«Ամենակարևոր գործերից մեկը, որ պետք է անի Հատուկ քննչական ծառայությունը, մարտի մեկի սպանությունների բացահայտումն է»,- ծառայության նորանշանակ պետ Սասուն Խաչատրյանին ներկայացնելիս ասել է ՀՀ վարչապետ Նիկոլ Փաշինյանը: «Օրենսդրությամբ սահմանված է, որ ծառայությունը զբաղվում է այն իրավախախտումներով, հանցագործություններով, որոնք վերագրվում են օրենսդիր, դատական, գործադիր իշխանության ներկայացուցիչներին»,- նշել է վարչապետը: Նա առանձնակի ուշադրություն է հրավիրել ընտրական հանցագործությունների վրա: Ոչ մի կոռուպցիոներ չպետք է հանգիստ քնի, կառույցի քննիչների աշխատասենյակներում էլ որևէ բարձրաստիճան պաշտոնյայի լուսանկար չպետք է լինի: Վարչապետ Փաշինյանն այցելել է նաև պետական պահպանության ծառայություն, աշխատակազմին է ներկայացրել նորանշանակ պետ Գրիգորի Հայրապետովին:

Այսօր մեկնարկել է Ազգային Ժողովի հերթական նստաշրջանը: Օրակարգի առաջին հարցը հունիսի 16-ին առաջացող Սահմանադրական Դատարանի անդամի թափուր տեղի համար առաջարկված թեկնածուի ընտրության հարցն է եղել: Դատավորների ընդհանուր ժողովն այս պաշտոնում առաջադրել է Վճռաբեկ դատարանի քրեական պալատի դատավոր Ելիզավետա Դանիելյանի թեկնածությունը:Նա այսօր հանդես է եկել, այսպես ասած, նախընտրական ելույթով , այնուհետև պատասխանել պատգամավորների հարցերին: ՍԴ անդամի ընտրությունը տեղի է ունենալու փակ գաղտնի քվեարկությամբ:

Շարունակվում են միասնական քննությունները: Քննական կենտրոններում այսօր «Հայոց լեզու և գրականություն առարկայի» միասնական քննություն է եղել: Դիմորդներից մեկը մեր թղթակցին պատմել է, թե ինչու է որոշել ընդունվել ԵՊՀ միջազգային հարաբերությունների ֆակուլտետ ու դառնալ դեսպան: Կրթության և գիտության նախարար Արայիկ Հարությունյանն առավոտյան այցելել է 118 դպրոցում գտնվող քննական կենտրոն: Հենց այնտեղ էլ նա ասել է, որ տարին  բուհերի համար ճգնաժամային է, որը կշարունակվի 6 տարի:

Ադրբեջանը  սեփական ժողովրդին մոլորեցնելու համար հերթական անգամ գնաց սուտ տեղեկություն տարածելու ճանապարհով: Հունիսի-6-7-ը ադրբեջանական կողմը դիմել էր հայկական զինված ուժերի հրամանատարությանը՝ խնդրելով թույլ տալ  որոշ քաղաքացիների մոտենալ Գյուննութ բնակավայրի գերեզմաններ: Չարաշահելով հայկական կողմի մարդասիրությունը  և չհարգելով  իր մահացածների հիշատակը՝  ադրբեջանական լրատվամիջոցները կեղծ տեղեկություններ տարածեցին, թե իբր Ադրբեջանը գրավել է այդ տարածքը: Պաշտպանության նախարարությունը տեսանյութ է հրապարակել, որտեղ պարզ երևում է հայկական դիրքերի լիարժեք  վերահսկողությունը  Գյուննութի ավերակների վրա և բացահայտվում է   Ադրբեջանի տարածած հերթական սուտը: