«Սերժ Սարգսյանի կառավարման 10 տարիներն են եղել հակաղարաբաղյան». այսպես է երրորդ նախագահին հակադարձել ԱԺ «Իմ քայլը» խմբակցության պատգամավոր Հրաչյա Հակոբյանը: Փաշինյանի աներձագն իր պնդումը փորձել է հիմնավորել նրանով,որ 10 տարվա ընթացքում որևէ լուրջ ներդրում Արցախում տեղի չի ունեցել: «Լուսավոր Հայաստան» խմբակցությունում էլ հակառակ տեսակետն են հայտնել: Նույնիսկ մեղադրանք է հնչել,թե ինչու՞ են ներդրումներ արվել այն տարածքներում,որոնք ցանկացել են հանձնել:
Կորոնավիրուսի հարցով ԱԺ քննիչ հանձնաժողովը կառավարությանն ու պետական այլ մարմիններին է ուղարկել 251 հարց: Դրանք կազմել են ընդդիմադիր 2 ֆրակցիաները: Հանձնաժողովի այսօրվա նիստում «Իմ քայլը» քննադատել է հարցերի բովանդակությունը՝ նշելով, որ դրանք ծանրաբեռնում են իշխանությանը և ժամանակավրեպ են: Ի պատասխան՝ Միքայել Մելքումյանը հայտարարել է,որ մեկ տարին ճիշտ ընտրված ժամանակահատված է վիրուսի դեմ պայքարին ուղղված աշխատանքները գնահատելու համար:
Երևանի ընդհանուր իրավասության դատարանի Շենգավիթի նստավայրում շարունակվել է Ռոբերտ Քոչարյանի և մյուսների գործով դատաքննությունը: ԶՈՒ ԳՇ նախկին պետ Յուրի Խաչատուրովի ինքնազգացողությունը կտրուկ վատացել է,ինչի պատճառով նիստը հետաձգվել է: Դատարան է հրավիրվել նաև շտապօգնություն: Մինչև այդ, դատական նիստի սկզբին, Խաչատուրովի պաշտպան Միհրան Պողոսյանը տեղեկացրել է,որ պաշտպանյալի առողջական վիճակի վերաբերյալ միջնորդություն ունի: Այն քննվել է դռնփակ ռեժիմով։
Փաստաբանների պալատի նախագահը պատրաստվում է դիմել դատարան՝ գերիների, զոհվածների ու անհետ կորածների թիվը գաղտնիք համարելու՝ ՊՆ որոշումը վիճարկելու համար: Արա Զոհրաբյանի կարծիքով՝ իշխանությունը խնդրահարույց իրավիճակ է ստեղծել,այդ պատճառով էլ շարունակում է պահել ռազմական դրությունը: Մասնավորապես, ըստ Զոհրաբյանի, այս իրավիճակում Ադրբեջանը կարող է շարունակ ձգձգել գերիների վերադարձի գործընթացը:
ԲՀԿ Ուսանողական խորհուրդը սկսել է «Մենք կհաղթենք,երբ կհամախմբվենք» համահայկական ծրագիրը: Նպատակն է բացահայտել խելացի և բանիմաց երիտասարդներին, նրանց ներգրավել պետության առջև ծառացած խնդիրների լուծման աշխատանքներին: ԲՀԿ Ուսանողական խորհրդի անդամները գաղափարի մասին նախ հայտնել են կուսակցության նախագահ Գագիկ Ծառուկյանին, ստացել նրա հավանությունը: Ծրագիրը մեկնարկել է կոնֆերանս-քննարկումով, որին մասնակցել են նաև «Բարգավաճ Հայաստան» խմբակցության պատգամավորները: