Փոխադարձ վիրավորանքներ` ՊՊԾ գնդի գործով նիստի ընթացքում: 10 ամբաստանյալի գործի քննությունն այսօր չի ավարտվել: Ցուցմունք են տվել տուժողներ Վալերիյ Օսիպյանն ու Վարդան Եղիազարյանը, որոնք գնդի գրավման օրերին զինված խմբի կողմից պահվել են գնդի տարածքում, իրենց խոսքով, ինքնաձիգի սպառնալիքների տակ: Լարված նիստին դատավոր Մեսրոպ Մակյանը բազմիցս զգուշացրել է` ամբաստանյալներն ու նիստին հետեւող հարազատները չաղմկեն, չնայած դրան աղմուկն ու վիրավորանքները չեն դադարել: Օսիպյանի ելույթի ընթացքում ամբաստանյալների հարազատները հաճախ սուլոցներով և բղավոցներով խանգարել են նիստի ընթացքը: Այն երկու անգամ ընդմիջվել է եւ տեղափոխվել եկող չորեքշաբթի:
Կառավարությունն այսօր ներկայացրել է գործունեության հնգամյա ծրագիրը. Փոխվարչապետ Մհեր Գրիգորյանը տեղեկացրել է, որ մինչև փետրվարի 8-ը ծրագրի խմբագրած տարբերակը կուղարկեն խորհրդարան: Կառավարության այս նիստում Նիկոլ Փաշինյանը հանձնարարել է բարձրացնել դպրոցների սեյսմակայունության բարելավման տեմպը: «Շինարարությունն ամենաաշկատատար ոլորտներից մեկն է, շահառուն պետք է տեսնի, որ այդ համատեքստում բան է փոխվել»,-ընդգծել է վարչապետը: Նշանակվել են նաև Շիրակի և Տավուշի նոր մարզպետները: Նիստի մանրամասները՝ Հասմիկ Օհանյանի տեսանյութում:
ԵԽԽՎ հայաստանյան պատվիրակության անդամներն ամփոփել են վեհաժողովի ձմեռային նստաշրջանի աշխատանքները: Պատվիրակության ղեկավար Ռուբեն Ռուբինյանի խոսքով՝ Հայաստանին վերաբերող կարևորագույն հարցը եղել է դեկտեմբերի 9-ին տեղի ունեցած խորհրդարանի արտահերթ ընտրությունը: Զեկուցող Ալեքսանդր Պոչեյը, որը նաև ԵխԽՎ դիտորդական առաքելության ղեկավարն էր, շատ բարձր է գնահատել ընտրությունների որակը: ԵԽԽՎ-ում ասվել է, որ Հայաստանի օրինակը կարող է և պետք է վարակիչ լինի այլ պետությունների համար: Պատվիրակության ԲՀԿ-ական պատգամավոր Միքայել Մելքումյանն էլ Ադրբեջանի պատվիրակության հռետորաբանությունում որոշակի փոփոխություններ է նկատել:
Էմանուել Մակրոնն ապրիլի 24-ը հայտարարել է Հայոց ցեղասպանության հիշատակի ազգային օր: Այս մասին նա հայտարարել է Փարիզում հայ համայնքի ամենամյա ընթրիքի ժամանակ: «Ֆրանսահայերի պատմությունը Ֆրանսիայի պատմությունն է: Եվ քանի որ Հայոց ցեղասպանությունը մեր հիշողությունների մասն է կազմում, ապա Հայոց ցեղասպանության հիշատակը պետք է հարգվի նաև մեր հանրապետությունում: Ձեզ հետ ես նույնպես ուժերիս ներածին չափով կպայքարեմ ժխտման ցանկացած դրսևորման դեմ, որն անարգում է զոհերի հիշատակն ու ողջերի արժանապատվությունը», - նշել է Ֆրանսիայի նախագահը: Չնայած այս որոշման մասին նախապես զգուշացված էր, այդուհանդերձ, Թուրքիան ցայտնոտի մեջ է: Էրդողանի մամուլի խոսնակ Իբրահիմ Քալընը Ֆրանսիայի նախագահի պնդումները որակել է որպես քաղաքական սուտ:
Երեք ամիս է անցել, բայց կառույցի անդամ երկրները ՀԱՊԿ գլխավոր քարտուղար դեռ չեն ընտրել: ՀԱՊԿ միացյալ շտաբի պետը նշել է, որ հարցի վերաբերյալ դեռ որոշում չկա: Գեներալ Գնդապետ Անատոլի Սիդորովն անդարադարձել է նաև տարածաշրջանային զարգացումներին, մասնավորապես Արցախի հակամարտության կարգավորմանը: «Հայաստանի և Ադրբեջանի ղեկավարների` կանոնավոր դարձած հանդիպումները թույլ են տվել որոշակի պայմանավորվածությունների հանգել ընդունված միջոցների հարցում` ուղղված վստահության ամրապնդմանը և խաղաղ գործընթացի համար պայմանների ստեղծմանը։ Վերջին տասնամյակներում առաջին անգամ է բարձր մակարդակում ուղիղ գիծ հաստատվել»,-ասել է Անատոլի Սիդորովը: :
2018 թվականից հայ-իտալական հարաբերությունները զարգանում են նոր թափով: Դրան նպաստել է երկկողմ բազմաթիվ այցելությունները, մասնավորապես Իտալիայի նախագահ Սերջիո Մատարելլայի այցը Հայաստան: Մեր երկրում Իտալիայի արտակարգ և լիազոր դեսպան Վինչենցո Դել Մոնակոն խոսել է երկու երկրների հարաբերությունների զարգացման և տնտեսական գործակցության հնարավորությունների մասին:
Կառավարության շենքի մոտ այսօր բողոքի ակցիա են իրականացրել ԵՊՀ գիտնականները: Նրանք պահանջել են գոնե մեկ տարով կասեցնել դեռ տարեվերջին կառավարության ընդունած 1515 որոշումը, որը վերաբերում է բազային ֆինանսավորման հատկացման մրցութային կարգին: Որոշման հետևանքով՝ Մայր Բուհի մոտ 200 աշխատակից գործազուրկ կդառնա: Մինչև ակցիայի մասնակիցները կհասցնեին նամակ փոխանցել կառավարության ղեկավարին, կրթության և գիտության նախարար Արայիկ Հարությունյանը լրագրողներին հայտնեց, որ այս տարի այդ որոշումը չի կիրառվելու:
«Կենտրոն» հեռուստաընկերությունը հերթական մեծ անակնկալն է մատուցում իր հեռուստադիտողին: Ընդառաջ գնալով բազմահազար ֆուտբոլասերների խնդրանքներին՝ «Կենտրոնը» ձեռք է բերել ֆուտբոլի Իսպանիայի Թագավորական Գավաթի՝ COPA DEL REY-ի կիսաեզրափակիչ և եզրափակիչ հանդիպումների ցուցադրման բացառիկ իրավունքը: Այսօր՝ ժամը 23:55-ին, կիսաեզրափակիչ առաջին խաղում մենք կցուցադրեք ֆուտբոլային աշխարհի ամենասպասված դիմակայություններից մեկը՝ Էլ կլասիկոն: Կամպ Նոու մարզադաշտում կատալոնական Բարսելոնան ընդունելու է Մադրիդի Ռեալին: Կկարողանա՞ն արդյոք Սանտյագո Սոլարիի սաները ռեվանշի հասնել Էռնեստո Վալվերդեի թիմի նկատմամբ. հարցի պատասխանը փորձել է իմի բերել «Էպիկենտրոնի» սպորտային մեկնաբանը: