«2-3 օր ունենք,որպեսզի երկրում որակական իրավիճակ փոխենք».Փաշինյանը 2 սցենար ներկայացրեց
Մեկուսացման մեջ գտնվող Նիկոլ Փաշինյանը այսօր երեկոյան հերթական ճեպազրույցն է անցկացրել վարչապետի կեցավայրում: Խոսելով իրավիճակի քաղաքական կոնտեքստի մասին՝ երկրի ղեկավարն ասել է.«Մեր իշխանության ծագումնաբանությունը աշխատում է հենց մեր դեմ»:Նրա խոսքով՝ 2018 թ իրադարձություններից հետո Հայաստանում վախի մթնոլորտը չեզոքացել է, բայց օրինապահության մթնոլորտը պատշաճ աստիճանի չի հասել: Փաշինյանը ներկայացրել է հնարավոր զարգացումների 2 սցենար՝ կա՛մ կրկին գնալ համատարած արգելափակումների, կա՛մ հսկողության տակ առնել իրավիճակը և արձանագրել արդյունքներ
«Տեղյակ չենք,չենք լսել».Ովքե՞ր են կազմակերպել երեխաների մասնակցությամբ մարդաշատ միջոցառումը
Վարչապետը առավոտյան ֆեյսբուքի իր էջում տեսանյութ էր հրապարակել, որտեղ երևում է, թե ինչպես են Շենգավիթի բակերից մեկում բազմաթիվ երեխաների մասնակցությամբ նշել հունիսի 1-ը: «Սա ծայրահեղ անպատասխանատվության դրսեւորում է, սպառնալիք ազգային անվտանգությանը։ ԱԱԾ տնօրենին հանձնարարել եմ զբաղվել բոլոր այսօրինակ միջոցառումների կազմակերպիչներով»,-գրել էր Փաշինյանը: Ավելի ուշ պարզվեց, որ միջոցառումը կազմակերպվել է Բագրատունյաց 34 և 36 շենքերի բակում:«Էպիկենտրոն»-ի նկարահանող խումբն այսօր եղել է այնտեղ, զրուցել տեղի բնակիչների հետ: Նազելի Ստեփանյանի տեսանյութը:
Բազմամարդ ցույց Մեյմանդարի շուկայում.գյուղացիները հրաժարվել են կատարել պարետի որոշումը
Բողոքի ակցիա Արմավիրի մարզի Մեյմանդարի շուկայում: Գյուղացիները բողոքել են պարետի այն որոշման դեմ, համաձայն որի՝ շուկան պետք է երկու օրով փակվի, որպեսզի տարածքում ախտահանում իրականացվի: Վաճառողները նշել են, որ արդեն գնված ապրանքը կարող է փչանալ: Ժամեր տևած ցույցից հետո պարետատունը գյուղացիներին թույլ է տվել այսօր ապրանքը վաճառել, նոր ապրանք չբերել, իսկ շուկան երկու օրվա փոխարեն կփակվի մեկ օրով:
Զգուշացե՛ք. արտառոց գողությունների շարք Երևանում
Զգուշացե՛ք. մեքենաներից նոր տեսակի գողությունների շարք է սկսվել, այս անգամ տանում են մեքենայի պետհամարանիշները: Գողության մասին բարձրաձայնել է «Վարորդի ընկեր» ՀԿ-ն: Արդեն մի քանի օր է՝ ՝համացանցում նույնպես կարելի հանդիպել այսպիսի բազմաթիվ ահազանգերի: Ուշագրավն այն է, որ գողություն կատարողները գողացած պետհամարանիշը վաճառելու համար կոնտակտ են թողնում, որպեսզի վարորդը կարողանա կապ հաստատել և գին պայմանավորվել: Պահանջում են 20-30 հազար դրամ: Ոստիկանությունից «Էպիկենտրոն»-ին տեղեկացրել են, որ պետհամարանիշների գողությունների հետ կապված կան հարուցված քրեական գործեր:
Քաղաքապետարանում մթնոլորտն անառո՞ղջ է.Մարությանի խոսնակի արձագանքը նախկին աշխատակցի մեղադրանքներին
«Ոչ աշխատանքային, անառողջ մթնոլորտի պատճառով հեռանում եմ քաղաքապետարանից».համացանցում այսօր այս վերնագրով նյութեր շրջանառվեցին: Երևանի քաղաքապետարանի աշխատակազմի անշարժ գույքի կառավարման վարչության արդեն նախկին աշխատակից Նարեկ Թադևոսյանը ֆեյսբուքի իր էջում քաղաքային իշխանությանը մեղադրել էր փորձառու կադրերից հրաժարվելու, նրանց քաղաքական դրդապատճառներով աշխատանքից ազատելու համար: Նախկին աշխատակցի մեղադրանքը Երևանի քաղաքապետարանում չեն ընդունում:
Ի՞նչ փոփոխություններ է առաջարկում Միքայել Մելքումյանը բանկային համակարգում
Խորհրդարանը շարունակում է հերթական նիստերը: Պատգամավորները նախ կողմ են քվեարկել քննարկված բոլոր նախագծերին: Ընդունվել է նաև «Բարգավաճ Հայաստան» խմբակցության պատգամավորներ Արթուր Դալլաքյանի և Արտյոմ Ծառուկյանի նախագիծը: Անցնելով օրակարգին՝ խորհրդարանականները քննարկել են Միքայել Մելքումյանի ներկայացրած նախագիծը, որով առաջարկվում է երաշխավորվող դրամական ավանդների շեմը դարձնել 16 մլն դրամ, իսկ արտարժույթի դեպքում՝ 7 մլն: Երկրորդ ընթերցմամբ քննարկվել է նաև ոստիկանության նոր համակարգի վերաբերյալ օրենդրական փաթեթը:
Ոստիկանությունը Երևանում շարունակել է ուժեղացված ռեժիմով ծառայությունը
Ոստիկանությունն այսօր ևս անցակետեր է տեղակայել քաղաքի տարբեր վարչական շրջաններում ու փողոցներում: Իրավապահները հսկողություն են իրականացել մեքենաներով ու հանրային տրանսպորտով երթևեկողների հանդեպ: Քաղաքացիների մեծ մասը հիմնականում եղել է դիմակներով, իսկ նրանք, ովքեր դիմակ չեն կրել, տուգանվել են՝ չնայած արդարացումներին ու դժգոհություններին: