Գյումրիում վթարային շենքերից մեկում բնակվող 10 ընտանիքի կյանքը վտանգված է: Շենքում մասնակի քարաթափումներ մշտապես եղել են, սակայն վերջին շրջանում մի քանի անգամ է փլուզում տեղի ունեցել: 5 հարկանի շենքի 5-րդ եւ 4-րդ հարկերում բնակիչներ այլեւս չեն ապրում: Շենքի մյուս բնակիչներն էլ գնալու տեղ չունեն: Նրանք Շիրակի մարզպետարանից խնդրի լուծում են պահանջել:

Ավշարի միակ դպրոցում արդեն հինգ օր կրքերը չեն հանդարտվում: Չնայած մարզպետարանը հայտարարություն էր տարածել, որ և՛ տնօրենը, և՛ փոխտնօրենը կշարունակեն աշխատել, սակայն ավշարցիներն անդրդվելի են, պահանջում են տնօրենից ազատել դպրոցը: Մարզպետարանն այսօր էլ աուդիտ է ուղարկել դպրոց, ինչից մանկավարժական կազմն ավելի է բորբոքվել: Ավշարում խոչընդոտել են նաև մեր թղթակցի աշխատանքը: Հնգօրյա դասադուլի, չհանձնվող տնօրենի ու համառ ավշարցիների մասին առավել մանրամասն՝ տեսանյութում:

Վերաքննիչ քրեական դատարանը մերժել է ԱԱԾ տնօրենի և ՀՔԾ պետի գաղտնալսման գործով Ռոբերտ Քոչարյանին տուժող ճանաչելու վերաբերյալ 2-րդ նախագահի պաշտպանների բողոքը: Դատարանը ուժի մեջ է թողել առաջին ատյանի կայացրած որոշումը: Քոչարյանի պաշտպան Հովհաննես Խուդոյանը դատարանում ներկայացրել է բողոքը և նշել, որ գաղտնալսումից պարզ երևում է, որ ԱԱԾ տնօրենն ու ՀՔԾ պետը ազդեցություն են ունեցել Ռոբերտ Քոչարյանի խափանման միջոց կալանավորման որոշում կայացրած դատավորի վրա, և երկրորդ նախագահը կալանավորվել է հենց նրանց ցուցումով: Պաշտպանը նշել է, որ վերաքննիչ դատարանի որոշումը կբողոքարկեն վճռաբեկ դատարանում և գանգատ կներկայացնեն Մարդու իրավունքների եվրոպական դատարան:

Դատական նիստ` առանց պատասխանող կողմի: Լիդիան Արմենիան դատի է տվել բնապահպանության եւ ընդերքի տեսչական մարմնին` պահանջելով չեղարկել որոշումը, որով ընկերությանն արգելվում է Ամուլսարի ընդերքն օգտագործել: Մարմինը ստուգման արդյունքում պարզել է, որ այնտեղ կան Կարմիր գրքում գրանցված բուսատեսակներ եւ կենդանատեսակներ, ինչը հերքել են դրսից եկած մասնագետն ու բնապահպանության նախարարությունը: Տեսչական մարմինն, այնուամենայնիվ, չի հրաժարվել որոշումից, ինչի պատճառով հայտնվել է դատարանում: Դատական նախնական նիստին հայցվորն առանց պատասխանող կողմի է եղել:

Եվրոպական միության պատվիրակությունը սկսում է կրթության վերաբերյալ ԵՄ-Հայաստան քաղաքականության երկխոսությունը՝ Համապարփակ և ընդլայնված գործընկերության համաձայնագրի , նաև Կառավարության ծրագրի շրջանակում: Սրան զուգահեռ մեկնարկում է Թուրինի գործընթացի նոր փուլը: Այն պարբերական գնահատման գործիք է , որ կիրառվում է Եվրոպական հարևանության երկրներում կրթական բարեփոխումների արդյունավետությունը չափելու համար: Կրթության և գիտության նախարար Արայիկ Հարությանյանը «Էպիկենտրենի» հետ զրույցում անդրադարձել է Կրթության ազգային ինստիտուտը լուծարելու և նոր կառույց ստեղծելու մտադրությանը: Հիշեցնենք, ինստիտուտի աշխատակիցներն իրենց մտահոգությունների մասին բաց նամակ էին գրել վարչապետին, ինչից հետո Արայիկ Հարությունյանը հանդիպել էր մասնագետների հետ:

Կառավարության շենքի մոտ այսօր բողոքի հերթական ակցիան են անցկացրել գազավորված ըմպելիք արտադրող ընկերությունների ներկայացուցիչները: Նրանց մտահոգում է հարկային բեռն ավելացնելու կառավարության նախագիծը: Ակցիզային հարկի 30 տոկոսով ավելացումն, ակցիայի մասնակիցների խոսքով, նպաստելու է արտադրանքի թանկացմանը, ինչն էլ իր հերթին հանգեցնելու է սպառման ծավալների նվազմանը: Փոփոխությունների հետևանքով ընկերությունների գերակշիռ մասը կարող է փակվել: Ցուցարարները պահանջել են հանդիպում փոխվարչապետ Մհեր Գրիգորյանի հետ, նրանց լսել է վարչապետի օգնականը: