Մանվել Գրիգորյանի և Նազիկ Ամիրյանի վերաբերյալ քրեական գործի նախաքննությունն ավարտվել է՝ այն մեղադրական եզրակացությամբ դատարան ուղարկելու համար: Մանվել Գրիգորյանի մեղադրանքը լրացվել է, իսկ նրա որդու` Արման Գրիգորյանի նկատմամբ հայտարարվել է հետախուզում: Հատուկ քննչական ծառայությունն այսօր հրապարակել է Գրիգորյանին առաջադրված մեղադրանքների մանրամասները: Մ. Գրիգորյանը մեղադրվում է ապօրինի կերպով զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ 228 միլիոն դրամի հարկերի վճարումից խուսափելու, պետական միջոցներից 1 միլիարդ 225 միլիոն դրամից ավելի վատնելու և շորթմամբ 37․101․100 դրամ արժողությամբ գույքի հափշտակությունը կազմակերպելու մեջ: