«Ծախսելով 271 միլիոն դրամ՝ կառավարությունը պետական բյուջե է վերադարձրել 325 միլիոն դրամ»,- ՖԲ ուղիղ եթերում հայտարարել է վարչապետը՝ անդրադառնալով Ամանորի պետական ծախսերին: Փաշինյանի խոսքով՝ 2019 թ. դեկտեմբերի 26-ից 2020թ. հունվարի 6-ն ընկած ժամանակահատվածում նախորդ տարվա համեմատ գրանցվել է 9 միլիարդ 307 միլիոն դրամի հավելյալ շրջանառություն, որից միայն 4 միլիարդը՝ մարզերում: Վարչապետը խոսել է նաև ԱԱԾ նախկին տնօրենի մահվան մասին՝ խոստանալով այդ հարցին մանրամասնորեն անդրադառնալ այսօր՝ խորհրդարանում կառավարության հետ հարց-պատասխանի ժամանակ:

«Մուլտի Գրուպ» կոնցեռնի «Ավիասերվիս» ընկերության և լատվիական «Air Baltic» ավիաընկերության գործակցության շնորհիվ մոտ երեք ամսից կվերսկսվեն Ռիգա-Երևան-Ռիգա ուղիղ չվերթները: Թռիչքները կլինեն շաբաթական երկու անգամ: «Air Baltic» ընկերության ներկայացուցիչը հայկական տուրիստական կազմակերպություններին ներկայացրել է իրենց առաջարկները: Երկու երկրների ներկայացուցիչները նշել են, որ նախաձեռնությունը կարևոր քայլ է զբոսաշրջության զարգացման, նաև երկու երկրների միջև առևտրաշրջանառության ծավալները մեծացնելու տեսանկյունից:

«Իմ քայլը» խմբակցությունն այսօր տապալել է Երևանի քաղաքապետարանին արված նվիրատվությունների վերաբերյալ հարցերը քննող խորհրդարանական հանձնաժողովի կազմը հաստատելու նախագիծը: Քաղաքական մեծամասնությունը, որը երեկ հայտարարել էր նախագծին դեմ քվեարկելու մասին, այսօր որոշել է ընդհանրապես չմասնակցել քվեարկությանը: «Իմ քայլի» այս որոշումից հետո ԱԺ-ում ստեղծվել է իրավական կազուս, քանի որ հանձնաժողովը իրավունքի ուժով ստեղծվել է, սակայն նրա կազմը չի հաստատվել: Ընդդիմադիր «Լուսավոր Հայաստան» և «Բարգավաճ Հայաստան» խմբակցությունները կոշտ քննադատության են ենթարկել իշխող ուժի գործողությունները: Էդմոն Մարուքյանի և Ռուբեն Ռուբինյանի միջև թեժ լեզվակռիվ է սկսվել: