Հունիսի 21-ին մեկնարկած ապօրինի շինությունների ապամոնտաժումը հարուցել է քաղաքացիների դժգոհությունը: «Եթե չէր կարելի կառուցել, թո՛ղ արգելեին ու շինարարությունը կասեցնեին»,-նշել է Աջափնյակի կառուցապատողներից մեկը: Երևանի ավագանու ԲՀԿ խմբակցության անդամների կարծիքով՝ Աջափնյակ վարչական շրջանում մի շարք դեպքերում ոնտահարվել են կառուցապատողների իրավունքները: Առաջացած դժգոհություններին արձագանքել է նաև քաղաքպետարանը: Հայկ Մարությանը քաղաքացիներին կոչ է արել իրենց ձեռքով կանխել կամ վերացնել ապօրինությունը:
«Իզմիրլյան» ԲԿ-ի տնօրեն Արմեն Չարչյանի կալանավորման որոշումից դժգոհ «սպիտակ բանակի» ներկայացուցիչները բողոքի ակցիա են արել: Բժիշկներն այսօր նամակներ են հանձնել պետական գերատեսչություններին: Չարչյանին ազատություն տալու պահանջին միացել է 539 մասնագետ:
Օրվա երկրորդ կեսից հետո ԿԸՀ-ն ավարտել է 82 ընտրատեղամասերի ձայների վերահաշվարկը: «Էպիկենտրոնը» վերահաշվարկի գործընթացն ամփոփել է կենտրոնական ընտրական հանձնաժողովի քարտուղարի հետ: Արմեն Սմբատյանն ասել է, որ վերահաշվարկի համար 4 դիմում են ստացել, տեղամասերի մեծ մասում էլ վերահաշվարկն արել են սեփական նախաձեռնությամբ: Սմբատյանը պարզաբանել է նաև, թե ինչու է ԿԸՀ-ի կայքից հեռացվել ընտրությունների արդյունքերի մասին աղյուսակը:
ՄԱԿ-ի օրացույցում հունիսի 26-ը թմրամիջոցների չարաշահման և ապօրինի շրջանառության դեմ պայքարի միջազգային օրն է:«Մենք թմրանյութերի դեմ» ՀԿ-ն օրվան ընդառաջ կազմակերպել է գիտաժողով «Ավելի շատ իմացություն՝ ավելի արդյունավետ կանխարգելման համար» խորագրով:
Հայաստանի և Արցախի շուրջ առաջիկայում սպասվող իրադարձությունները շարունակում են մնալ վերլուծաբանների ուշադրության կենտրոնում: «Սահմանների հստակեցումը լինելու է բացառապես Հայաստանի հաշվին»,- կարծում է քաղաքագետ Արմեն Բաղդասարայանը: Ըստ նրա՝ իշխանությունը գնում է ամեն ինչ հանձնելու ճանապարհով: Արցախցի քաղաքագետ Ալեքսանդր Քանանյանի խոսքով էլ՝ առաջիկայում ականատես ենք լինելու նոր զիջումների, ինչը բխում է նոյեմբերի 9-ի փաստաթղթից:
Հայաստանը չեմպիոն ունի Իտալիայում կայացած մինչև 22 տարեկանների բռնցքամարտի Եվրոպայի առաջնությունում: Մեր մարզիկներից պատվո հարթակի ամենավերին աստիճանին է կանգնել 56 կգ քաշային Արթուր Բազեյանը: Նա եզրափակիչում նոկաուտով հաղթել է իռլանդացի Ադամ Հեսսիոնին: Հայաստանը ներկայացնող ևս մեկ բռնցքամարտիկ՝ 81 կգ քաշային Համբարձում Հակոբյանը, նվաճել է արծաթե մեդալ: Մեր մարզիկների հաղթական մրցելույթները կներկայացնի Արամ Մանուկյանը: