Այսօր նիստի ավարտին խորհրդանական կրքերը թեժացել են: Բուռն է անցել «Բջջային հավելվածի միջոցով երթևեկության կանոնների խախտման մասին» հաղորդում տալու նախագծի քննարկումը: Համաձայն դրա՝ քաղաքացին, գրանցվելով հավելվածում, կարող է ճանապարհատրանսպորտային երթևեկության կանոնների խախտումը նկարահանել և ուղիղ կապով փոխանցել ոստիկանությանը: Տեսանյութը ուղարկվելու է համապատասխան սերվերին, և ոստիկանության աշխատակիցներն, ուսումնասիրելով տեսանյութը, կազմելու են վարչական ակտ: Օրինագծի հեղինակներն իշխող խմբակցության պատգամավորներ Սիսակ Գաբրիելյանն ու Արմեն Փամբուխչյանն են: «Բարգավաճ Հայաստան» խմբակցության պատգամավորները փոփոխություններին դեմ են արտահայտվել՝ նշելով, որ այն ոչ թե կառողջացնի երթևեկությունը, այլ նոր խնդիրներ կառաջացնի:
Անցկացվել է ապրիլյան պատերազմի հանգամանքներն ուսումնասիրող քննիչ հանձնաժողովի հերթական փակ նիստը: Այս անգամ պատգամավորներին նոր մանրամասներ է հայտնել պատերազմի օրերին առաջնագծում կանգնած զինծառայողներից մեկը: Հանձնաժողովի նախագահ Անդրանիկ Քոչարյանը լրագրողներին ասել է, որ հրավիրված անձը տրամադրել է շատ կարևոր տեղեկություն, որը մտահոգություններ է առաջացրել հանձնաժողովի անդամների մոտ: Թե ո՞վ է եղել փակ հանդիպման գաղտնի հյուրը, Քոչարյանն այդպես էլ չի բացահայտել:
Նյու Յորքում կայանալիք ՄԱԿ-ի Գլխավոր ասամբլեայի 74-րդ նստաշրջանի շրջանակում Հայաստանի և Ադրբեջանի արտաքին գործերի նախարարների միջև հնարավոր հանդիպման մասին դեռ վաղ է խոսել: Հայաստանի արտաքին գործերի նախարարության մամուլի խոսնակ Աննա Նաղդալյանը տեղեկացրել է, որ արտգործնախարարները համաձայնել են հանդիպել, սակայն որտեղ և ինչ ժամկետներում կկայանա հանդիպումը` դեռ չեն կարող ասել: «Կա սկզբունք, որ հանդիպման մասին համաձայնեցված կարգով Հայաստանն ու Ադրբեջանը պետք է միաժամանակ հայտնեն, ինչը խախտել հայկական կողմը չի պատրաստվում»,-ասել է Նաղդալյանը: Նա նաև տեղեկացրել է նախարար Մնացականյանի առաջիկա այցերի մասին, անդրադարձել օրակարգային մի քանի հարցերի:
Երրորդ նախագահ Սերժ Սարգսյանի եղբոր՝ Լևոն Սարգսյանի նկատմամբ դատարանը որպես խափանման միջոց է ընտրել կալանավորումը: Հիշեցնենք՝ Լևոն Սարգսյանը «Հյուսիս-Հարավ ճանապարհային միջանցք» ծրագրի մշակման և իրագործման ընթացում թույլ տրված առերևույթ չարաշահումների դեպքերի առթիվ հարուցված քրեական գործով որպես մեղադրյալ է ներգրավված: ԱԱԾ-ն մերժել է Դավիթ Սանասարյանի միջնորդությունը, Հրազդան ԲԿ-ի տնօրենը վերադարձրելէ յուրացրած խոշոր գումարը, իսկ ահա Գյումրիի ոստիկանությունը բացահայտելէ դրամանենգության դեպք: Այս և օրվա մյուս քրեական նորությունները՝ մեկ տեսաշարով:
Երևան քաղաքի ընդհանուր իրավասության դատարանը, Մեսրոպ Մակյանի նախագահությամբ, այսօր որոշում է կայացրել մեկ միլիոն դրամ գրավի դիմաց ազատ արձակել 2015-ի նոյեմբերի 25-ին Նորք Մարաշում վնասազերծված զինված խմբի ղեկավար Արթուր Վարդանյանին: Հիշեցնենք որ Վարդանյանը մեղադրվում է բռնի ուժով իշխանությունը զավթելու փորձի համար:
Ազգային ժողովն այսօր քննարկել է կենդանիների հանդեպ դաժան վերաբերմունքը քրեականացնող օրինագիծը: Նաիրա Զոհրաբյանի հեղինակած նախագծով առաջարկվում է կենդանիների նկատմամբ դաժան վերաբերմունքի համար սահմանել տուգանք՝ նվազագույն աշխատավարձի 100-300-ապատիկի չափով, կա՛մ կալանք՝ 1-3 ամիս, կա՛մ ազատազրկում՝ առավելագույնը 3 տարի ժամկետով: Ազգային ժողովը քննարկել է նաև գրպանահատության համար պատիժը խստացնող օրենքի նախագիծը և Սերգեյ Բագրատյանի ներկայացրած՝ պատգամավորների հարցումներին պատասխանելու համար 10-օրյա ժամկետ սահմանելու հարցը:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv