բացի «Գագիկ Սողոմոնյան»-ից, զբաղվում է նաև այլ ֆեյքերի գործերով:
Կառավարության անդամներն ու «Իմ քայլը» խմբակցության պատգամավորները մեկը մյուսի հետևից շարունակում են կոշտ արձագանքները Հայաստանի առաջին նախագահի հասցեին: Լևոն Տեր-Պետրոսյանը հայտարարել է, որ ներքաղաքական ճգնաժամի հաղթահարման իր պատկերացրած ելքը վարչապետի անհապաղ և ինքնակամ հրաժարականն է և Ազգային ժողովի կողմից անձեռնմխելիության իրավական երաշխիքների ապահովմամբ նրա, թեկուզ ժամանակավոր, ապաստանումն արտերկրում: Պատգամավոր Անդրանիկ Քոչարյանը Տեր-Պետրոսյանին հորդորել է խոսել նախ և առաջ իր հրաժարականի պատճառների մասին: Արդարադատության նախարարն էլ առաջին նախագահի հայտարարությունը համարում է անբովանդակ:
Ռոբերտ Քոչարյանի և մյուսների գործով դատական նիստն այսօր ևս հետաձգվել է.պաշտպանության նախկին նախարար Սեյրան Օհանյանը շարունակում է բուժումը հոսպիտալում ու ի վիճակի չէ ներկայանալ դատարան: Մեղադրող դատախազը հայտարարել է, որ մտադիր է միջնորդություն ներկայացնել գործերն առանձին վարույթով քննելու մասին:Դատական հաջորդ նիստը կկայանա մարտի 23-ին: Նույն օրը ՍԴ-ն քննելու է Քոչարյանի և առաջին ատյանի դատարանի դիմումների հիման վրա՝ քրեական օրենսգրքի 300.1 հոդվածի սահմանադրականության հարցը:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv