Հյուսիսային ու հարավային ուղղություններով մարտական գործողություններն այսօր ծանր են եղել: ՊՆ ներկայացուցիչ Արծրուն Հովհաննիսյանն ասել է, որ նախորդ օրվա համեմատ հյուսիսային հատվածում կրակն ավելի թեժ է եղել: Նա Հադրութը, Ջաբրայիլն ու հարակից գյուղերը գրավելու՝ Ալիևի հայտարարությունը համարել է ծիծաղելի՝ նշելով, որ այդ հայտարարության ժամանակ ինքը ռուս լրագրողների հետ եղել է Հադրութում: «Կան կասկածներ, որ Ադրբեջանում ռազմավարական կառավարման համակարգը խաթարված է, և շատ հնարավոր է՝ Ալիևը հայտնվել է այդ ծուղակում»,- ասել է Հովհաննիսյանը:
ԱՄՆ-ի տարբեր նահանգներից ավտոերթով Վաշինգտոն ժամանած հազարավոր հայեր «Երևանը խաղաղություն է ուզում, իսկ Բաքուն՝ Երևանը» կոչերով ակցիա են անցկացրել Սպիտակ տան դիմաց: Նրանք ԱՄՆ կառավարությունից պահանջել են ճանաչել Արցախի անկախությունը, Թուրքիային զրկել ՆԱՏՕ-ի անդամակցությունից, դադարեցնել ֆինանսավորումը Ադրբեջանին ու Թուրքիային: Միջոցառում է կազմակերպվել նաև հայաշատ Գլենդելում:
ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը Եվրոպայի պահպանողականների և ռեֆորմիստների դաշինքի գործընկերների հետ քննարկել է Արցախի դեմ Ադրբեջանի և Թուրքիայի սանձազերծած ագրեսիան: Դաշինքն իր մտահոգությունն է հայտնել ԼՂ հակամարտության գոտում շարունակվող ռազմական գործողությունների առնչությամբ՝ կոչ անելով Ադրբեջանին և Թուրքիային անհապաղ դադարեցնել կրակը: Նաիրա Զոհրաբյանի հետ հեռախոսազրույցում եվրոպացի գործընկերները նաև իրենց վրդովմունքն են հայտնել Գագիկ Ծառուկյանի խափանման միջոցը չփոխելու՝ վերաքննիչ դատարանի որոշման վերաբերյալ:
Մեծի Տանն Կիլիկիո Արամ Ա կաթողիկոսը տեսաուղերձ է հղել հայոց բանակի զինվորներին և ամբողջ աշխարհին՝ նշելով, որ Ադրբեջանը և Թուրքիան իրենց նյութեղեն զենքով չեն կարող ընկճել մեր ժողովրդի մնայուն հավատքը: Արամ Առաջինն ընգծել է, որ հայ ժողովրդի հավատքն ու հայրենասիրությունն ավելի զորեղ են, քան աշխարհի ամեն տեսակի զենք:
Երևանում կայացել է ԵԱՏՄ միջկառավարական խորհրդի հերթական նիստը՝ Հայաստանի, Ռուսաստանի, Ղազախստանի և Բելառուսի կառավարությունների ղեկավարների մասնակցությամբ: Նիկոլ Փաշինյանը խոսել է հայ ժողովրդի դեմ ադրբեջանա-թուրքական ագրեսիայի մասին՝ ընդգծելով, որ չնայած բոլոր ջանքերին՝ հակառակորդին չի հաջողվել հասնել ոչ մի նշանակալի արդյունքի: «Մենք հավատարիմ ենք Լեռնային Ղարաբաղի հիմնախնդրի խաղաղ կարգավորման սկզբունքին և պատրաստ ենք խաղաղության գործընթացի վերականգնմանը»,- ասել է Փաշինյանը: Ռուսաստանի վարչապետը կարևոր է համարել ռազմական գործողությունների անհապաղ դադարեցումը և դիվանագիտական ճանապարհով հակամարտության կարգավորմանն անցնելը:
Մոսկվայում կայանալիք նախարարական հանդիպմանն ընդառաջ՝ ռազմական գործողություններն առաջնագծի բոլոր ուղղություններով շարունակվել են: Մարտերը հատկապես ինտենսիվ են եղել հարավում: Հայաստանի ՊՆ-ն հերքել է Բաքվի քարոզչամեքենայի հերթական սուտը Մինգեչաուրին և Աղջաբադին իբր հարվածելու մասին և նախազգուշացրել է՝ ադրբեջանական զինուժի կողմից բնակավայրերի և քաղաքացիական ենթակառուցվածքների հանդեպ որևէ սադրանքի դեպքում ՊԲ-ն տալու է անհամարժեք կոշտ պատասխան: Արցախի նախագահի խոսնակն էլ գրել է՝ «Մեր հրետանու անվրեպ հարվածներից հետո թշնամու շարքերում նահանջի համար ասկյար չի մնացել»:
Շուշիի Ղազանչեցոց եկեղեցու հրթիռակոծության հետևանքով վիրավորված ռուս ռազմական մեկնաբան Յուրի Կոտյոնոկի վիճակը ծանր է, սակայն կյանքին վտանգ չի սպառնում: Երեկ նա Ստեփանակերտում բարդ վիրահատություն է տարել, իսկ այսօր արդեն սանիտարական ուղղաթիռով տեղափոխվել է «Էրեբունի» բժշկական կենտրոն: Այսօր վաղ առավոտյան ականապայթյունային վնասվածքներով ևս երկու ռուսաստանցի լրագրող էր տեղափոխվել նույն բուժկենտրոն: Հայկական կողմը պատրաստակամություն է հայտնել լրագրողների բուժումը կազմակերպել ամենաբարձր մակարդակով:
ԱԺ արտահերթ նիստում առաջին ընթերցմամբ ընդունվել է ռազմական դրությանը վերաբերող երկու նախագիծ: Դրանցից մեկով վարչական ու քրեական պատասխանատվություն է սահմանվում ռազմական դրության կանոնները խախտելու համար: Մասնավորապես, ռազմական դրության ընթացքում պատերազմական գործողությունների մասին կեղծ ու խուճապ առաջացնող տեղեկություններ տարածողները կենթարկվեն վարչական պատասխանատվության: Հաջորդ նախագծով հնարավորություն կստեղծվի, որ կամավորներն ու զորակոչիկները պահպանեն իրենց աշխատատեղերը:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv