Աշխատանքային այցով Արցախում է վարչապետ Նիկոլ Փաշինյանը: Երկրի ղեկավարը նախագահ Բակո Սահակյանի ուղեկցությամբ սահմանի հյուսիսային հատվածում ծանոթացել է օպերատիվ իրադրությանը և զինծառայողների սոցիալ-կենցաղային պայմաններին: Հայաստանի վարչապետը նշել է, որ Զինված ուժերում բարեփոխումները չեն ավարտվելու, իսկ զինծառայողները զգալու են,որ հանրությունն ու կառավարությունն իրենց կողքին են օրը 24 ժամ:
Անցկացվել է Արտաքին գործերի նախարարությանը կից «Բարի գալուստ Հայաստան» դիվանագիտական ասոցիացիայի ամանորյա բարեգործական ցուցահանդեսը, որին մասնակցել են 13 դիվանագիտական ներկայացուցչություններ, ինչպես նաև տեղական արտադրողներ Հայաստանից ու Արցախից: Վաճառքի ամբողջ հասույթն ուղղվելու է երեք ծրագրերի իրականացմանը: Ցուցահանդեսի տաղավարներով շրջել և ներկայացված ապրանքներին ծանոթացել է Արտաքին գործերի նախարարը: «Սա կարևոր հարթակ է՝ Հայաստանում հավատարմագրված դիվանագիտական կորպուսի ներկայացուցիչներին միավորելու համար»,- նշել է Զոհրաբ Մնացականյանը:
Լրանում է Ադրբեջանի հայաբնակ շրջաններից զանգվածային տեղահանության ու հայաթափման 30 տարին: Տուժածների հանդիպման վայրն անփոփոխ է: Տեղահանված մի խումբ հայեր, ավանդույթի համաձայն, ծաղիկներ են խոնարհել Ծիծեռնակաբերդում՝ Գանձակի զոհերի հիշատակի համար տեղադրված խաչքարի մոտ: Ողբերգական դեպքերի տարելիցը Ադրբեջանից տեղահանված հայերը նշել են առանց որևէ պետական պաշտոնյայի ներկայության:
«Այն, ինչ որ Լեռնային Ղարաբաղի խնդրի բանակցությունների շրջանակում արտահայտվել է Սանկտ Պետերբուրգում և Վիեննայում, եղել և մնում է օրակարգային»,- այսօր հայտարարել է Հայաստանի արտաքին գործերի նախարարը: Զոհրաբ Մնացականյանը նաև անդրադարձել է Ադրբեջանի նախագահի այն հայտարարությանը, թե 2019-ը կորսված հնարավորությունների տարի էր Արցախի հարցի բանակցային գործընթացում: Մնացականյանն ընդգծել է, որ Հայաստանի հետհեղափոխական կառավարությունը ցույց է տվել իր լրջությունն ու առաջ քաշել խնդրի կարգավորման իր բանաձևը, որն, ի դեպ, դրական է գնահատել նաև Ռուսաստանի արտգործնախարար Սերգեյ Լավրովը:
Չնայած Հայկ Մարությանը Ֆեյսբուքի ուղիղ եթերում պատասխանեց իր և քաղաքապետարանի հասցեին հնչող մեղադրանքներին, այդուհանդերձ, Երևանի քաղաքապետարանի շուրջ բարձրացված աղմուկը չի մարում: Մարությանը ապատեղեկատվություն համարեց քաղաքին նվիրատվություն արած ընկերություններին արտոնություններ տալու վերաբերյալ բոլոր խոսակցությունները, ներկայացրեց բազմահարկ շենքերի կառուցման թույլտվության վերաբերյալ տարբեր փաստաթղթեր՝ փորձելով հիմնավորել, որ կառուցապատողները դրանց դիմաց քաղաքին ոչինչ չեն նվիրել: Մարությանի ելույթը, սակայն, ոչ միայն չփարատեց հնարավոր կոռուպցիոն զարգացումների մասին շատերի կասկածները, այլև առիթ դարձավ համացանցային թեժ «մարտեր»-ի:
Արցախի նախագահ Բակո Սահակյանի մասնակցությամբ Մարտունի քաղաքում բացվել է նոր բնակելի թաղամաս: Առաջին բնակիչները կարիքավոր ընտանիքներն են, որոնց նկատմամբ պետությունը պարտավորություն ուներ: Հանձնելով բանալիները բնակիչներին՝ երկրի ղեկավարը շրջել և ծանոթացել է շահագործման հանձնված բնակարանների հնարավորություններին:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv